1 Samuil 23 - DAWAN BÎLA AISKA

Debit bui Queilá tawanka ba swaki sakan

¹ Yu kumi filisteo nani ba Queilá tawanka mapara aiklaban, bara plawar mâ bisi taya sakan nani ba implikan. Bamna sturka ba Debit ra win ba ra,

² witin Dawan wal aisaia wan. Dawan ra aisi, win: —¿Filisteo nani ba mapara aiklabaia man adar aikisma ki? Dawan bui witin ra pana win: —Âu, baha nani mapara aiklas bara Queilá tawanka ba pri sâks.

³ Sakuna Debit suliarka bila win: —Yawan Juda ra aiklabaia sibrin wan daukisa, ¡bara nanara kau pali Queilá ra waia, filisteo war aiklaklabrika nani wal war aiklabaia! ¡Baha lika kau saura sibrin wan daukbia!

⁴ Debit kli Dawan wal aisi baha tânka plikan; Dawan pana win: —Mahka Queilá ra waia yabalka ra aimaks, yang bui filisteo nani ba mihtam ra mangkamni.

⁵ Debit ai uplika nani aikuki mahka Queilá ra wapan, bahara filisteo nani wal aiklaban, sauhki âpu tikan bara daiwra nani sut brin. Baku Debit Queilá uplika nani ba swaki sakan.

⁶ Baku bamna, Abiatar, Ahimélec luhpia waitna ba, witin plapan kan Queilá ra waia Debit wal prawaia lukanka brih, bara prîs prâka pîs ba sin brih wan.

⁷ Tnaya walak Saúl ra pat maisa pakan kata Debit Queilá ra wan ba, bara Saúl lukan: “Nahara Dawan bui ai mihta ra mangkan, witin Queilá tawanka bilara diman bahara durka prakan sa.”

⁸ Saúl ai suliarka nani sut winan balaia, Queilá ra waia ridi takan, Debit bara uplika nani ba sut aikuki kutbi alkaia lukanka brin.

⁹ Sakuna Debit pat ai tânka brin, Saúl witin ai mapara bal aiklabaia lukanka bri ba, prîs Abiatar ra win prîs prâka pîs ba witin ra bri balbia, witin Dawan wal aisi tânka plikaia dukiara.

¹⁰ Bamna Debit ai pura sunan: —Dawan bara Israel Gâdka, naha man albikam na tâka Saúl lâ daukisa, Queilá tawanka ba bal sauhki tikaia.

¹¹ Yang walri ba baku, ¿Saúl ai pliki balbia ki? ¿Queilá uplika nani witin ai mihta ra ai mangkbia ki? ¡Israel Dawan Gâdka, man dukiam dadaukra ai puri sunisa baha tânka ba wima! Dawan pana win: —Saúl balbia.

¹² Bara Debit makabi walan: —¿Upliki nani ba bara yang sin, Queilá uplika nani mita Saúl mihta ra ai mangkbia ki? Dawan pana witin ra win: —Âu, mihta ra mai mangkbia.

¹³ Bara Debit ai uplika nani waitna 600 prais kan ba aikuki, Queilá wina taki plapan bara anira auya sapa ai tânka briras. Baha sturka Saúl walan Debit Queilá wina taki plapan ba, bara witin Debit nina blikaia kau diara daukras swin.

Debit upla iwras tasbaya ra ba

¹⁴ Baku upla iwras tasbaya ra Zif ilka ra kan kahbaika pliska nani ra Debit iwi kan. Zif ilka ra Saúl yu bani witin ra pliki kan, sakuna Dawan mita witin ai mihta ra mangkras kan.

¹⁵ Ban sakuna, Debit ba Saúl ra sîa yabi kan, witin ra ikaia lukanka wal tauki kan bamna. Baha mita Hores ra takaskan, Zif ra, upla iwras tasbaya ra.

¹⁶ Yu kum, Janatan, Saúl luhpia ba, Debit kaikaia Hores ra wan, bara kupia tâ baikaia Gâd ra ban luki kaia karnika yaia.

¹⁷ Witin ra win: —Si bripara, kan Saúl yang papiki mai pliki sip mai sakbia apia. Man lika Israel kingka aimakma, bara yang lika man ningkamra lamamra kamna. Naha na papiki Saúl pali sin kakaira sa.

¹⁸ Bamna witin wâlsut Dawan ai witniska mangki brih, lâ daukan. Ningkara Janatan kli ai watla ra wan, Debit lika Hores ra takaskan.

¹⁹ Sakuna Zif uplika nani Guibeá ra wan, Saúl wal aisaia, bara witin nani Saúl ra win: —Debit bahara yukuwisa yang nani tasbayi ra, Haquilá ilka ra kaina kahbaika bri pliska nani ra, Hores ra, upla iwras tasbaya waupasa tani ra.

²⁰ Bahamna king tara, man balan mai daukbia kaka bal, kupiam aiska kira; yang nani lika witin ba mihtam ra mangkamni.

²¹ Saúl witin nani ra win: —¡Gâd yamni mai munbia, yang wirhiki man nani sin twilkisma bamna!

²² Nanara man nani ra puri sunisni, man nani was bara tânka ba pain pliki wals, witin ani pali kat takaski ba kaiks, ya pali sin witin kaikan ba, kan yang walri witin ba âuya mâira pali sa.

²³ Witin bâra yukuwi untika nani ba sut pain pliki laki kaiks, bara sturi kasak ba brih yang ra kli bal, bara yang lika man nani wal wamna. Kasak pali witin baha tasbaya ra bâra sa kaka, Juda masraka kumi bani wîna kat kat pliki kaikamna.

²⁴ Zif uplika nani ba mahka wan kli ai tawanka ra, Saúl adarka ba kat. Debit ai uplika nani ba wal Maón twiya tasbaya waupasa tani ra bâra kan, bahara upla iwras kan.

²⁵ Saúl ai uplika nani wal mahka yabal ra taki wan, witin ba plikaia. Debit ra maisa pakan Saúl aula ba dukiara, bara witin walpa tarka tara bâra ba untika bâk alahwi iwan, Maón upla iwras tasbaya ra. Saúl baha walan ba ra, Maón upla iwras tasbaya ra taki wan, Debit ra rausauhkaia.

²⁶ Il tnaya kum bâk Saúl ai uplika nani aikuki balan, il tnaya wala bâk Debit ai uplika nani ba wal tawan, karna muni kan Saúl wal laihura takaia. Sakuna Saúl bui Debit ra pat kutban kan, pat alkuya pali kan,

²⁷ bara sturi twatwilkra kum Saúl ra balan wiaia: —¡King tara, nanara pali mahka ninamra tawi bal, filisteo nani wan kuntrika kutban sa dakbaia dukiara!

²⁸ Bamna Saúl bui Debit nina bliki kata ba iki swi si, filisteo nani wal war aiklabaia wan. Baha tâwan baha ilka nina ba mâkan ‘Aihka wan dakbi saki ba ilka.’

Debit bui Saúl ikras swin

²⁹ Debit baha wina taki, En-gadi ra kan kahbaika pliska nani bâra kan ba ra wih iwan.