1 Timoti 5 - DAWAN BÎLA AISKA

Lalukra nani wal nahki kaia ba

¹ Upla almuk ra lawi daukpara, sakuna witin ba aisikam ra baku smalki bas; wahma nani ba sin muihkam ra baku smalki bas.

² Kuka nani ra sin yaptikam ra baku kulki bas, bara tiara nani ra lamkra nani ra wal baku, sunu lâka aiska ni aisi bas.

³ Piarka nani yaura hilp plikaia âpu nani ra, man hilp muns.

⁴ Sakuna piarka kum luhpa nani, apia kaka ai mula nani brisa kaka, witin nani ba ai watla uplika nani ba kristian lâka bri kaia ba pas lan taki banhbia: ai taya nani ra bara ai aisika nani ra latwan lâka ba bri banhwi ba yabisa, kan naha na pain sa bara Gâd sin pain kaikisa.

⁵ Ani mairka kasak pali piarka ba, upla kumi mita sin main kaikaia âpu ba, witin lika ai kainara diara briaia ba, Gâd ra luki, bara witin ra ai hilpka yabia dukiara ban kakna bara tihmia ra ai pura suni makabi kaia sa.

⁶ Sakuna ani piarkika ai wîna brinka ra iwi nani ba, witin ba raya kabia kuna pat pruan baku sa.

⁷ Naha lâka nani na sin witin nani ra yas, bara baku mika upla kumi mita sin witin nani ra lawi daukbia apia.

⁸ Kan upla kum ai taika nani ra main kaikras sa kaka, bara kau pali ai watla uplika nani ra lukras sa kaka, witin ba kasak lukan lâka ba kulkras sa, bara kasak lukras uplika wal, witin ba kau saura sa.

⁹ Piarka nani wauhkataya ra mangkaia sa, baha nani mani 60 pura alkan ba baman, bara sin aima kumi baman marit takan sa kaka.

¹⁰ Witin nani diara yamni nani daukan ba mita, upla nani bui kakaira kaia sa: ai luhpia nani pain pakan kaka, ai watla ra upla nani wan ba aikuki pain kan kaka, kristian nani mina nani sikban kaka, trabil bri nani ra hilp munan sa, apia kaka wark yamni wala nani daukan sa kaka sin.

¹¹ Sakuna ani piarkika nani kau almuk takras ba, wauhkataya ba ra nina mangkpara; kan witin nani ba ai wîna brinka nani mita, Kraist wina dakbi saki bara kli marit takan dauki banhwisa;

¹² bara baku witin nani ba pâtkira nani sa, pas pramis Kraist ra daukan ba witin nani mita bahki kulkan bamna.

¹³ Witin nani sin upla watla ra kirhbi wih sturi bahki baman aisi ai taimka ba bahki ra baman tikaia lan takisa; sakuna kau saura pali, witin nani ba upla nina aisaia bara upla bisniska tilara dimaia lan taki banhwisa, bara diara aisaia apia nani ba baman aisi taukisa.

¹⁴ Baha mita, yang want sna piarka nani kau almuk takras ba, marit takbia bara luhpa baikbia, ai watla nani main kaiki kabia, bara baku mika witin nani mita wan waihla nani ra wan ninara saura aisaia sanska yabaia apia dukiara.

¹⁵ Kan piarka tila nani tnaya ra taki, Sitan nina blikan sa.

¹⁶ Bara lalukra mairin kum sapa, ai watla uplika tilara piarka nani bri kaka, witin nani ra hilp munaia sa, bara baku mika serts mita baha nani wirhika twilkbia apia; baku lika serts mita, piarka nani yaura hilp plikaia âpu nani ra hilp munbia.

¹⁷ Almuk nani serts tâ pain bri nani ba, witin nani ba aima wâl prais kulkan kabia, bara kau pali baha nani upla nani ra aisaia bara smalkaia warkka karna dauki nani ba.

¹⁸ Kan Ulbanka ra naku wisa: “Bîp bul plun mâ akbi ba ra, unmangka ba wilkpara.” Bara naku sin wisa: “Wark tatakra ba ai mana briaia sa.”

¹⁹ Serts almukka kum dahra kwahki nani kaka, man baha walpara; witnis wâl, apia kaka yumhpa takbia kaka lika, man wals.

²⁰ Sakuna saura dauki nani ba lika, upla sut mawanra lawi daukaia sma, uplika wala nani ba sibrin dauki banhbia dukiara.

²¹ Gâd mawanra, Dawan Jisas Kraist bara ai insalka holikira nani mawanra sin, man ra mai taibi mai wisna naha smalkanka nani na bîla wali dauki kama, dîa dîa daukisma ba ra upla kumi ra kau saura luki, apia kaka upla wala ra kau pain luki baku lika daukma apia.

²² Dawan warkka ba daukaia dukiara, ban pat pali mihtam upla kumi purara sin kahpara. Upla wala nani saurka ba man aikuki asla bripara; wînam ba sunu bri bas.

²³ Biamra ba uya siknis alki bamna, lî baman dipara, sakuna wain sin wiria dis.

²⁴ Upla tila nani saurka ba, witin nani kau lâka daukras ba ra, pat latan kaikaia sip sa; sakuna wala nani saurka ba lika, lâka daukan ningkara kaikaia sip sa.

²⁵ Baku sin, wark yamni nani ba latan kaikaia sip sa; bara kaikras kabia sakuna, sip ban pali warkka yamni nani ba yukukan kabia apia.