1 Samuil 25 - DAWAN BÎLA AISKA

Samuil pruanka

¹ Samuil pruan bara Israel uplika sut asla takan pura mata inaia, bara watla Ramá ra bri si bikan. Baha ningkara Debit mahka wan Parán upla iwras tasbaya ra.

Debit bara Abigail

² Maón ra waitna kum bâra kan, yuyakira pali kan, sîp nani 3,000 bara guts nani 1,000 bri kan, bara ai bisniska ba sin Carmel ra bri kan, ai natka kan tawan ra baman ai sîpka nani taya ba irbi kaia.

³ Naha waitnika ba nina Nabal, Caleb taika wina; witin mihta karna bara waitna tânka saura kan. Ai maya Abigail lika baku apia, witin lika mairin mawan painkira bara sinskira kan.

^4-5 Debit upla iwras tasbaya ra kan ba ra, witin walan Nabal ba Carmel ra ai sîpka nani taya irbi kan, bara witin ai albika nani matawalsip saki Nabal ba plikaia blikan, bara sâkbia taim ai lakula yaia adarka yan, bara blikan wan,

⁶ lakula bîla ba naku wiaia kata: “Muihki, yang brin ai daukisa, yamnika bara lilia lâka ba sut man brima, bara tamya nani, uplikam nani sin, baku dukiam nani sin sut yamni kabia.

⁷ Yang walri man bahara sîpkam nani ba taya irbisma. Man sin tânka brima sepadkam nani Carmel ra yang nani wal kan ba, witin nani ra saura munras dukia nani sin mihta dakbras kan.

⁸ Albikam nani ra makabi walaia sip sma, witin nani bui kasakka ba mai wibia. Bahamna yang bui man ra makabisni, nanara man wiria luki kaikma naha wahma nani dukiara, piua yamni ra witin nani man ra balan sa, bara yawan ra diara wankma man mihtam ra brisma ba wina, witin nani ai dukia, yang duki sin, kan yang na man luhpiam kum baku sna.”

⁹ Debit albika nani wan bara naha bîla nani ba Nabal ra win. Ningkara witin nani bîla kaikan, Nabal pana dîa wibia ba walaia.

¹⁰ Sakuna Nabal pana witin nani ra win: —¿Debit ba ya sa? ¿Jesé luhpia ba ya sa? ¡Naiwa yua alba nani manis ai dawanka nani wina plapisa!

¹¹ ¿Sîpki taya irbi nani ba pata wina, diaika nani ridi daukri ba wina yang piaia sna ki, upla kum kakaira apia sna na, ani wina balan sapa sin tânka briras sna na, bahara yaia?

¹² Debit waitnika nani ba ai yabalka ra aimaki mahka tawi wan, bara witin nani Debit mawanra wan ba ra, Nabal dîa aisin ba sut win.

¹³ Bara Debit ai uplika nani ra win: —¡Man nani aiklabaia dukia nani ba mihtam ra alks! Ai waitnika nani ai sordka ai maisa ra wilkan, Debit sin; bara baku waitna nani 400 witin wal wan, waitna nani 200 ba diara nani main kaiki takaskan.

¹⁴ Sakuna Nabal albika kum bui Nabal maya Abigail ra wih win: —Upla iwras tasbaya wina Debit ai albika nani blikan, wan dawanka ra lakula daukaia, sakuna witin pana saura swira daukan.

¹⁵ Sakuna baha waitnika nani sika yang nani upliki aihwa pali kan twi ra, yang nani aikuki tauki kan ba piua sut saura wan munras pali, wan dukia nani kumi sin wan mihta wina dakbras kan.

¹⁶ Kakna ra bara tihmia ra witin nani bui ni kau wan kaina kahbi kan, wan daiwra nani sin.

¹⁷ Sakuna man mayam ai kupia saura ba mita, yang bui witin ra sip diara wiras, man luki kaiks dîa daukaia sip sma ba, baha aisinka ba wina lika diara saura kum balaia pali sa witin ai mapara, ai taya nani sut mapara sin.

¹⁸ Abigail aihni plapi brit 200, wain taya batilka wâl, sîp wîna angkan matsip, aya kâkan batil 40, turtiya wain mâ wina ba 100 kum, turtiya kwah damni mâ lâwan ni daukan ba 200, bara baha sut brin bara biriku kum ra prahkan,

¹⁹ bara ai albika nani ra win: —Man nani mahka tâiura was, yang lika kau tisku man nani ninam blikamna. Naha dukiara witin ai maya ra lika diara wiras,

²⁰ Abigail biriku kum ra ulan, bara yukuwi il ba wina iwi wan. Debit ai suliarka nani aikuki sin baha yabalka ra aula kan kang kaiki si, lakula daukaia mapara wan.

²¹ Debit ai kupia ra luki aula kan, witin bahki ra Nabal dukia nani sut twi ra bri kan ba kaina kahbi kan ba, dukia nani ba wina diara kumi pan mihta dakbras kan, yamni munan ba mana nanara saura ni ai aibapisa.

²² Bamna witin swer takan: “¡Dawan mita karna lawi ai daukbia nanara wina yu baiwbia ba kat, ai inmanka nani sut aikuki âpu daukras kamna kaka!”

