1 Samuil 30 - DAWAN BÎLA AISKA

Debit bui Amalec uplika nani pura luan ba

¹ Yu yumhpa luan ra, Debit ai uplika nani aikuki Siclag ra wan bara kaikan Amalec uplika nani bal Négueb dara walras pura luan, Siclag wal aiklabi angki tikan.

² Mairin nani, tuktan nani bara almuk nani sut priski brih wan, sakuna ikras sut raya brih wan.

³ Debit ai uplika nani aikuki tawan ra wan bara tawan ba angkan kan kaikan, mairin, luhpia waitna bara luhpia mairin nani sin sut priski brih wan kan,

⁴ bara witin nani ai bîla tara inan, ban wingka prawi kan, karnika sin âpu takan.

⁵ Debit maya nani wâl ba sin priski brih wan: Ahinóam Jezreel wina ba, bara Abigail, Nabal piarkika, Carmel wina ba.

⁶ Debit ai kupia wal uba aisin kan witin nahki daukaia, ai daknika ba bui mahka walpa ni sabaia muni kan, witin nani sut lawi pali kan ai luhpia nani ra baku takan ba dukiara. Ban sakuna, Dawan ra ai kupia lukra ba mangkan,

⁷ bara prîs Abiatar ra win, witinka Ahimélec luhpia ba: —Pliskam pali, prîs prâka pîs ba sal aik. Abiatar prîs prâka pîs ba bri si Debit ra yan,

⁸ bara witin mahka Dawan wal aisin ba ra, makabi walan: —¿Baha âimplikra daknika ba nina blikamna ki? ¿Bliki alkaia sip sna ki? Dawan pana witin ra win: —Nina blîks, kan bliki alkma bara priski brih wan nani ba pri sakma.

⁹ Debit tit buan bara waitna 600 nani ai yula kahbi ba wal mahka taki wapan, bara Besor tingnika kat wan. Bahara takaskan

¹⁰ waitna 200 nani swapan pali kan ba, tingni ba sip luras kan, bara wala nani 400 Debit wal ai kanra wan uplika nani ba rausauhkaia.

¹¹ Kau naika twi ra Idsip uplika kum witin nani wal prawan bara Debit ra brih wan, sakuna tâura witin nani bui witin ra yan plun piaia bara diara sin diaia:

¹² kwah damni mâ turtika pîs kum, wain mâ lâkan turtika sin pîs wâl. Baha pin ningkara waitna ba kupia aimakan, witin lika kakna yumhpa bara tihmia yumhpa sin plun piras kan, diara sin diras bamna.

¹³ Bara Debit bui witin ra makabi walan: —¿Man dawankam ba ya? ¿Man ani wina aulma? Idsip waitnika ba pana win: —Yang na Idsip wina, Amalec uplika kum albika, sakuna siknis takri ba pat yu yumhpa sa, bara dawanki bui ai lulki ai swin.

¹⁴ Yang nani quereteo nani waupasa tani tasbaya kir ra wari bara upla dukia nani dakbi briri, baku sin Juda ra bara Caleb ra. Bara Siclag sin pauta ni angki banhri.

¹⁵ Debit bui witin ra makabi walan: —¿Man tâi briaia wilin sma ki baha âimplikra nani bâra ba kat ai bri waia? Waitna ba pana win: —Dawan nina ra yang ra swer takma kaka, ai ikaia apia, dawanki mihta ra sin kli ai mangkaia apia kaka, baku lika yang bui witin nani kat mai bri wamna.

¹⁶ Bara âimplikra nani bâra kan ba kat brih wan, witin nani twi mawan âpu yakabrira plun pi bara di banhwi kan, filisteo bara Juda tasbaya wina diara nani implikan ba ai lilia bri banhwi kan.

¹⁷ Bara Debit titan wina tutni kat witin nani wal aiklabi kan, bara sut sauhki tikan, wahma nani 400 baman kiamil ra uli plapi swak takan.

¹⁸ Amalec uplika nani bui impliki brin nani ba sut kli Debit bui dakbi brin, ai maya wâl ba sin.

¹⁹ Diara sirpi kum, tuktan kum, almuk kum sin tiwras, diara an dakbi brih wan kan ba sut pali Debit bui kli dakbi brin.

²⁰ Debit sin sîp bara bîp nani sut kli dakbi brin, bara daiwan kangbi nani kan ba bila win, naha diara sut na Debit dukia.

²¹ Waitna nani 200 swapan pali kan ba mita witin nani wal aiklabaia sip waras kan ba, Debit baha nani ra wan, witin nani Besor tingnika ra bâra kan ba, sut taki balan witin ra bara ai uplika nani ra sin briaia. Debit baha nani lamara wan bara lakula daukan.

²² Sakuna tila waitna nani Debit wal wan ba watawikira warha nani kan, bara baha nani mita wala nani witin nani wal waras kan ba mapara aisin bara win, witin nani diara dakbi brin ba wina baha nani ra diara kumi sin yabia apia, mairka nani bara luhpia nani ra baman lika yabia, bara baha bribia ningkara mahka wabia.

²³ Ban sakuna, Debit win: —Upliki nani, Dawan wina naha diara nani sut na wankan, bara nanara baha diara nani brih baku daukpara, witin wan rayaka nani ba main kaikan, âimplikra daknika nani ba sin wan mihta ra mangkan, baha nani rau wan sauhki kata ba.

²⁴ Naha tânka na kat lika man nani aisisma ba wal waras, upla sut ba aikuki kumi baku diara na yui briaia sa. Aiklabaia waras ba ra, aiklabaia wan nani dukia nani main kaiki kan ba ra, witin nani wal kumi baku kulkan sa.

²⁵ (Debit baha lâka daukan ba wina, naha yua kat Israel ra lâka ba ban sa.)

²⁶ Debit ba Siclag ra wan ba ra, witin diara nani brin ba wina mânka kum tnaya ra sakan bara Juda ra ai uplika nani almuk nani ra prisantka blikan, naha bîla na wal: “Naha prisantka man nani brisma na, Dawan wailhka nani ba wina dakbi briri ba wina mânka kum sa.”

²⁷ Bara prisantka nani ba blikan Betel ra bâra kan uplika nani ra, Négueb Ramot dukia ba ra, Jatir ra,

²⁸ Aroer ra, Sifmot ra, Estemoa ra,

²⁹ bara Racal ra, bara baku sin Jerahmeel tawanka ra iwi uplika nani ra, quenita nani tawanka nani ra,

³⁰ bara Hormá ra, Corasán ra, Atac ra,

³¹ Hebrón ra bara anira witin ai uplika nani wal wataukan ba tasbaya sut ra yan.