1 Samuil 20 - DAWAN BÎLA AISKA

Janatan bui Debit ra hilp munisa

¹ Debit lika Naiot Ramá tasbaya wina plapan bara Janatan ra wan, witin ra wiaia: —¿Yang dîa daukri? ¿Yang pâtki ba dîa sa ki? ¿Dîa saurka papikam mapara daukri, bara ai ikaia ai pliki ba?

² Janatan pana witin ra win: —¡Gâd baku brin daukras sa kaka, mai ikbia apia! Naha mai wisna na luks, diara tara bara diara sirpi kabia kra sin, sakuna aisiki yang ra ai wiras kira daukras. ¿Dîa tâwan naha bisniska na yang wina yukukbia? ¡Baku kaia lika sip apia!

³ Sakuna Debit kli kli aisi, win: —Papikam kasak tânka brisa, man bui yang ra yamni lukisma ba, bamna witin brin daukras sa man naha tânka brima bara kupia wirha takaia. Sakuna yang lika Dawan nina ra, man ra swer taki aisisna, kau mini kum bukamna ba prura kat taibaia sna.

⁴ Bara Janatan makabi walan: —¿Bamna dîa brin mai daukisa, yang bui man ra dauki maikaia?

⁵ Debit pana win: —Wals, yauhka sika kati raya, liliaka daukaia yua, bahara king wal yang iwi plun piaia sna. Sakuna ai swis yang twi ra yukuwaia wamna, yahwanka tutni kat,

⁶ bara papikam yang dukira makabi walbia kaka, wis man wina aihni adar kum briri yang tawanki Betlehem ra waia, taiya nani sut mani bani sakripaiska dauki ba tilara, witin aikuki lilia briaia.

⁷ Witin ai kupia sauhkbia kaka, man kaikaia sip sma witin pat aima wâl saura ai munaia daukan.

⁸ Baku ba ra naha yamnika na dauki aik, yang pat man dukiam dadaukra sna, yawan wal sin wan uplika kaia, Dawan mawanra swer aisi daukan, nanara aitani, yang pâtkira sna kaka, man mita yang ra ai iks. Kan aitani apia sa papikam ra ai brih waia bara witin mita ai ikaia.

⁹ Sakuna Janatan pana win: —¡Apia, baku lukpara! Papiki ba man ra saura pali mai munaia lukisa kaka, yang tânka brimna bara mai wimna.

¹⁰ Bara Debit makabi walan: —¿Sakuna ya mita ai wibia, papikam ai kupia sauhki mampara saura aisabia kaka?

¹¹ Janatan pana win: —Bal, kaisa yawan wal twi ra waia. Bamna witin wâlsut twi ra wan,

¹² bara Janatan bui Debit ra win: —Yang bui Israel Dawan Gâdka ra luki man ra swer takisna, yauhka bara yahwanka wal bilka ra, naha piua kat trai kaikaisna aisiki lukanka ba kaikaia. Ai daukanka ba mampara pain sa kaka, yang bui man ra maisam pakaisna;

¹³ sakuna papiki saura mai munaia lukisa kaka, Dawan bui yang ra klala karna aikbia maisam paki hilp mai munrika âmyapah plapi swak takras sma kaka. ¡Bara sin Dawan hilp mai munbia, papiki ra hilp munan ba baku!

¹⁴ Bamna pain, sakuna baha piua ra kau raya sna kaka, Dawan yamni mai munan yamnika ba ni yamni ai muns. Yang pruamna kaka,

^15-16 yang taiya nani wal kupiam yamnika ba takaskras ban kabia. ¡Dawan ai traska man waihlam nani ra makabia bara witin nani ba aiska pali sauhki tikbia! Naku natka ra, Janatan bara Debit wal lâ daukan.

¹⁷ Janatan bui Debit ra ai wîna baku latwan kaiki kan ba latwanka mita, witin wal kli swer takan.

¹⁸ Baha ningkara Janatan bui Debit ra win: —Yauhka sika kati raya yua liliaka daukaia, man iwaikam ba bîla baman kabia, sakuna bahara uya kaikbia apia.

¹⁹ Sakuna yu yumhpa ba kat lika man âpu sma ba latan kaikbia, bahamna plaps man bisi yukuwatma ba tasbaya ra kli was, bara walpa nani paskan ba ra dimi yukuwaikam dauks.

