1 Tesalonaika 3 - DAWAN BÎLA AISKA

¹ Bamna, yang nani kau baha trabilka wahwaia sip apia katna. Baku bamna, Atenas tawanka ra yakan takaskri,

² bara wan muihni Timoti ba man nani mai kaikaia blikri, kan witinka ba lika Gâd warkka dadaukra kum sa, bara yang nani aikuki Kraist sturka yamni ba aisi smalkaia warkka daukan. Witin ba bliki banhwisna wih mai kaikaia, man nani ba kau karna mai daukaia bara kasak lukankam lâka ba tâ baikaia sin,

³ upla kumi sin naha trabilka nani mita yarka ai ninara tawbiara sîa. Man nani sin pain kaikisma, yawan naha pâtka nani na wahwaia sa.

⁴ Kan yang nani kau man nani tilamra katna ba ra, yawan sari nani wahwaia ba latan mai wîri; bara baha ba baku takan, bara man nani pain kaikisma.

⁵ Baha mita sika, yang mita Timoti ba blikri balan. Yang kau baha trabilka wahwaia sip apia katna, baha mita yang bui witin ba blikri man nani kasak lukankam lâka tânka ba mamkabi walaia wisi. Kan yang sibri kapri dibil man nani ba saura lâka ra pat mai batakan sa wisi, baku sa kaka, wark dauki banhri ba sut bahki baman kaia kan bamna.

⁶ Sakuna nanara Timoti man nani wina tawi balan sa, bara kasak lukankam lâka bara latwankam lâka sturka sin pain baman bal, yang nani ra aisan. Witin wan wisa, man nani ba yang nani dukira piua sut pain baman lukisma, bara yang nani na ai kaikan pali mai daukisa, yang nani bui man nani mai kaikan ai dauki ba baku.

⁷ Baha mita, muihki nani, yang nani pâtki nani bara sarki nani sut tilara, man nani mita maisi nihkram sa. Kasak lukankam lâka kat ban bapi buisma ba mita, yang nani maisi nihkan sa.

⁸ Baha ba yang nani maipa ra rayaka raya kum baku sa, Dawan kat ban bapi bûi banhwisma bamna.

⁹ Bara nanara yang nani sip sna man nani mamta Gâd ra tingki wiaia. Gâd ra tingki wisna, witin mawanra uya lilia aiki banhram bamna.

¹⁰ Kakna bara tihmia Gâd ra makabi banhwisna, yang nani naikra pali ni wih mai kaikaia, bara kasak lukankam lâka mapa ra dîa dîa kau luha sma ba sin maikaia.

¹¹ Gâd wan Aisa pali, bara wan Dawan Jisas Kraist wal mita, yang nani ra hilp ai munbia man nani wih mai kaikamna dukiara.

¹² Bamna Dawan mita man nani kau pâwaia mai daukbia, bara pana pana walkam nani aikuki latwan lâka briaia bara upla sut wal aikuki sin, yang nani mita latwan mai kaikisna ba baku.

¹³ Dawan mita kupiam nani ba karna daukbia, bara man nani ba wan Aisa Gâd mawanra, holikira bara pât âpu banhwi kama, wan Dawan Jisas ai uplika sut aikuki balbia ba ra. Baku kabia.