1 Samuil 4 - DAWAN BÎLA AISKA

¹ baha ningkara dîa Dawan aisin ba Samuil Israel aiska ra laki win. Baha piua filisteo nani ba asla takan Israel mapara aiklabaia. Israel luhpia nani sin taki wan filisteo nani wal prawaia, ai kiampka ba Eben-ézer kat bapan. Filisteo nani ai kiampka Afec kat bapan.

Filisteo nani mita Dawan lâka auhban ba dakbi brin

² Filisteo nani ba ai kan kahbaika ba kutbi daukan Israel mapara, witin nani aiklaban bara Israel luhpia nani ra pura luan bara aiklaklabra waitna nani 4,000 ikan baha aiklabanka ra.

³ Aiklaklabra nani ba plapi kli kiamp ra balan ba ra, Israel almukka nani ba bila win: “¿Naiwa na dîa kan Dawan ba lulki wan swin, bara filisteo nani bui rau wan sauhki na? ¡Kaisa Siló ra waia Dawan lâ auhban ba bri balaia, baku Dawan wan tilara wabia bara wan waihla nani mihta wina swaki wan sâkbia!”

⁴ Baku aisi aiklaklabra daknika kum saki Siló ra blikan, bara Dawan karnika sut bri ba lâka auhban watla ba bri balan, witinka kirubin nani purara ai iwaika bri ba. Elí luhpia nani wâl ba, Hofní bara Finees Dawan lâka auhbaika watla aikuki brih wan.

⁵ Bamna baku Dawan lâka auhbaika ba kiamp ra brih wan, bara Israel luhpia nani ba lilia tara daukan, ai bîla baikra karna winan ba mita tasba sin nikban.

⁶ Filisteo nani baha binka ba walan ba ra, makabi walan: “¿Baha binka ba dîa sa Hibru nani kiampka ra taki ba?” Sakuna witin nani ai dara walan Dawan lâka auhbaika watla ba kiamp ra brih balan ba.

⁷ Witin nani sibrin takan bara aisin: “¡Gâd kiamp ra balan! ¡Nanara yawan ra lika saura pali takbia, naha praiska kat lika kau yawan ra takras kan!

⁸ ¡Yawan ra saura pali kabia! ¿Ya yawan ra swaki wan sâkbia naha Gâdka karnakira na mihta ra kauhbia ba ra? ¡Witin sika Idsip uplika nani sut sauhki tikan upla iwras tasbaya ra siknis sât sât klalka ba wal!”

⁹ Bamna filisteo nani ba naku aisin: “¡Aiklabaia dukia nani ba alki bris, kupiam karna waitna baku aiklas, Israel luhpia nani albika takmara sîa, witin nani ba man nani albikam takan ba baku!”

¹⁰ Bara baku filisteo nani Israel luhpia nani aikuki aiklabi pura luan, witin nani plapi ai kiampka ra wan. Baha yua ra Israel luhpia nani ra kasak ailal ikan, 30,000 waitna aiklaklabra nani kan ba ikan.

¹¹ Gâd lâka auhbaika ba sin dakbi brih wan, Elí luhpia nani Hofní bara Finees wal sin ikan.

¹² Sakuna aiklaklabra kumi ba Benjamín kiamka wina, witin yakan yukuwi swak takan war ba wina. Waitna ba baha yua pali plapi Siló ra wan, ai prâka ba kalwan bara ai lal ra sin tasba banhki kan.

¹³ Witin wan ba ra, Elí bâra iwi kan iwaika tarka tara kum ra, dur lama kat; bara yabal ba kat aihwaki kaiki kan, witin ai kupia wal trabil taki luki kan Gâd lâka auhbaika watla ba sin dakbi brih wan ba dukiara. Baha waitnika swakwi balan ba bui sturi ba tawan ra upla sut ra aisin, bara upla sut ini yahwan.

¹⁴ Baha ini yahwi kan ba Elí walan, bara makabi walan: —¿Baha ba dîa pali binka tara daukisa? Waitnika kata ba karna plapi Elí ra wih sturi win dîa takan ba.

¹⁵ Elí 98 mani bri kan, ai nakra sin pat diara kaikras takan kan.

¹⁶ Waitnika Elí ra win: —Nanara pali bal dimri, war aiklabi kiampka ba wina plapi swakri. Elí makabi walan: —Luhpi, ¿dîa pali takan?

¹⁷ Waitna ba bila: —Israel luhpia nani sut plapan filisteo nani mawan wina, baha purkara upla ailal pali sin ikan, baha nani tilara man luhpiam nani wâl Hofní bara Finees ba sin ikan, bara Gâd lâka auhbaia watla ba sin filisteo nani wina dakbi brih wan.

¹⁸ Waitna ba nan Gâd lâka auhbaia watla ba brih wan walan ba ra, Elí ninara kauhan dur lama ba kat, ai iwaika tara ba wina. Witin pat almuk kan, bara waitna sin wirha kan, bamna kauhan ba ra ai nana dusa ba bâk kriwan bara baha kat pruan. Mani 40 Israel luhpia nani wihtka aimaki kan.

¹⁹ Ai mula yaptika Finees maya, kwihra kan ba ai luhpia baikaia piua pat baila kan, witin sin naha sturka walan bara Gâd lâka auhbaika watla ba dakbi brin ba, ai dapna ai maya sin pruan ba. Ai biara latwanka prak alkan bara ba kat ai luhpia baikan.

²⁰ Mairin nani ai lamara kan ba kaiki kan, mairka na mahka prui kan, bara witin nani bui win: “Si bripara, luhpiam waitna briram.” Sakuna witin pana diara sip aisaras kan.

^21-22 Bara tuktika nina ba Icabod mâkan, baha tânka wiaia: “Nanara Israel ra yamni kulkan lâka ba âpu sa, Gâd lâ auhbaika watla ba dakbi brih wan ba mita.” Aisubanka ba natka bâk aisi marikisa, Gâd lâ auhbaika watla ba dakbi brin bara ai dapna bara ai maya sin pruan ba.