²⁰ Yang trisbaya yumhpa lulkamna baha tani ra, sim markka ra lulkisna baku,

²¹ bara albiki ra wimna: ‘Trisbaya ba pliki was.’ Bara yang wimna kaka: ‘Trisbaya nani ba man bâra sma ba lamara plikaia; man was, bara trisbaya nani ba bris’, bara sip sma âmyapah bal takaia, man ra diara saura kum sin takbia apia bamna. Dawan walisa man ra swer takisna ba.

²² Sakuna yang wimna kaka: ‘Trisbaya nani ba bukra tnaya wala ra sa’, man plaps, kan Dawan brin daukisa man mahka wama.

²³ Naha pramiska yawan dauki na, Dawan ba wan witniska kabia piua sut ra.

²⁴ Debit twi ra wih yukuwan, kati raya yua liliaka daukaia piua balan ba ra, king ba tibil ra iwan plun piaia.

²⁵ King ai natka ba baku witin ai iwaika utla tnaya ra ba ra iwan. Janatan ai mawanra iwan, bara Abner lika Saúl tnaya kat iwan. Debit iwaika lika bîla baman kan.

²⁶ Baha yua Saúl diara aisaras kan, witin ba lukan Debit ra diara kum takan tâski kulkan, bara kau klin takras kan.

²⁷ Sakuna yu wala ra, lilia ba pat yu wâl dauki kan, Debit iwaika ban bîla baman bâra kan. Bara Saúl ai luhpia Janatan ra makabi walan: —¿Dîa kan Jesé luhpia ba nahwala plun piaia balras kan, naiwa sin balras ba?

²⁸ Bara Janatan pana aisin: —Debit aihni pali bal yang ra makaban Betlehem ra waia.

²⁹ Makaban wiria sans yamna, ai taya nani sakripais daukaia ba liliaka bahara ai muihni bui win witin sin bâra wabia, baha sanska yamna kaka, witin ai taya nani sut kaikaia sip kabia win. Baha mita naiwa witin nâra king tara ba wal iwi plun piras sa.

³⁰ Bara Saúl witin ra ai kupia baiki win: —¡Yapti saura luhpia waitna! ¿Man lukisma yang kaikras sna, man Jesé luhpia wal uplikam aihwa pali sma ba, man swiram bara mamikam swira lâka sin?

³¹ Witin kau naha tasba ra raya ba ra, man rayakam ba bara kingkam lâka ba sin man dukiam apia sa. ¡Bamna plikaia blîks, bara yang ra bri bal, prura ba witin ai dukia sa bamna!

³² Sakuna Janatan witin ra win: —¿Dîa dukiara witin pruaia sa? ¿Witin dîa daukan sa?

³³ Saúl ai langsika ba alki bukan Janatan ra sabaia, bara baha daukan ba wal witin tânka brin ai aisa ba Debit ra ikaia lukisa.

³⁴ Bara Janatan ai kupia sauhki tibil wina buan, baha yua pata ba sin piras, witin ai kupia wirha tara brin Debit dukiara, ai aisa mita witin ra sin saura pali munan bamna.

³⁵ Yapra wala titan, Debit wal prawaia piua ba aimakan ra, Janatan twi ra taki wan ai albika wahma kum wal,

³⁶ bamna wahma ba ra adar win: —Trisbaya nani lulkamna ba, istikira plikaia plapi was. Alba ba taki plapi kan bara trisbaya ba lulkan kau kainara wih kauhaia.

³⁷ Wahma ba trisbaya kauhan ba kat wan ba ra, Janatan ai karnika aiska ai bîla baikra tara ni winan: —¡Trisbaya ba kau kainamra sa!

³⁸ Janatan kau aima kum ai albika ra winan: —¡Pat muns, plaps, takaskpara! Alba ba trisbaya nani ba wahbi bri sal ai dawanka ra yan,

³⁹ sakuna witin diara kumi sin tânka briras kan, Janatan bara Debit wal baman baha sainka tânka bri kan.

⁴⁰ Ba ningkara Janatan ai trisbaika nani sut ai albika ra yan, bara adar yan mahka tawan ra tawi wabia.

⁴¹ Alba ba mahka wan ba ra, walpa nani paskan ba nina wina Debit bal takan, Janatan mawanra aima yumhpa tasba ra bawan, ai lal tasba kat kangban. Ningkara pana pana kiawalan bara wal inan, Debit sarka ba ban pura lui kan.

⁴² Wal ini si, Janatan Debit ra win: —Âmyapah was, Dawan nina ra yawan wal swer takan ba, yawan makaban Dawan wal lilapas ra ban kaia, wan taya nani bara wan kiamka nani lilapas ra sin. Baha ningkara Debit mahka yabal ra wapan, bara Janatan sin kli tawan ra tawi diman.