2 Kronikas 18 - DAWAN BÎLA AISKA

Micaías maisa pakisa Ahab ra pura lubia apia

¹ Josafat ai yuyaka ailal pali bara pain kulkan lâka sin tara brin, bara Ahab wal sin ai dapna takan.

² Mani nani kum kum luan ningkara, Josafat Sameria ra wan Ahab kaikaia; bara witin Josafat balan ba liliaka daukaia bara aikuki tauki nani ba ra sin, witin sîp nani ailal ikan bara bîp nani sin; baku dauki sin kasak pali maisa paki kata, war daukbia Ramot ra Galaad mapara.

³ Bara rait pali, Ahab, Israel kingka ba, Josafat, Juda kingka ra makabi walan: —¿Brinkam sa ki yang wal waia Ramot Galaad tasbaya mapara aiklabaia? Josafat pana win: —Yang, bara suldiarki nani sut kira wamna, bara man uplikam nani aikuki sin.

⁴ Sakuna kau kainara, Dawan kupia lâka pliki wals.

⁵ Bara Israel kingka mita prapit nani 400 asla dauki, witin nani ra makabi walan: —¿Ramot Galaad tasbaya ba mapara war aiklabaia wamna, apia kaka wamna apia ki? Bara prapit nani ba win: —Was bara aiklas, Gâd bui king lâka ba man mihtam ra mangkbia bamna.

⁶ Bara Josafat mita win: —¿Naha tani ra nâra sa ki Dawan prapitka wala kum, yawan bui witin ra aima wala kum makabi walaia?

⁷ Bara Israel kingka ba mita pana Josafat ra win: —Waitna kumi nâra sa, yawan sip sa witin bâk Dawan ra aisaia. Witin sika Micaías, Imlá luhpia ba. Sakuna yang mita baha kulkras, kan aima kumi sin diara yamni dahra aisi ai wiras sa, sakuna saura baman. Bara Josafat mita win: —Baku man aisapara.

⁸ Baha ningkara, Israel kingka mita ai wihtka kum ra adar yaban: —¡Pat pali, Micaías Imlá luhpia ba wih bri bal!

⁹ Bamna Israel kingka Josafat bara Juda kingka ba wal, ai iwaika ra iwi kan, war aiklabaia prâka dimi, aidrubanka daukaia Sameria ra dimaia getka lamara, bara prapit nani sut witin nani mawanra dahra aisi banhwi kata.

¹⁰ Bara Sedequías, Quenaaná luhpia ba, ayan ni bîp aringka nani daukan bri kan, bara naku winan: “Dawan naku wisa: ‘¡Naha aringka nani wal Siria uplika nani sut ba mangki âpu pali daukma!’ ”

¹¹ Bara prapit nani sut ba baku baman ai dahra aisi, win: “Ramot, Galaad tasbaya ra uli was, bara pura luma, kan Dawan mita tawanka ba mihtam ra mangkbia.”

¹² Micaías mata blikan uplika ba, witin ra aisi, naku win: —Kaiks, prapit nani sut ba bîla yamni baman king ra aisisa, baku bamna man sin baha nani wal baku bîla yamni nani aisama, bara man maisa pakma pura lubia ba dukiara.

¹³ Bara Micaías pana win: —¡Dawan nina mâki swer takisna, Gâd bui dîa ai wibia ba baha aisamna!

¹⁴ Bara witin king ra balan, bara king makabi walan: —Micaías, ¿yang nani Ramot Galaad tasbaya mapara aiklabaia wamna, apia kaka ban swi banhwamna ki? Bara Micaías win: —Was bara pura luma, bara Dawan bui tawanka ba mihtam ra mangkbia.

¹⁵ Bara king bui win: —¿Aima an kat taibi mai munrika, Dawan nina ra diara kasak ba ai wima ki?

¹⁶ Bara Micaías bila: “Yang bui Israel luhpia nani sut ra kaikri, yakaban kan il nani ra, sim sîp nani ai sepadka âpu baku. Bara Dawan bila: ‘Naha nani ai dawanka âpu; kumi bani kli wamtla nani ra was kupiam kumi.’ ”

¹⁷ Bara Israel kingka bui Josafat ra win: —¿Yang bui man ra mai wiras katna ki witin bui yang ra diara yamni kumi sin dahra aisi ai wiras, sakuna saura baman ai wisa?

