1 Samuil 21 - DAWAN BÎLA AISKA

Debit ba Saúl sîa plapisa

¹ Debit lika Nob ra wan, prîs Ahimélec kaikaia, bara witin tâ iwan taki balan witin wal prawaia, bara win: —¿Nahki kan yakan aulma, upla man yulam kahbras?

² Debit pana win: —King adarka ai blikan wark kum daukaia, witin bui yang ra ai win upla kum sin baha tânka briaia apia sa, dîa mata ai blikan ba bara dîa adarka nani sin yang bri aulna ba. Waitna nani brih taukisna ba sin, yang wal plis kum kat prawaia piua mangki swiri sa.

³ Kau mamkabaia brin ai dauki ba sika, ¿man dîa pata brisma? Brit brisma kaka, matsip aik.

⁴ Prîs ba pana win: —Brit nani mihti ra brisna ba ya ya piaia britka apia sa, baha Dawan mawanra kahban britka yamni munan ba. Baha ban maikamna, sakuna uplikam nani ba mairin lamara waras sa kaka.

⁵ Debit sibrin âpu kira pana win: —Yang nani yabal ra taukisna piua ra, mairin nani wal prawras. Naha impakanka nani sin piua wala nani tauki ba natka kat sa, bara nanara kau klin sa.

⁶ Bara Dawan mawanra kahban britka ba, prîs ba witin ra yan, kan brit wala âpu, pat yamni munan Dawan dukia kahban ba baman, baha yua ba brit almuk ba altar wina sakan bara brit raya lapta nani watlika ra kahban kan.

⁷ Baha pali piua ra, Saúl waitnika tara kum nina Doeg, utla ba ra kan, witin lika sepad nani kiaptinka ba, Edom wina, witin sin Dawan ra mayunaia wan kan.

⁸ Debit bui Ahimélec ra win: —¿Man mihtam ra langsa kum, sord kum kra brisma ki? King adarka ba aihni pali ai munan bara sans âpu kapri sordki alkaia, aiklabaia dukia wala nani sin apia.

⁹ Prîs ba pana witin ra win: —Âu, Goliat sordka ba brisna, Elá ilka bîla ra filisteo ra man mita pura luatma ba. Baha bâra sa ‘‘efod’’ ba ninara, taya ra mangki karbi bâra swin sa. Man baha brih waia sip sma, want sma kaka; kan aiklabaia dukia wala kau âpu sna. Bara Debit pana win: —Sord wala baha wal kau pain ba âpu. Baha aik.

¹⁰ Baha pali yua, Debit takaskras ban Saúl wina plapi wan, Gat kingka, Aquís ra.

¹¹ Sakuna Aquís ra wihta tara nani bâra kan ba aisin: —¡Naha sika Debit, Saúl dukia dadaukra ba, naha tasbaya kingka! Witin dukiara sika dans puli aiwanan: ‘¡Saúl 1,000 waitna nani ikan, bara Debit lika 10,000 ikan!’

¹² Baha bîla nani aisin ba Debit manis luki kaikan, bara Gat kingka Aquís ra sibrin lukan.

¹³ Baha wina witin nani mawanra ai lal saura takan puli kan, kunin dauki sinskas baku dur nani ra lilka nani dauki kan, ai unmaya pura bâk bîla laya taki kan.

¹⁴ Bara Aquís bila wihta tara nani ra win: —Man nani kaikisma naha waitna lal saura takan, ¿dîa muni yang ra bri balram?

¹⁵ ¿Dîa yang na upla lal saura takan ba want sna ki, witin nani na yang ra bri balram bara waitla bîla kat ai lal saura pulaia?