2 Kronikas 9 - DAWAN BÎLA AISKA

Sabá kwinka Salaman kaikaia balan ba

¹ Sabá kwinka ba walan upla nani bui Salaman nina tara mayuni aisi kan ba, bara witin Jerusalem ra wan makabanka karna nani makabi walaia dukiara. Bara upla nani ai kan kir kutbi ai prana tara dauki Jerusalem ra balan, isint nani, gul bara walpa manakira nani ailal kiamil ra prahki bri balan. Witin Salaman ra balan ba ra, dîa dîa makabi walaia bri kata ba sut makabi walan, ai kupia ra bri kan ba sut sin win.

² Bara ai makabanka nani sut tânka ba, Salaman bui tânka klir munan. Diara âpu kan king bui tânka sip wiras kaia ba.

³ Salaman sins lâka bri ba Sabá kwinka baha kaikan, baku sin king watla mâkan ba kaikan,

⁴ tibil ra plun auhnikira nani pi kan ba, warkka daukra sâtka nani ba, prâka dimra painka nani ba, wain laiki kahbi nani prâka dimi ba, baha nani tempel ra nahki dimi ba sut kaiki, witin tâ iwan tara takan;

⁵ bara witin king ra win: “Kasak pali, yang tasbayi ra walri man daukisma ba, sins lâka brisma ba, bara baha ba kasak rait pali aisisa;

⁶ yang pali kasak lukras kapri, sakuna nahara balri na kat, yang kaikisni. Kasak aisaia sna kaka, sins lâka tara brisma ba, bakriki sin ai wiras kan, witin nani dîa ai win ba man pura luisma.

⁷ Mayam mairin nani ba lilia pali sa si, bara warkkam tatakra nani ba sin lilia ai dara walisa si, piua sut lamamra iwi sins lâka aisisma ba wali banhwi ba.

⁸ ¡Dawan Gâdkam ba yamni pali kabia, witin aitani lukan bara man lika Israel kingka iwaika ra iwaia mai mangkan ba! ¡Dawan lika piua bani Israel ra latwan kaikisa, bamna mai mangkan sa, witin nani ba asla kukaia lâ wapni bara kasak kat daukaia!”

⁹ Bara baha wina kwin ba gul 5 ton bahmuna, isint kîa pain nani, walpa manakira nani ba ailal pali king ra yan. Kau aima kumi sin baku isint ban ailal pali Israel ra brih waras kan, baha Sabá kwinka Salaman ra bri si yan ba baku.

¹⁰ Waitna nani Hiram bara Salaman wal wark taki nani ba, Ofir wina gul bri balan ba purkara, dus painkira nani, walpa manakira nani sin brih balan.

¹¹ Bara dus painkira nani ba brih, king mita Dawan tempelka barandika ba paskan, king watla ba sin, bara arp nani miusik pulaia dukia nani sin paskan. Juda tasbaya ra, baha sât dukia nani upla kau kaikras kan.

¹² Bara king Salaman sin, pana Sabá kwinka dîa makaban ba sut yaban, witin ra diara bri balan ba purkara pura praki yan. Baha wina kwin ba kli ai kuntrika ra wan ai uplika nani aikuki.

Salaman yuyaka bara prana ba

¹³ Mani bani Salaman gul bri kan ba 25 ton,

¹⁴ diara wauhi atki tauki uplika nani wina lal mana bri kan ba kau kulkras, baha purara sin Arabia kingka nani bara baha tasbaya wihtka tara nani ba wina sin, gul bara silbar Salaman ra bri bali kan ba sin kau kulkras.

¹⁵ King Salaman adar yan, gul slilki suldiar lama prakaika tara nani 200 paskaia, baha kumi bani ba gul 15 paun bri kan.

¹⁶ Witin sin win lama prakaika kau sirpi nani sin 300 paskbia, baha kumi bani ba gul 8 paun prais bri kan, baha sut ba king watla wala “Líbano Ilka” mâki ba baha watla ba bilara swin.

¹⁷ Witin adar yan king iwaika tara kum paskbia, elepant napa ni, bara win gul pali ni pura ba lalaubaia.

¹⁸ King iwaika bara ai mina taibi ulaika 6 daukan, ai mina kahbaika ba sin daukan, bara klahkla wâl paskan, bahara ai mihta kahbaia, bara layan lilka sin wâl paskan baha tnaya bani ra bûi kan.

¹⁹ Bara ai mina taibi ulaika ba tnaya ra, layan lilka 12 paski bapan bûi kan. ¡King nani aimakan ba kumi sin kau nahmuna yaban paskras kan!

²⁰ Baha purkara kâp nani Salaman bri kan ba sut gul ni paskan kan, plun mangki piaia watlika ba, kuk takaia watlika nani sut sin gul ni paskan; baha purkara king watla nina “Líbano Ilka” mâki ba bahara diara nani sut ba sin gul ni daukan kata. Bahara silbar ni paskan dukia kumi sin âpu kata, kan Salaman piua ra silbar ba kulkanka âpu kata,

²¹ kan king duri tara nani bri kan ba Hiram uplika nani bahara wark taki, Tarsis ra impaki kan; witin nani mani yumhpa bani aima kum, gul, silbar, elepant napa, ruskika bara pikak nani sin bri sal yabi kan.

²² Bara baku, king Salaman ba kau tara taki kan, king wala nani sut ba purkara, yuyaka mapa ra bara sins lâka mapa ra sin.

²³ Bamna king nani sut plis wala ra nani kan ba witin ra kaikaia bara walaia brin dauki kan, Gâd wina witin ra sins lâka yaban ba.

²⁴ Bara witin nani sut wina mani bani silbar, prâk nani, aiklabaia dukia nani, diara kîa pain nani, aras nani bara muyul nani ai prisantka bri si yabi kan.

Salaman bui wagin nani bara aras nani ba atki kan

²⁵ Salaman ba aras nani watla 4,000 bri kan, ai araska bara wagin nani ba dingki swiaia pliska. Aras âiulra waitnika nani sin 12,000 bri kan, baha nani sut ba suldiar nani watla ra, baku sin Jerusalem ra king diara nani bri ba tilara bri sal main kaiki kan.

²⁶ King tasbaya nani sut bâra kan ba, Éufrates awala wina, filisteo nani kuntrika kat, Idsip tasbaya piarkika sut purara Salaman ba king kan.

²⁷ Bara witin Jerusalem ra silbar ba walpa baku yan pâwan kata, bara sin yalam dusa ba sin ailal, kwah damni dusa twi ra pâwi baku.

²⁸ Salaman araska nani ba, Musri wina baku sin kuntri wala nani wina brih balan kata.

Salaman pruan ba

²⁹ Salaman dahra aisanka kau bâra ba, ai rayaka aiska sturka, baha ba lika prapit Natán wauhkataya ra ulban sa, Ahías, Siló wina dahra aisin ba, bahara sin ulban sa, prapit Iddo diara witin ra param marikan ba Jeroboam, Nabat luhpia waitna dahra kaiki aisin ba ra sin ulban sa.

³⁰ Salaman Jerusalem ra Israel luhpia nani kingka 40 mani aimakan,

³¹ bara witin pruan ba ra ai aisika Debit Tawanka ra bri si bikan. Bara witin watlika ra ai luhpia Roboam king aimakan.