2 Pita 1 - DAWAN BÎLA AISKA

Lakula bîla

¹ Yang Saiman, Pita, Jisas Kraist dukia dadaukrika bara apastilka sna. Naha wauhkataya man nani ra mai ulbisna, man nani kasak lukan lâka manakira ba alki bri banhram sa, yang nani brisna baku, kan wan Gâdka bara wan Sasakra Jisas Kraist ba, kasakkira sa bamna.

² Yamnika manis pali bara kupia kumi lâka wal man nani brima, Gâd bara wan Dawan Jisas Kraist wal ra kakaira bara tânka brisma ba tâka ba mita.

Kristian tânka nani ba

³ Gâd ai karnika ni dîa dîa wan rayaka ra nit ba sut wankan sa, bara mayunanka sin, yawan ra ai prana ni wan paiwan ba, bara ai warkka pranakira dauki ba uplika wal kakaira wan saki ba tâka mita.

⁴ Naha dukia nani tila bâk pramis nani sin wan munan, bara baha nani ba uya tara bara manakira pali sa; bamna baha sim pramiska nani bâk, sip kama Gâd tânka ba man nani briaia, bara brinka saura nani naha tasba ra tâski lâka bri balan ba wina swakwaia.

⁵ Baha mita, trai kaikaia sma kasakkam lukan lâka ra, daukankam pain ba pura prakaia daukanka pain ra tânka briaia lâka;

⁶ tânka briaia lâka ra, wan wîna alki takaski ba, wînam alki takaski briaia ra, wan kupia alki takaskanka; wan kupia alki takaskan ra, kasak kulkan lâka ba;

⁷ kasak kulkan lâka ra, pana pana muihkam nani wal latwan kaiks ba; bara pana pana latwan kaikaia ra, latwan lâka pali aihwa ba.

⁸ Man nani naha diara nani na brisma kaka, bara warkka daukisma kaka, rayakam ba bahki kabia apia, bara wan Dawan Jisas Kraist ba bahki pali kakaira takram kabia apia.

⁹ Sakuna ya baha diara nani âpu ba, sim blain kum baku sa, apia kaka, diara ai lama kat baman kaiki ba wal kumi sa; ai âuya tiwan sa, piua luan ra saurka daukan ba wina klin sakan ba.

¹⁰ Baha mita, muihki nani, Gâd bui mai paiwan bara bâk saki mai brin bamna, trai kaiks baha ba man nani kupiam ra yarka ai playa bri kaia; baku dauki kama kaka, man nani sip pali kauhma apia.

¹¹ Baku lika, wan Dawan Sasakra, Jisas Kraist ban kaia ra king aimaki ba pliska ra dimaia nani sut ba, man nani ra param sakan kabia.

¹² Bahamna, yang baha diara nani ba dukiara man nani kupiam krauki ban kamna, naha sut na pat tânka brisma bara nanara sin man nani kasak bapi buisma lan mai daukan bamna.

¹³ Bamna yang kasak lukisna, kau raya sna piua ra, yang warkki pali kabia naha na kupiam krauki kaia.

¹⁴ Kan wan Dawan Jisas Kraist mita aikan tânka briri sa, pat pali yang naha tasba na swimna.

¹⁵ Ban sakuna, dîa sip sna ba trai kaikamna daukaia, bara pruamna ningkara, man nani naha diara nani na tânka kupiam krauki kama.

Kraist prana kaikan nani ba

¹⁶ Bamna wan Dawan Jisas Kraist karnika bara witin kli balaia dukiara man nani ra mai smalkri ba lika, yang nani âiya wina sturi saki paski mai smalkras, kan Dawan ba tara sa tânka yang nani naikra pali ni kaikri.

¹⁷ Yang nani kaikri, Gâd Aisa mita pain kulkan lâka bara prana sin yan ba, bara Gâd bîla baikra baha pranakira ra aisan ba naku natka ra sa: “Naha sika yang luhpi laitwankira, witin ra bâk sakri ba.”

¹⁸ Bamna yang nani pali wali banhri baha bîla baikra kasbrika pura wina bal iwan ba, kan baha piua ra yang nani Dawan aikuki kapri il holikira ba purara.

¹⁹ Naha sika prapit nani mita smalkanka ba kau karna dauki ba. Man nani baha smalkanka ba uya pain walisma. Lamp kumi tihmu pliska kumi ra ingwi ba baku sa smalkanka ba, yu baiwka, titan slilmika ba kupiam nani ra dimi ingbia kat.

²⁰ Kuna naha diara na tâura âmya ra bri bas: Gâd dahra aisinka bîla nani ra âpu sa, upla bani yakan sip ba ai laikka kat ai tânka aiska param saki aisaia.

²¹ Kan prapit nani lika, aima kumi sin upla lâka kat ai kupia wina diara saki aisaras kan. Sakuna, witin nani lika upla nani kan, bara Spirit Holikira mita tâ bri kan ba mita, Gâd wina diara brih aisi kata.