2 Jan 1 - DAWAN BÎLA AISKA

Lakula bîla

¹ Yang, serts almukka sna ba, Gâd mita bâk ai sakan; bara wan kristian daknika bâk sakan uplika nani sut ra laikula blikisna. Witin nani ra kasak pali latwan kaikisni, bara yang baman apia, kuna diara kasak tânka ba kakaira takan nani sut mita sin.

² Diara kasak pali wan kupia ra bri ba mita, yang bui man nani ra latwan mai kaikisni, bara baha dukia kasak pali ba sin, ban wan kupia ra kabia.

³ Gâd Aisa bara ai Luhpia Jisas Kraist mita yamni mai munbia bara umpira mai kaikbia, kupia kumi lâka ba maikbia, diara kasak pali ba tânka ra bara latwan lâka ra sin.

⁴ Yang uya lilia pali takri, kan man luhpiam tila nani kaikri ba ra, witin nani lika kasak tânka kat ban iwisa; Gâd Aisa dîa adarka wankan ba tânka kat.

⁵ Bara nanara, laikra, mamkabisna yawan pana pana wan walka ra latwan kaikaia. Naha man ra ulbisna na, lâ raya lika apia sa, kuna baha sim lâka yawan tâ pali ra bri kata ba sika.

⁶ Latwan lâka tânka ba sika naha: Gâd lâka nani ra dîa wi ba kat iwi kaia; bamna tâ pali piua ra baha lâka ba dukiara pat walram baku, man nani latwan lâka ra iwi kama.

Kunin mamunra nani ba

⁷ Kuninkira ailal naha tasba ra wataukisa, bara witin nani lika Jisas Kraist upla kasakkira naha tasba ra balan ba tânka param pali aisin ba bîla wali daukras sa. Ya baha baku ba sika kuninkira, bara Kraist mapara ba.

⁸ Man nani aman pali kaiki bas, baku lika warkkam mana tikma apia, sakuna mamna aiska pali ba brima.

⁹ Ani uplika Kraist smalkanka ba swi si ai kupia lâka kat ban tauki ba, witin lika Gâd luha pali sa; kuna ani uplika Kraist smalkanka kat ba, witin lika Aisa ba brisa bara Luhpia ba sin.

¹⁰ Ani uplika naha smalkanka brih man nani ra balras sa kaka, wamtla ra dingki bripara, bara lakula sin wipara;

¹¹ kan ani uplika mita lakula wibia kaka, witin lika baha uplika saura dauki ba wal kumi takisa.

Prakaia lakula nani

¹² Yang diara manis brisni man nani ra mai wiaia, kuna brin ai daukras baha ba ulbi mai wiaia. Man nani ra waia lukisni, wînam pali kat baha sturka ba aisaia, bara baku mika wan liliaka ba aiska pali kabia.

¹³ Muihkam luhpia nani, witinka nani ra Gâd mita bâk saki brin nani ba mita sin, ai lakula nani mai blikisa.