1 Samuil 6 - DAWAN BÎLA AISKA

Filisteo nani bui lâ auhbaia watla ba kli brih wan

¹ Dawan lâ auhbaia watla ba kati 7 filisteo tasbaya ra bri kan.

² Bara filisteo nani bui ai prîska nani bara diara tânka kakaira nani sut paiwan, witin nani ra makabi walaia: —¿Yang nani dîa daukamna Gâd lâka auhbaika watla ba wal? Wan wis, nahki dauki kli watlika ra bri si swiaia.

³ Witin nani pana win: —Israel Gâdka lâka auhbaia watla ba kli bri si swiaia kaka, prisantka âpu lika brih wapara; wan saurka mana Dawan ra prisantka yaia sa. Baku lika man nani tânka brima dîa tâwan klala wankan ba, bara siknis sin kli wan alkbia apia.

⁴ Filisteo nani makabi walan: —¿Yawan dîa prisantka yaia sa wan saurka mana? Prîska nani ba win: —Yukri lilka puskan matsip gul ni daukaia, matis sin matsip gul ni daukaia, bara filisteo wihtka bani ra kum yabaia, kan wihta tara nani bara man nani sut baha sikniska ba mai alkan bamna.

⁵ Baku bamna, yukri nani bara matis nani lilka ba sin dauks baha nani wan tasbaya sauhki tiki ba wal, bara Israel Gâdka ra mayunra yas; ban kra witin bui gâdkam nani pura wina, tasbayam, bara man nani puram wina sin ai lawanka ba sâkbia.

⁶ ¿Dîa kan man nani kupiam ban karna brisma, Idsip uplika nani bara king fero sin daukan ba baku, Gâd bui witin nani ra klala karna yan ba kat, uplika nani ba swin wan ba?

⁷ Man nani yas karita raya kum paskbia; baha ningkara bîp mairin luhpira wâl bris, kau aima kumi sin karita raskras ba, bara baha nani nana ra karita ba wilks; sakuna luhpia nani ba lika klar ra swis.

⁸ Bara Dawan lâka auhbaia watla ba, karita ba ra mangks, bara gul ni daukan dukia nani ba sin, wan saurka mana prisantka Dawan ra yaia dukia nani ba, watla kum ra mangks bara arp tnaya kat swis. Baha ningkara, bîpka nani ba yakan swis karita ba brih wabia.

⁹ Sakuna naha kaiki bas: bîp nani ba Bet-semes yabalka ra wabia sapa, ai tasbaya mata, baha tânka ba wan marikisa Gâd wina wan purara ai lawanka ba blikan. Sakuna baku waras kabia kaka, baha tânka ba wan marikisa, Israel Gâdka wina klala ba wankras kan, sakuna klala ban baku bîla kaikras kan wan purara balan.

¹⁰ Dîa daukaia win ba baku waitnika nani ba daukan. Bîp mairin luhpira nani wâl brin, bara luhpia nani ba klar ra mangkan ningkara, karita ba yaptika nani ba nana ra wilkan;

¹¹ bara Dawan lâ auhbaia watla ba karita ra mangkan, gul matiska nani ba bara gul yukrika nani ba sin.

¹² Ba ningkara bîp nani swin wan Bet-semes yabalka ra. Bîp nani ba yabal bâk uhbi wapi kan, yabal tnaya ra tawras. Filisteo wihta tara 5 ba sin, ninara wapi auya kan, Bet-semes ra dimaia yabalka tâ ba kat.

¹³ Bet-semes upla nani insla ra plawar mâ kriki banhwi kan ba ai nakra ra kang kaikan, lâ auhbaia watla ba brih aula kan, bamna witin nani lilia tara pali takan.

¹⁴ Karita ba Jasua nasla kat brih wan, witin lika Bet-semes waitnika ba, bara takaskan. Walpa tara kum bahara kata. Bamna Bet-semes uplika nani karita dusa nani ba daiki sakan, bara pauta lisban, bara bîpka nani ba wâlsut iki, aiska angki Dawan ra sakripais dauki yan.

¹⁵ Libait nani ba pat lâ auhbaia watla ba sakan kan, diara wala nani ba sin, gul ni daukan dukia nani ba sin, bara walpa tara ba purara suni swin kan; bara baha yua Bet-semes uplika nani ba daiwan wîna aiska angki sakripais ba daukan, bara sakripais wala nani sin Dawan ra dauki yan.

¹⁶ Filisteo wihtka tara nani matsip ba Israel luhpia nani dîa daukan ba sut kaikan ningkara, baha yua witin nani kli tawi Ecrón ra wan.

¹⁷ Gul yukrika nani matsip ba filisteo nani bui ai saurka nani mana baku prisantka Dawan ra yaia daukan ba, baha ba tawan matsip dukiara kan: Asdod, Gaza, Ascalón, Gat bara Ecrón;

¹⁸ bara gul matiska matsip ba sin wihta tara nani matsip tawanka tara nani karnakira bri kan ba tukinka kan, tawan sirpi nani dukiara sin. Bet-semes ra baha walpa tara kata ba, Dawan lâ auhbaia watla ba, baha purara kahbata ba, Jasua bahara iwi kan, baha walpaya naiwa kat ban bâra sa.

¹⁹ Sakuna Bet-semes uplika nani sin Dawan bui klala yan, baha nani lâ auhbaia watla ba biki kaikan tâwan. Waitna 70 rayaka tikan, bara tawan aiska ba inanka tara bri kan Dawan baku upla iki tikan ba mita.

²⁰ Bamna Bet-semes uplika nani aisin: “¿Ya sip sa naha sât Dawan holikira na mapara buaia? ¿Yawan wina takbia ba ra, witin yaura wabia?”

²¹ Bara witin nani Quiriat-jearim uplika nani ra kli ai bîla blikan bara win: “Dawan lâ aubaia watla ba filisteo nani kli bri balan; bamna man nani bal brih was.”