²³ Abigail bui Debit kaikan ba ra, biriku pura wina iwan, ai mawan ba tasba ra aimakupan yamni kulkan lâka sainka baku.

²⁴ Baha ningkara ai mawan ra kauhan bara win: —¡Dawanki, watawanka ba yarka yang purira kauhbia! Man ra puri sunisni, ai swis man ra mai aisaia bara aisinki nani ba wals.

²⁵ Nabal aisinka nani ba ra man lukpara, baha waitna lukanka saura, mihta karna, ai nina bara ai tânka ba param marikisa witin sinskas kum sa. Piua bani sinskas lâka ra diara daukisa. Warkkam dadaukra mairin na, albikam nani blikram ba yang kaikras kapri.

²⁶ Ban sakuna, kasak tânka ba kat man bui bal tala kaiki, mihtam ni kasakka lâka ba daukaia Dawan wina man ra maikras kan. ¡Dawan baku brin daukbia, man waihlam nani sut, wala nani sut sin saura mai munaia pliki nani ba, witin nani sut Nabal klala brin ba bribia!

²⁷ Nanara yang bui man ra puri sunisni, naha prisantka nani bri balri na uplikam nani ra yui yan kabia;

²⁸ bara dukiam dadaukra mairin na pâtka ban swih tiks; kasak pali Dawan bui man mai alki bribia ai karnika ra, kiamkam nani sut sin, man Dawan dukiara aiklabisma bamna, bara rayakam yua sut ra pât saura wauhma apia.

²⁹ Ya man ninam bliki mai ikaia lukbia ba, rayakam ba Dawan man Gâdkam ba ai mihta ra yamni mai kaiki bri kabia. Man waihlam nani ba dukiara naku kabia, Dawan bui witin nani ba lulkbia, praukpraukia ra walpa kum mangki lulki ba baku.

³⁰ Baku bamna, Dawan bui man dukiamra yamnikam nani sut daukaia aisin ba param sâkbia, bara Israel wihtka mai mangkbia,

³¹ kupiam wirhika kriwan brima apia, tala pâtkas man bui laikram, mihtam ni kasakka lâka daukram wisi. Ban pâwi kaia lâka Dawan wina maikbia bara dukiam dadaukra mairin na dukiara sin kau luki bas.

³² Debit pana witin ra win: —Dawan ba yamni pali kabia, witinka Israel Gâdka ba, naiwa witin bui mai blikan yang wal prawaia,

³³ bara man sin yamni pali kama lâmka yamni brisma ba tâwan naiwa man bui ai takaskram, yang bui tala laikaia kapri mihti ni, kasakka lâka daukaia ba wina.

³⁴ Sakuna yang bui man ra swer takisna Israel Gâdka ba nina ra, witin bui naiwa ai takaskan yang bui man ra saura mai munaia ba wina, pat pali munras kapram kata yawan wal prawaia ba, yauhka titan kat, Nabal uplika nani kumi sin raya kaia apia kan.

³⁵ Ningkara witin diara nani brih wan ba, Debit mihta ra yan brin, bara win: —Âmyapah wamtla ra waia sip sma. Man kaikisma yang lika man ra walri dîa aisaram ba, bara dîa makabram ba sin maikri.

³⁶ Abigail ba Nabal ra tawi wan ba ra, kaikan witin king kum baku ai watla ra pata tara dauki pi, lilia dauki kan, ai âuyapah, bla pali kan. Baha mita sip diara wiras kan, yu wala kat.

³⁷ Yu wala titan Nabal bla âpu pain takan kan ba ra, diara takan ba tânka sut param Abigail bui Nabal ra win. Nabal baha walan ba wal, ai wîna aiska ba sriman.

³⁸ Yu matawalsip Dawan wina kli klala yan, bara Nabal pruan.

³⁹ Debit walan Nabal pruan, bara witin win: —¡Dawan ba yamni pali kabia, Nabal mini prukanka daukan ba mana witin bui pana munan ba! ¡Saura daukaia ba wina swaki ai sakan, Nabal watawanka ba kli Nabal purara kahban! Baha ningkara Debit bui Abigail ra marit sakaia bîla blikan.

⁴⁰ Debit albika nani Carmel ra wan witin wal aisaia, bara win: —Debit yang nani ai blikan man mamta, witin ai maya mai briaia dukiara.

⁴¹ Abigail tasba kat ai mawan ra bawan, yamni kulkanka lâka ba marikan, bara pana win: —Yang na bahki Debit dukia dadaukra kum sna, ridi sna ai albika nani mina sikbaia, witin baku adar aikbia kaka.

⁴² Baku aisin ba ningkara, aihni pali ridi taki, ai albika nani matsip aikuki biriku kum ra uli, yabal ra taki wan Debit uplika nani ninara bara witin wal ai maya takan.

⁴³ Debit ba Ahinóam Jezreel wina ba wal sin ai maya takan, bara witin nani wâlsut ai maya takan.

⁴⁴ Saúl ai luhpia mairin Mical Debit maya kan ba, Paltí ra yan, Lais luhpia, Galim wina kan ba.