2 Korint 5 - DAWAN BÎLA AISKA

¹ Bamna yawan kaikisa, wan wîna tara na utla kum baku sip ban apia ba mita, sauhki tikan kabia; kuna Gâd mita wan watla ban kaia kasbrika purara ridi daukan sa, bara baha lika upla mita ai mihta ni daukras sa.

² Kasak pali, yawan wan wîna tara mapa ra kau raya ba ra, wan mamna sin lulkisa, bara wan watla kasbrika purara ba ra mahka brin wan daukisa wih dimaia;

³ baha ba prâk baku wan dingkan kabia, prâk âpu wan taya baman ba baku kaia apia ba mata.

⁴ Yawan lika naha tintka ra iwi na piua ra, wan mamna lulkisa bara sari sin wan daukisa. Wan wîna tara almuk na wina prâk baku daiki sâkbia lika wiras, kuna brin wan daukisa, wîna tara raya ba ni wan dingkan kabia, baha mita naha wîna tara pruikira na, raya ba mita âpu daukan kabia dukiara.

⁵ Bamna Gâd mita naha pali dukiara sika ridi wan daukan ba, bara baha mita witin Spirit Holikira ba wankan, diara naika briaia ba tukinka wisi.

⁶ Bahamna, piua bani ban baha kat, yang nani kupi mangki lukisna. Yawan kaikisa, wan wîna tara ra kau raya iwi ba piua ra, utla ba wina laihura banhwisa, wiaia kaka, yawan ba Dawan wal sin asla apia sa;

⁷ bamna yang nani lika kasak lukan lâka mita taukisna, wan nakra ni kaiki ba mita lika apia.

⁸ Wan kupia ra aitani kat mangki luki banhwisa, bara kau ni brin wan daukisa, naha wîna tara lâka ra iwisna na mahka swi si, Dawan lamara wih iwaia.

⁹ Baha mita piua bani Dawan dîa want ba kat daukaia trai muni banhwisna, wan wîna tara kau raya na piua ra sapa, wan wîna tara wina laihura kabia kra sin.

¹⁰ Kan yawan kumi bani Kraist lâ iwaika mawanra bubia sa, bahara kat upla bani ai mana dîa kabia ba briaia dukiara, mana yamni, apia kaka mana saura, witin ai wîna ra raya kan piua daukan ba tânka kat.

Kupia kumi lâka smalkanka ba

¹¹ Yawan tânka brisa Dawan ra kulkaia ba dîa, baha mita yawan bui upla nani kupia lakaia trai kaikisa. Gâd lika pat yang nani tâinka pain kaikisa, baku bamna brin wan daukisa man nani mita sin baku wan kaiki kama.

¹² Kli yang nani painki dukiara lika aisaras, sakuna brin wan daukisa man nani mita piua brima yang nani dukira âmyapah takaia, baku mika sip kama baha nani upla mawan kulkanka bri sakuna kupia lukra lika kulkras si aimayuni nani ba mapara aisaia.

¹³ Bamna yang nani na tanis atia sna kaka, baha lika Gâd dukiara ba mita; bara tanis apia banhwisna kaka, baha lika man nani dukiamra.

¹⁴ Kraist latwanka lâka ba mita yawan ra lâ wankisa, kumi ba upla sut pura mata pruan baha yang nani tânka briri ba wina, yang nani sin pat kaikisna upla sut lika pruan sa.

¹⁵ Kraist upla sut tâwan pruan, baha mita raya nani ba ai wîna dukiara raya kaia apia sa; sakuna witinka, witin nani ai dukiara pruan bara kli sin raya buan ba dukiara mika raya kabia.

¹⁶ Baha mita, yang nani kum dukiara sin tasba uplika nani luki ba baku kli lukras: Kraist dukiara sin kanra yang nani tasba uplika nani luki ba baku luki kapri; sakuna nanara yang nani witin dukiara kli baku lukras.

¹⁷ Baku bamna, ya Kraist wal asla takan sa kaka, witin lika upla raya kumi sa; diara almuk nani ba lui wan sa, bara nanara diara raya baman takan sa.

¹⁸ Naha diara sut na Gâd mita daukisa, witin mita Kraist bâk witin wal kupia kumi wan daukan ba, bara adar wankan sa upla sut ba yang nani mita witin wal kupia kumi daukaia.

¹⁹ Baha tânka ba lika, Gâd lika Kraist bâk tasba ra iwi uplika nani ba witin wal kupia kumi daukuya, upla nani saurka ba kulkras pali; bara yang nani ra adar aikan sa naha kupia kumi lâka na tânka smalkaia.

²⁰ Baha mita yang nani ra Kraist ai blikan sturi yamni smasmalkra nani, baha lika Gâd bui man nani ra yang nani bâk mamkabisa. Bahamna, yang nani Kraist nina ra man nani ra mamkabisna, mahka Gâd wal kupia kumi takma.

²¹ Kraist lika saurka kumi sin daukras pali kan, kuna yawan tâwan Gâd mita, witin ba saura dadaukra kum baku kulkan; baku mika yawan Kraist wal asla taki, wan rayaka ba Gâd want ba kat wapni bri kabia dukiara.