¹⁸ Bara Micaías kau aisin: —Baku aisaram ba mita, man nani lika Dawan bîla na wals: Yang kaikri Dawan ba ai king iwaika ra iwi kan, bara kasbrika ra insal nani sut ba lika witin ai tnaya kir bûi banhwi kata, ai mihta aihkika tani bara ai mihta smihka tani ra sin.

¹⁹ Bara Dawan makabi walan ya bui Israel kingka Ahab ra munka Ramot Galaad tasbaya ra uli wih bahara pruaia. Bara kum kum ba diara kum aisi kan, wala nani ba diara wala aisi kan.

²⁰ Bara spirit kum taki Dawan mawanra bûi, win witin mita baha ba daukaisa. Bara Dawan ba makabi walan baha ba nahki daukaia,

²¹ bara witin mita win spirit kunin kum king prapitka nani ra yarka aisabia. Bara Dawan win baha pain sa, bara witin wih ki kunin munbia, bara baku daukbia.

²² Bara nanara pat nu sma Dawan mita man damra aisasara nani tilara spirit kunin aisaia mangkan sa, bara Dawan ba wilin pali takan sa man puramra pât saura brih balaia.

²³ Bamna Sedequías, Quenaaná luhpia ba, Micaías lamara bal mawan ra pruki, naku win: —¿Dawan spiritka ba yang wina taki anik wata ki, baku man ra aisaia?

²⁴ Bara Micaías mita pana win: —Baha man kaikma, ani yua utla kumi wina utla wala ra yukuwi tauki kama ba ra.

²⁵ Bamna Israel kingka ba mita adar yaban: —¡Micaías ba alks, bara naha tawanka wihtka Amón ra bri si yas, bara yang luhpia Joás ba sin!

²⁶ Witin nani ra wis, yang adar yabisni waitnika ba silak ra mangki bri kabia, plun uya yabia apia, brit lî wal baman, yang pruras kli tawi balamna ba kat.

²⁷ Micaías kau ban aisin: “Man pruras raya kli balma kaka, Dawan ba yang bâk aisaras kan.”

²⁸ Baku bamna, Israel bara Juda kingka wihki Josafat kira, Ramot Galaad tasbaya mapara wan.

²⁹ Bara Israel kingka bui Josafat ra win: —Yang lika war aiklabaia prâka ba dimras aiklabaisna, sakuna man lika yang prâika na dimi aiklas. Bara Israel kingka ba, baku kwalka dimi war aiklaban.

³⁰ Ban sakuna, Siria kingka ai war waginka aiklaklabra lalka nani ra adar yabi win aiklabia apia lalka tara nani mapara, bara sirpi nani ba mapara sin apia, sakuna Israel kingka ba mapara baman aiklabia.

³¹ Bara war waginka lalka nani bui Josafat ba kaikan ba ra, lukan kasak pali baha sika Israel kingka, bara kutbi brin witin mapara aidrubi wih aiklabaia dukiara. Bamna Josafat ai pura winan hilp makabi, bara Dawan bui tâ baikan. Gâd bui baha nani ba ai tnaya wina sakan,

³² kan war wagin lalka nani bui kaikan baha ba Israel kingka apia kan, bara witin nani bui witin ba mahka swih tnaya ra tawan.

³³ Bamna suldiar kumi ai pantamangka ba ban lulkan, bara Israel kingka Ahab war kwalka dimi kan ba lilapas bâk diman. Baku ba ra, ai war wagin uli kan waitnika ra win: —War wagin mawan ba wilbi laki mahka ai brih was; ai sâks pat muni naha aiklabanka na wina, kasak pali ai insauhkan sa bamna.

³⁴ Baha yua war ba kau karna taki kan, bara king ba ban ai waginka bilara kan iwras, Siria uplika nani pana pana mawan kat bûi kan. Sakuna tala uya taki kan, bara tutni kat mahka pruan.