1 Timoti 3 - DAWAN BÎLA AISKA

Tâ bri nani ba nahki kaia ba

¹ Naha na lika kasak pali sa: Upla kum serts ra tâ uplika takan daukisa kaka, witin ba wark pain kum daukaia want sa.

² Baha mita, tâ bri kum ba pâtkas uplika kaia sa; witin ai maya kumi baman bri kaia sa, bara ai rayaka ba wapni, sinskira bara kulkanka bri kabia. Witin ba ai watla ra upla tringsar nani briaia wilin kaia sa; upla smalki lan kaia sa;

³ bla tatakra kaia apia sa, unsasabra wal ai uplika kaia apia, sakuna kupia yamnikira bara kupia kumi lâka bri uplika kabia; witin ba lalah wantkira kaia sin apia sa.

⁴ Witin ai watla uplika ba pain tâ briaia lan kaia sa, bara yaka ai luhpia nani ai bîla wali daukbia bara kasak kulkanka sin bri kabia.

⁵ Kan waitna kum ai watla uplika sip tâ briras kaka, ¿witin nahki Gâd sertska ba tâ bribia ki?

⁶ Bamna, tâ bri uplika ba, bisi pali Dawan ra tawan uplika kaia apia sa, witin ai wîna ba tara puli dibil pât ra lulkan ba baku witin ra sin lulkbiara sîa.

⁷ Bara witin ra sin lalukra apia nani ba mita kulkan kaia sa, bara baku witin ba saura pali kulkan kabia apia, bara dibil mita mina alkaia dukia dauki ba ra kauhbiara sîa.

Serts pura kakaira nani nahki kaia ba

⁸ Baku sin, serts hilpika nani ba kulkanka bri uplika nani kaia sa; witin nani dîa aisin ba kat daukaia sa, bla tatakra kaia apia, bara lalah diara saura wina takan ba sin lihki kaia apia.

⁹ Witin nani ba kasak lukan lâka dahra prakan nani ba pain kakaira nani kaia sa, bara baku sin ai kupia dara lukra ba klin bri kabia.

¹⁰ Witin nani ba pas trai munan kaia sa, bara baha ningkara, pât âpu banhwisa kaka, witin nani sip kabia pura kaikaia warkka daukaia.

¹¹ Sim baku hilpa mairin nani ba kulkanka bri uplika nani kaia sa, upla dahra kwakwahkra kaia apia, witin nani ba ai rayaka wapni bri kabia, bara diara sut mapa ra kasak kaia sa.

¹² Serts pura kakaira ba ai maya mairin kumi baman bri kaia sa, bara ai luhpia nani bara ai watla uplika ba sin pain tâ briaia lan kaia.

¹³ Kan pura kakaira nani ai warkka pain dauki nani ba, ai pliska pain kum win takisa, bara Kraist Jisas ra ai kasak lukan lâka bri tânka ba, ai âuyapah pali aisi banhwisa.

Wan sertska dahra raitka param sakan ba

¹⁴ Yang aihni pali wih mai kaikaia lukisni; sakuna naha na man ra ulbisna,

¹⁵ yang na kau takaskamna kaka, kaiki kama yawan na Gâd uplika nani tilara nahki daukaia ba, baha sika Gâd rayakira sertska ba, bara baha sertska mita sika kasak tânka ba tâ baikisa bara kaina kahbisa.

¹⁶ Upla kumi mita sin Gâd ra luki kaia, dahra prakan tânka tara ba sip apia wiras: Gâd ba upla baku latan takan; witin ba Spirit mita kasak kulkan kata, bara insal nani mita sin witin ba kaikan. Ai tânka ba nisan nani tilara aisi smalkan kata, upla sut mita witin ra kasak lukan, bara kasbrika purara sin witin ba bri banhwan kata.