2 Kronikas 21 - DAWAN BÎLA AISKA

Joram kingka lâka

¹ Josafat pruan ba ra, ai damika Debit Tawanka ra bikan. Ningkara ai luhpia waitna Joram ba king aimakan.

² Joram muihnika nani, Josafat luhpia nani ba naha nani kata: Azarías, Jehiel, Sakaraya, Micael bara Sefatías. Witin nani sut Josafat Juda king ba luhpia nani kan.

³ Aisika mita prisant ailal witin nani ra yaban gul bara silbar ni paskan, bara diara wala nani mana tara ba. Juda ra tawan tara karna nani ba sin yaban, sakuna king tasbaya lâka ba lika Joram ra yaban, ai luhpia almukka kan bamna.

⁴ Sakuna Joram king aimakan ba ra, ai lâka ba karna daukan, ai muihni nani sut ikan skiru ni bara Israel wihtka nani sin ikan.

⁵ Witin 32 mani bri kan king aimakan taim, bara Jerusalem ra 8 mani king aimakan.

⁶ Sakuna Israel kingka nani nina blikan, bara Ahab kiamka nani yabalka ra sin wapata, kan ai maya mairin ba lika Ahab kiamka kan bamna; baha mita ai daukanka ba saura kata Dawan nakra ra.

⁷ Sakuna Dawan bui witin ra sauhki tikras kata, kan Debit kiamka wal lâ kum daukan, bara baha pramiska ba ai luhpia nani ra ingni kum kabia, lamp ami ba baku.

⁸ Joram king aimaki kan ba piua ra, Edom mita klauna mapara buan, bara ai tilara ai kingka mangkan.

⁹ Joram bara suldiar kiaptinka nani aikuki, war aiklabaia waginka nani sut bri tihmia buan, bara Edom uplika nani witin nani ra kutbi bri kan ba mapara aiklaban.

¹⁰ Sakuna Edom ba Juda wina dakwi takan, Libná sin, bara baha piua wina naiwa kat ban sa, kan Joram ba ai almukka nani Dawanka wina tnaya ra takan kan bamna.

¹¹ Witin sin aidul nani ra mayunaia pliska nani paskan Juda untika nani tilara, bara witin bui munan Jerusalem uplika nani Dawan wina laihura takan bara Juda ai yabalka wina tnaya ra tawan.

¹² Baha piua Joram ba prapit Ilayas wina wauhtaya kum brin, bara bahara naku ulban kan: “Dawan Gâd, man damikam Gâdka ba, naku mai wisa: ‘Man aisikam Josafat yabalka ra wapras sma, damikam Asá, Juda kingka yabalka ra sin apia.

¹³ Man bui Israel kingka nani nina blikram bara sin man puramra sa Juda bara Jerusalem uplika nani Dawan wina tnaya ra tawan ba, Ahab kiamka nani daukan ba baku. Baman sin apia, sakuna muihkam nani sin ikram, man wal baha nani ba kau yamni kan.

¹⁴ Naha mita, Dawan bui man uplikam nani purara blikisa pât saura pali, luhpiam nani ra, mairkam nani bara man diara brisma ba sut purara.

¹⁵ Bara man puramra balbia siknis sâtka ailal, klungkam sikniska karna nani, man biamra sirpika nani sut dakwi yakawbia ba kat.’ ”

¹⁶ Bamna Dawan bui daukan filisteo nani bara Arabia wina nani, Cus lamara iwi kan ba, ai kupia sauhki Joram mapara balan,

¹⁷ bara Juda tawanka aiska ba kutban, bara king watla ra diara pain nani bâra kan ba sut kwahki brih wan, baku sin ai luhpia nani, ai mairka nani sin sut alki brih wan. Sakuna Joacaz tukta sirpika ba baman swakwan.

¹⁸ Baha ningkara Dawan ba siknis kum yaban klungka ra, rawaikas bara baha wal pât wahwi kan.

¹⁹ Piu nani lui kan ba ra, mani wâl alkan kat, ai biara nani yakawan bara latwan wahwi si pruan. Ai tawanka uplika witin ra luki, pauta sin mukras kan, ai damika nani wal dauki banhwi kata ba baku.

²⁰ Bara king lâka ra iwan taim mani 32 bri kan, bara Jerusalem ra lika 8 mani king aimakan. Witin pruan ba ra, upla kum sin ai sarka briras kan. Debit Tawanka ra bikan, sakuna king nani raitika ra lika bikras kata.