2 Pita 2 - DAWAN BÎLA AISKA

Kunin smalki nani ba

¹ Bamna Israel nisanka tilara, gâd prapitka kuninkira nani sin bâra kan; baku sin man nani tilamra smasmalkra kuninkira nani bâra kabia. Witin nani ai lukanka ra wan sauhki nani ba, yukuwan lâka ra wan smalkbia, bara witin nani ra swaki sakata Dawanka pali ra sin kulkaia apia wibia; naha na lika witin nani ra pat pali âpu daukaia tânka sa.

² Upla ailal witin nani daukanka saura nani ba nina blîkbia, bara witin nani tâka mita, kasakka lâka yabalka ba dukiara saura aisabia.

³ Lalah ra uya want ba mita, kunin smalkanka ni kasak pali mai smalkbia; kuna witin nani ra pât ra lulki swiaia ba lika ai bîla kaikisa, kan witin nani ba pat piua wihka luan wina pât ra lakan sa bamna.

⁴ Gâd mita insal nani saura daukan ba saurka swih tikras, kuna baha nani ba sut hil pauta ra lulki tihmu pali ra swin sa, sîn ni priski lâ tara yua ba kat lâka daukaia.

⁵ Wan tasbaya almuk pali ra sin, Gâd mita swih tikras kan, sakuna lisamra tara blikan, bara baha uplika saura nani kan ba âpu daukan, kuna Noa bara kau upla 7 kira swaki sakan; Noa sika upla nani ra smalkan ai rayaka wapni bri kaia dukiara.

⁶ Sodoma bara Gomora tawanka wal ba, Gâd mita ban swi âpu daukan, bara pauta mita angki yamhpus baman daukan, baha lika naika piua ra upla nani saura lâka ra iwbia nani sut ra latan sampla kum kabia wisi.

⁷ Sakuna Lot rayaka swaki sakata, kan witin ba upla kasakkira kum kan, upla nani daukanka saura nani ba kaiki uya sari bri kan.

⁸ Naha waitna kasakkira witin nani tilara iwi kan ba, yu bani ai kupia painkira ra sari bri kan, saura dadaukra nani ai mawan kat saura daukan kaikuya bara walisa piua ra.

⁹ Bamna Dawan kaikisa, witin ra luki uplika nani ba, traika kaikanka wina swaki sakisa, bara sin nu sa saura dadaukra nani ba, pât mununhtara bri kaia lâ tara yua ba kat.

¹⁰ Gâd mita kau pali klala yabia, baha nani ai brinka baman nina bliki bara Dawan karnika sin bahki kulki ba. Witin nani ba kiama karna bara ai bisniska apia ra ban dimisa; ai purara karnika bri nani ba swira paskisa sibrin sin âpu;

¹¹ bamna insal nani ba, smasmalkra bahki nani wal kau karnika brisa, bara sip pali sa, sakuna Dawan mawanra baha nani swira daukras sa.

¹² Bara naha uplika nani kupia lukra ba, sim daiwan wail aisubi takan ningkara, upla nani mita alki iki ba wal baku sa; witin nani diara sip tânka briras ai sinska lukra wal baman iwisa, diara tânka briras ba dukiara saura aisisa; bamna daiwan baku prubia,

¹³ bara pât wahwi kabia upla wala nani ra yan pât wahwan ba mana. Witin nani lika lilia sa lukisa, minitka ra dukiara dîa dîa dauki ba mita; baha ba swira lâka bara mina prukaia lâka kum sa, ani piua pata tara ra witin nani ba man nani wal asla iwi pi piua ra, ai tânka kuninkira nani wal lilia taki ba ra sin.

¹⁴ Mairin nani kaikbia ba sut want sa; saura dauki sin swapras. Sulka swapan takan nani ba maisa kapisa; witin nani baman sin diara manis bri kaia want sa; bamna baha nani ba upla saura pali kulkan sa.

¹⁵ Witin nani yabal wapni ba swin mita tiwi wataukisa. Beor luhpia prapit Balaam daukanka ba nina blikisa, bamna Balaam sika diara saura dauki lalah briaia baman luki kan;

¹⁶ sakuna Balaam saurka ba dukiara, biriku mairin bîlas kumi mita, upla baku witin ra aisi lawi daukan, bara sins âpu lâka ba wina sin takaskan.

¹⁷ Naha smasmalkrika nani lika, sim tingni kumi lâwan ba baku sa, kasbrika nani pâsa mita aki brih wi ba wal baku sa; bamna baha nani dukia wisi, Gâd mita plis tihmu tara pali kum ridi dauki swin sa.

¹⁸ Witin nani lika bîla bahki bara praut baman aisisa, bara tanis lâka ra iwi uplika nani wina swakwan nani ba, witin nani ra daukanka saura pali ni bara wîna tara brinka nani ni maisa kapisa.

¹⁹ Pramis munisa pri lâka ra iwi kaia sakuna sim piua ra, witin nani lika tâski lâka ba albika sa; bamna upla bani ani dukia mita witin ra yan taibi ba, baha dukia albika sa.

²⁰ Baku sin, baha nani wan Dawan Sasakra Jisas Kraist wal kakaira takan ba, witin nani lika naha tasba tâskika wina swak takan sa, sakuna baha diara tâski nani ba mita kli blaki pura lubia kaka, witin nani lika kanra kata ba wal kau saura takan sa.

²¹ Witin nani mapara kau pain kaia kan yabal kasak ba kakaira takras kata, kan kakaira taki si kli swiaia ba lika pain apia sa, lâ holikira yan kan ba wina.

²² Ban sakuna baha sins bîla aisin ba, naha bîla tânka nani wal praki aisisa: “Yul witin aikaban ba kli tawi pîsa, bara kwirku klin pali aihtabata ba, kli drapapa ra dimi aikarwisa.”