1 Samuil 3 - DAWAN BÎLA AISKA

Dawan bui Samuil ra winisa

¹ Baha yua nani ra tukta Samuil ba Dawan warkka dauki kan Elí adarka dîa wisa ba kat. Dawan sin baha piua ra pat pat upla ra aisaras kan, diara aihka aihka kaiki ba sin uya marikras kan.

² Bara baku kan Elí ba pat almuk pali kan, ai nakra nani pukwi kan, yu kumi ai krikrika ra yapi kan.

³ Samuil lika Dawan watla ra aitniki kan Dawan lâka auhban ba lamara, lamp ba sin kau daskras kan.

⁴ Bamna Dawan Samuil ra winan: —¡Samuil! Witin pana aisin: —¡Nâra sna!

⁵ Samuil plapi Elí ra wan, bara win: —Nâra sna; ¿dîa dukiara ai winisma? Elí pana win: —Yang mai winras. Wih aitniks. Samuil wih aitnikan.

⁶ Sakuna Dawan kli Samuil ra winan: —¡Samuil! Samuil buan bara kli Elí ra wih win: —Yang nâra sna; ¿dîa daukaia ai winisma? Elí pana win: —Luhpi, yang mai winras. Kli wih aitniks.

⁷ Samuil ba kau Dawan kakaira apia kata, kan Dawan ba witin ra kau param takras kan.

⁸ Kli aima yumhpa ra Dawan Samuil ra winan, bamna witin buan bara kli Elí ra wan bara aisin: —Yang nâra sna; ¿man dîa brin mai daukisa? Nanara Elí ai dara walan Dawan ba Samuil ra winisa,

⁹ bara Elí bui Samuil ra win: —Man was bara aitniki bas; Dawan mai winbia ba ra, pana wis: ‘Aisas, nampakan man ra walisa.’ Bamna Samuil wan bara kli ai yapaika kat aitnikan.

¹⁰ Dawan kli bal buan, bara witin wini kan ba baku kli winan: —¡Samuil! ¡Samuil! Samuil pana aisin: —Aisas, albikam mai walisa.

¹¹ Bara Dawan bui witin ra win: —Diara kum daukaia sna Israel luhpia nani sut ra walaia bara upla sut sin sturka na walbia ba kiama wini latwan kabia.

¹² Baha yua ra, kasak pali Elí ra yang diara nani sut wîri ba ai luhpia nani dukiara, yang ba kat daukamni.

¹³ Witin ra maisa pakri yang klala yabaisna ba ban kaia, baha yabaisna ba witin sut kaikisa, ai luhpia nani ba laihtuban, sakuna witin baha nani ra lawi daukras kan.

¹⁴ Bahamna yang swer aisari Elí watla uplika nani ra watawanka ba sip diki sakan kabia apia, sakripais nani daukan ba mita, prisant nani yan ba mita sin apia.

¹⁵ Baha ningkara, Samuil mahka yapan yu wala titan kat buan, bara Dawan watla durka ba sakan. Samuil sibrin dauki kan baha sturka ba Elí ra wiaia, Dawan bui witin ra diara aihka kaikan ra param marikan ba.

¹⁶ Sakuna Elí witin ra winan bara win: —¡Luhpi, Samuil! Witin pana aisin: —Nâra sna.

¹⁷ Elí witin ra makabi walan: —¿Dawan ba dîa man ra mai win? Mamkabisni, pliskam, yang wina diara kumi sin yukukpara. ¡Diara sut Gâd bui man ra mai win ba yukukma kaka, witin klala karna maikbia!

¹⁸ Bara Samuil witin ra sturka ba sut pali win, diara kumi sin yukukras, bara Elí wini aisin: —¡Witin ba Dawan sika! ¡Witin yamni kaiki ba kat daukbia!

¹⁹ Samuil pâwan, Dawan lika witin wal kan, tâ baikan ai pramiska nani sut ba daukaia.

²⁰ Bara Israel aiska, Dan wina Beerseba kat, upla sut bui Samuil ba Dawan prapitka aihwa pali kulkan.

²¹ Dawan kli witin ra param takan Siló ra, kan bahara sika witin ai bîla aisi Samuil ra param mariki kan;