2 Kronikas 7 - DAWAN BÎLA AISKA

¹ Salaman ai pura sunra tnata alkan ba ra, pauta klauhan kasbrika purara wina bal iwan, sakripaiska ba ami âpu takan, bara Dawan prana ba utla ba banhki takan.

² Bara prîs nani sip Dawan watla ra dimras kata, kan Dawan prana ni Dawan watla ba banhwan kata bamna.

³ Israel luhpia nani sut, pauta klauhan bal iwan ba kaikan bara Gâd prana ba sin kaikan, Gâd watla purara bal iwan ba kaikan, ningkara witin nani sut ai lal makupan tasba kangbaia baila ai mawan nani ba, bara Dawan ra ai pura suni banhwan naku aisi: “Witin ba yamni sa, bara ai kupia latwanka lâka ba ban kaia ra ban sa.”

⁴ Naha ningkara, king bara upla nani sut sin sakripais daukan Dawan mawanra.

⁵ Bara king Salaman bui bîp wainhka 22,000 bara sîp 120,000 sakripais daukan. Bara baku Dawan watla ba king upla nani ba aikuki Dawan mihta ra mangkan.

⁶ Bara prîs nani ai warkka ban daukata, bara Libait nani sin, Dawan mayunaia miusikka nani wal, king ulbanka ba lawana ba wal, bara lawana ba naku aisi aiwani kata: “Kan ai latwanka lâka ba ban kaia ra ban sa”, Debit ba witin nani tilara aiwani kan piua ra. Baku sin prîs nani trumpit puhban witin nani mawanra, bara Israel luhpia nani sut ai mina ra bûi kata.

⁷ Baku sin tempel watla ra upla nani bara aidrubaia pliska ba ra pîska kum ba sin Salaman mita Dawan mihta ra mangkan, baha ra sakripais daukaia, baha sakripais batanka ba wal kupia kumi lâka daukaia dukiara, kan baha altarka Salaman bras ni paskan ba ra sip alkras kan aiska angkaia sakripaiska nani ba daukaia.

⁸ Baha piua ra, Salaman bara Israel luhpia nani sut aikuki Utla Papakni liliaka ba dauki kan, bara witin lika Israel ailal ba aikuki daknika ba tara kan Hamat dimaika ba wina, Idsip awalka ba kat balan.

⁹ Yapra wala ba asla takan liliaka painkira yu 7 daukan, altar ba Dawan mihta ra mangkan, bara kli yu 7 ba Utla Papakni liliaka ba daukan.

¹⁰ Kati 7 yua 23 ba kat uplika nani kli watla ra blikan, bara witin nani ai kupia liliakira Dawan ai kupia yamnika lâka Debit wal Salaman wal sin daukan ba dukiara, baku sin ai uplika Israel wal sin daukan ba liliaka ra.

Salaman wal Gâd lâ kum daukisa

¹¹ Baku bamna, Salaman bui Dawan watla ba aiska pain paskan, king watla ba bara diara sut baha nani bilara paskaia lukan ba,

¹² bara Dawan tihmia ra Salaman ra latan takan, bara win: “Yang puram sunra ba walri, bara yang naha pliska ba bâk sakri, sakripais daukaia watla.

¹³ Yang kasbrika ba prakamna kaka, lî auhaia apia daukamna, bara tristrisia nani blikamna tasba na sauhkaia, bara siknis sâtka blikamna naha uplika nani ra,

¹⁴ upliki nani ba yang ra bawbia kaka, yang nini ra ai pura sunbia, bara yang maiwan plikbia kaka, bara ai yabalka saura nani ba wina ai kupia lakbia kaka, yang kasbrika pura wina walamni, ai saurka nani ba swih tikamna, bara ai tasbaya ba kli pain daukamna.

¹⁵ Nanara wina ai tâura, pura sunra nani naha pliska wina sunbia ba yang kiaima pri tniki walamna,

¹⁶ kan naiwa wina bâk saki briri, bara naha watla ba holikira sa, nini ba ban kaia ra bâra kabia, bara naikra nani bara kupi sin bâra kabia ban kaia ra.

¹⁷ Bara man ba yang maiwanra aisikam Debit wapi kata baku wapma kaka, bara dîa dîa yang mai wimna ba daukma kaka, bara lâika nani ulbanka ba sin bîla walma kaka,

¹⁸ yang kingkam iwaika lâka ba karna daukamni, aisikam Debit wal daukri baku, witin ra wîri kata ba waitna wala âpu kabia Israel ra king aimakaia.

¹⁹ Sakuna man nani ba yang yabalki wina laihura taki ai kulkras, lâika kat daukras kama kaka, gâd bahki nani dukia dauki bara mayunma kaka,

²⁰ yang naha tasbaya maikri na wina mai sakamni, bara naha watla holikira daukram ba wina sin, yang maiwan wina lulki mai sakamni, bara nisan sut ba lamwaska kiki kabia.

²¹ Bara naha tempelka pranakira pali na, slingbi pura paski swin kabia, bara naha lamak lubia uplika bani ba wibia dîa kan Dawan ba naha tawanka bara watla wal baku daukan.

²² Bara witin nani pana aisi wibia, witin nani ai aisika nani Dawan Gâdka Idsip tasbaya wina witin nani sakan ba lulki swin ba mita, bara upla wala gâdka bahki nani ra tawan bara mayunan ba tâwan sin; baha mita naha saurka lâka sut na witin nani purara bri balan.”