2 Kronikas 16 - DAWAN BÎLA AISKA

Ben-hadad wal Asá asla takan ba

¹ Sakuna 36 mani alkan ba kat Baasá Israel kingka ba Asá Juda kingka ba mapara balan aiklabaia, bara Ramá ba karna daukan, baku mika Juda kingka Asá ra dimi waia bal takaia yabalka ba sut prakan.

² Bara Dawan tempelka ra king watla ra gul bara silbar nani kukan ba, Asá bal baha nani sut sakan, bara dukia nani ba Ben-hadad, Siria kingka ra blikan, witin Damaskus ra iwi kan. Bara king ra naha bîla sin blikan:

³ “Yawan wal lâ kum daukpi, papikam papiki wal kan ba baku. Kaiks yang gul bara silbar mai blikisni prisantki. Israel kingka Baasá wal lâ daukram ba mahka swis, baku mika witin kupia kumi ai swibia.”

⁴ Ben-hadad aisi kaikan ba ningkara wilin takan king Asá win ba daukaia, bara war tâ brabrira nani lalka blikan Israel tawanka nani ra war daukaia, baku Iión pura lui win takan, Dan, Abel-maim bara tawan wala nani Neftalí tawanka nani kan ba sut sin.

⁵ Bara Baasá ai dara walan piua ra, Ramá kaina suni kan ba swin, bara ai warkka nani sut sin.

⁶ Bara king Asá, witin wal Juda aiska, Ramá ra wan, walpa bara tat nani Baasá tawanka kaina sunaia swin kan ba brih wan, baha wal Guebá bara Mispá kaina sunan.

⁷ Baha piua nani ra prapit Hananí bâra kata, bara witin king Asá ra wan kaikaia, witinka Juda kingka ba, bara wiaia: “Siria kingka ba suldiarkam nani mihta wina swakwi wan, kan man Siria kingka ra tniwram bamna, sakuna Dawan Gâd ra lika tniwras kapram.

⁸ ¿Etiopía uplika nani bara Libia uplika nani suldiar ailal pali bri kan, kasak karna pali kan, aras wina uli aiklabi uya pali, war waginka nani sin bri kan apia? Ban sakuna, Dawan mita mihtam ra mangkan, man bui witin ra tniwram bamna.

⁹ Kan Dawan kasak pali kaikisa naha tasba ra dîa taki nani ba, bara sin witin ra bîla kaikanka bri nani ra, tâ baikisa ai kupia aiska ni. Naha kat man saura daukram sinskas baku, baha mita naiwa wina ai kainara war kau karna brima.”

¹⁰ Bara Asá ba ai kupia sauhkan bara prapit ra silak mangkan, bara baha piua ra sin tawan uplika kum kum ra sin saura munan.

Asá pruanka

¹¹ Asá sturka tâ wina tnata kat ba ulban sa king nani wauhkataya ra Juda ra bara Israel ra sin.

¹² Asá 39 mani king kan, bara baha manka ba mina ra siknis saura pali alkan, sakuna witin Dawan plikras, daktar nani ra baman wan.

¹³ Bara witin 41 mani king kan, baha manka ra pruan,

¹⁴ sakuna ai raitika ba Debit Tawanka ra witin mita pat paskan kan ba ra biki banhwan. Bamna witin nani bui witin ba krikri kum ra mangki, kîa pain daukaia dukia nani ailal sâtka bani brih, wîna ba sîka pain daukan. Ningkara pauta tara muki pura mata ini pain kulkan lâka ba yabi bri kan.