2 Kronikas 1 - DAWAN BÎLA AISKA

Salaman bui Gâd ra sins lâka makabisa

¹ Salaman, Debit luhpia ba, Dawan wina tâ baikanka brin, witin ai kingka lâka ba karna bri kaia dukiara, bara ai karnika ba tara pali takan kata.

² Bara Salaman bui Israel luhpia nani sut paiwan: suldiar lalka nani, wihta kau kulkanka bri nani ba bara pamali lalka nani Israel aiska ra wark kum tâura nani ba.

³ Salaman ba upla nani asla takan ba sut aikuki, pura sunaia watla Gabaón ra kan ba ra wan, baha pliska ba ra kan Dawan wal aisaia tintka watla ba, baha sika Moses Gâd albika bui paskan kata upla iwras tasbaya ra.

⁴ Ban sakuna, Gâd lâka auhbaia watla ba lika Debit mita tintka watla mâki baha bilara bri si swin kan Jerusalem ra, witin baha ba Quiriat-jearim wina bri balan kata ba.

⁵ Besalel, Urí luhpia bara Hur mulika ba, bras altarka paskan kan ba sin Gabaón ra kan Dawan tintka watla dimaika ra, bahara Salaman upla nani aikuki wih diman Dawan wal aisaia.

⁶ Baha bras altarka Dawan mawanra ba ra Salaman uli wan, upla nani Dawan wal aisaia tintka watla ba mawanra, baha altarka ba purara daiwan aiska angki 1,000 sakripais daukan.

⁷ Bara baha tihmika Dawan Salaman ra latan takan bara naku aisi, win: “Man dîa brin mai dauki ba makas, bara yang bui man ra maikamna.”

⁸ Salaman pana Dawan ra win: “Man bui yang aisiki Debit ra umpira kaikisma lâka ba tara marikram, bara man bui yang aisiki watlika ra king ai mangkram.

⁹ Bamna nanara, Dawan Gâd, man bui aisiki Debit ra aisaram ba baku yang ra dauks, kan man bui sika yang ra upla ailal auhya mâ baku kan tilara king ai mangkram bamna.

¹⁰ Baku bamna, nanara sins lâka aik bara diara tânka briaia ba sin, bara baku yang sip kamna naha uplika nani tâ briaia, ¿kan man uplikam ailal pali na ya mita wihtka aimaki kabia?”

¹¹ Dawan pana Salaman ra win: “Yang upliki nani kingka mai mangkri bara baha ba kupiam lukra brinkam sa, man yuyakira takaia makabras sma, pramna tara briaia sin apia, mai kulkanka tara maikbia makabras sma, waihlam nani ikaia sin makabras sma, man mani ailal tasba ra raya kaia sin makabras sma, ban sakuna sins lâka bara diara tânka briaia baman makabisma yang upliki nani na tâura aimaki tâ brih impakaia dukiara;

¹² maikisni sins lâka bara diara tânka kaikaia sinska nani; baha purkara yuya ailal maikamni, diara wala nani sin ailal, prana aiska ba sin bara kulkanka lâka sin, man kainamra king nani bâra kan ba sin briras kan ba, man ninamra aula nani ba sin bribia apia.”

¹³ Ningkara Salaman kli tawi wan Jerusalem ra, tint watla upla nani Dawan wal aisaia tintka watla Gabaón ra kan ba wina bara Israel ra king aimakan.

Salaman ba wagin bara aras nani atki kan

¹⁴ Bara Salaman wagin nani bara aras âiulra nani ba sut asla daukan, bara war waginka nani ba 1,400 bri kan aras âiulra nani ba lika 12,000. Baha nani sut ba suldiar aiklaklabra nani watla Jerusalem ra swin.

¹⁵ King ba baha daukan ba mita Jerusalem ra silbar bara gul ailal pali takan kata, sim walpa ailalka ba baku, yalam dusa nani sin ailal pâwan, kwah dusa nani sin ailal unta langni ra pâwi ba baku kata.

¹⁶ Aras nani ba Salaman dukiara Musri bara Cilicia wina brih wan, bara king suliarka nani ba atki brin.

¹⁷ Wagin kum Idsip wina atki brih balan ba silbar mâ 600 mana atki kan, bara aras kum ba lika 150. Bara hitita kingka nani bara Siria kingka nani sut ba bal, Salaman uplika nani diara atki kan ba wina atki bri kan.