1 Timoti 6 - DAWAN BÎLA AISKA

¹ Alba nani ba ai dawanka nani ra kasak kulkaia sa, bara baku upla kumi sin Gâd nina ra bara wan smalkanka ba mapara sin saura aisabia apia.

² Bara alba nani ba ai dawanka lalukra nani brisa kaka, baha nani ba kasak lukan lâka mapa ra ai muihni nani wisi, witin nani mita bahki kulkaia apia sa. Sakuna, witin nani warkka ba kau pain daukaia sa; kan baha nani ai warkka pain dauki ba wina hilp bri nani ba, lalukra nani sa bara ai muihni latwankira nani sin. Naha dukia nani na, man upla nani ra smalki, baha kat daukbia wiaia sma:

Yuyaka aihwa nani ba

³ Upla kumi kunin lâka smalkbia kaka, bara witin ba wan Dawan Jisas Kraist smalkanka yamni ba kat, bara Gâd ra luki kaia lâka wan smalki ba kat sin kasak kulkras kaka,

⁴ witin ba prautkira sa, bara diara tânka briras. Witin ba bîla nani dukiara baman aisi blahwaia sikniska alkisa; bara naha wina sika tuman lâka, unsaban nani, upla ra saura wiaia lâka, upla bara diara kumi ra sin sip kasak lukras kaia lâka taki ba;

⁵ upla nani sinska aihka takan ba tilara sin blahwan bahki nani baman takisa, bara witin nani ba kasak tânka ba kakaira apia sa. Witin nani lukisa, Gâd ra luki kaia lâka ba bâk yuyakira nani takaia sip sa.

⁶ Gâd ra luki kaia lâka ba mita upla ra yuyakira daukisa, sakuna uplika ba baha bri ba wal ai âuyapah sa kaka.

⁷ ¿Yawan na naha tasba ra dîa bri balan ki? Diara kumi sin bri balras. Bara, ¿tasba wina yawan dîa brih waia sip sa ki? Diara kumi sin sip brih waras.

⁸ Baku bamna, yawan na plun bara kwala sin brisa kaka, baha ba aitani sa wal lilia kaia.

⁹ Sakuna yuyakira takan dauki nani ba, traika kaikan ra kauhisa, bara brinka karna taniskira ailal alki priski brisa; baha nani sika upla nani ra saura muni ba, bara sauhki tikaia lâka ra bara tanis tiwaia lâka ra sin rungkisa.

¹⁰ Kan lalah ra latwan kaikaia ba sika saurka sât sât plamaika ba. Upla tila nani ba baha brin pali dauki tâka mita, kasak lukan lâka wina tnaya ra tawi banhwan sa, bara witin ai rayaka nani ba, pât nani taki banhwan sa.

Kasak lukan lâka aiklabanka yamni ba

¹¹ Sakuna man, Gâd uplika sma ba, naha dukia nani sut wina sîa bri plaps. Kasakka lâka ba nina blîks, Gâd ra luki kaia lâka ba, kasak lukan lâka, latwan lâka, ban bapi buaia lâka, bara wan kupia swapni bri kaia lâka ba sin.

¹² Kasak lukan lâka aiklabanka yamni ba aiklabi bas, bara raya ban kaia lâka ba man dukiam brima; kan baha dukiara sika Gâd mai paiwan ba, man ba kasak lukan lâka tânka yamni ba witnis ailal mawanra latan aisaram.

¹³ Nanara, Gâd mawanra, witinka diara nani sut ra rayaka yabi ba, bara Jisas Kraist mawanra, witinka sin ai lukanka tânka aisi witnis sin takan ba Pontius Pailat mawanra, yang bui mai smalki mai wisni,

¹⁴ Lâ bîla ba kat wali dauki bas, bara baha ba sauhkpara bara pât âpu sin alki bri bas, wan Dawan Jisas Kraist balbia ba kat.

¹⁵ Baha piua ba aimakbia ba ra, Gâd mita naha na daukbia, kan witin baman sika Gâd kumi baman ba, yamnikira bara karnikira, king nani Kingka, bara dawan nani Dawanka ba.

¹⁶ Witin baman sika sip pruras ba; witin ba upla sip lamara waras ingnika ra iwisa. Upla kumi sin kau witin ba kaikras sa bara sip sin kaikbia apia. ¡Prana ba bara karnika ba sin ban kaia ra, witin dukia kabia! Baku kabia.

¹⁷ Naha tasba ra yuya ailal bri nani ba ra smalki wis, witin nani kwalhwi kabiara, yuyaka nani kat kaiki ai kainara diara briaia sin luki banhbiara, baha nani ban lap tiwisa bamna. Sakuna, witin nani Gâd ra luki ai kainara diara briaia luki ban kan, witinka diara ailal wankisa, yawan lilia takbia dukiara.

¹⁸ Witin nani ra smalki wis, diara pain ba daukbia, bara wark yamni nani mapara yuyakira taki kabia, bara wilin kabia dîa bri nani ba upla wala nani aikuki yui briaia.

¹⁹ Baku lika witin nani ai kaina dukiara yuya nani suni bri kabia, sim walpa bapan kum baku. Bara witin nani sip kabia raya ban kaia bara kasakkira ba win takaia.

Timoti ra lâs smalkanka yaban ba

²⁰ Timoti, dîa mihtam ra mangkan ba pain main kaiks. Tasba lâka bîla nani, bahki baman ba, tanis bara sins lâka wi ba, sakuna kunin aisi ba, man bîla walpara.

²¹ Kan upla tila nani, nahmuna sinska lâka nina blikan ba sut, ai kasak lukan lâka yabalka ba tiki banhwan. Dawan mita ai yamnika man nani puramra laikbia.