1 Samuil 8 - DAWAN BÎLA AISKA

Israel ba ai kingka briaia makabisa

¹ Samuil pat almuk takan kan bara ai luhpia nani ba Israel wihtka nani mangkan.

² Ai luhpia almukka nina ba Joel, ningka ba Abías, witin nani Beerseba ra wihta kan.

³ Ban sakuna, luhpia waitna nani ba ai aisika dauki kan natka baku daukras, witin nani lika lalah lalihkra nani takan, upla wina lalah brin bara lâ kasak daukaia kan ba daukras.

⁴ Bara Israel almukka nani sut asla aidruban Ramá ra Samuil wal aisaia,

⁵ bara witin ra wiaia: “Kaiks, man pat almuk takisma, bara luhpiam nani man yabalkam ra wapras; baha mita yang nani brin ai daukisa man bui king kum mangki wankaia, bara witin bui wan lâka nani dauki kabia, nisan wala nani ai kingka bri ba baku yang nani sin briaia.”

⁶ Sakuna Samuil baha bîla yamni walras kan, witin nani bila king kum mangki yabia bara witin bui ai lâka dauki kabia win ba. Ba dukiara Samuil Dawan ra ai pura sunan,

⁷ sakuna Dawan pana witin ra win: “Upla nani diara sut makabi ba kupia lâka ba kat dauks. Witin nani man ra lulki mai swiras, sakuna yang ra sika ai lulkisa, ai kingka kamna ba brin daukras.

⁸ Idsip wina saki bri balri ba yua wina naiwa kat, witin nani ai daukanka ba ban baku baman daukisa bara man ra sin daukuya. Witin nani lika yang ra ai swin, gâd wala nani warkka daukaia mata.

⁹ Bamna witin nani dîa man ra makabi ba kupia lâka yas, sakuna param pali wis, king bribia bara kingka ba sin dîa dîa nani briaia ai raitka bri ba sut witin nani wina bribia.”

¹⁰ Bara Samuil upla nani ra param pali win, Dawan dîa aisin ba tânka sut, witin nani king briaia makabi ba dukiara.

¹¹ Witin nani ra win: —Kingkam brima ba yua wina, naha lâka nani bîla kaiki bas: War aiklabaia dukiara luhpia nani sut alkbia, tila nani war wagin ulaia mangkbia, wala nani aras âiulra daukbia, wala nani ba witin ra main kaiki kaia mangkbia, bara ai tâura war ra waia daknika sin bribia.

¹² Tila nani ba 1,000 lalka kaia mangkbia, baku sin 50 nani lalka kaia sin mangkbia. Insla dadaukra daknika sin bribia, war ra aiklabaia dukia nani paskaia daknika sin sâkbia.

¹³ Bara luhpiam mairin nani sin brih wabia isint paskaia, kuk takaia bara brit angkaia.

¹⁴ Tasbayam wina wainkam nasla wina, bara albikam dusa mâ wina sin, mâ kau painka ba alki bribia bara ai uplika tara nani ba ra yabi kabia.

¹⁵ Patam mâ nani sut wina matawalsip mânka dakbi bribia, wainkam mâ nani wina sin, wihta tara nani ra bara wihta sirpi nani king watla ra wark taki nani ba ra yabi kabia.

¹⁶ Albikam waitna nani bara albikam mairin nani sin mihtam dakbia, wark bîpkam wainhka nani bara muyulkam nani kau pain ba sin witin nani bribia ai warkka daukaia.

¹⁷ Baha purkara, daiwan sîp nani brisma ba wina matawalsip mânka ba bribia, bara man nani pali sin ai dukia dauki kama.

¹⁸ Baha yua ra kupiam kriwan takbia, man nani kupiam lâka kat kingkam mangki briram ba dukiara, sakuna Dawan lika man nani ra mai walbia apia.

¹⁹ Kupia kraukaia bîla nani sut Samuil aisin ba upla nani aman pali walras kan, sakuna pana win: —¡Wan kupia lukras! Yang nani kingki brin ai daukisa,

²⁰ nisan wala nani baku kaia, witin bui yang nani purira karnika alki bribia, bara wan tâ brih wabia war aiklabaia.

²¹ Baha bîla nani upla nani aisin ba Samuil walan ba ra, sut Dawan ra win,

²² bara Dawan pana witin ra win: —Witin nani makabi ba dauks bara king kum saki mangki yas. Bara Samuil bui Israel luhpia nani ra win, witin nani kumi bani ai tawanka nani kat kli tawi waia.