1 Samuil 2 - DAWAN BÎLA AISKA

Ana aiwanan ba

¹ Ana naku ai pura sunan: “Dawan, yang kupi ra man ra lilia tara brisni, kan man karniki raya aikisma. Waihli nani mapara aisaia sip sna, kan man tâi baikram bamna. ¡Âu, yang lilia sni!

² ¡Dawan, wala kum man holi sma ba baku âpu sa! Gâd, man wan kahbisma ba baku wala âpu sa: ¡Man wal baku wala âpu sa!

³ Upla kumi sin uba aimayunbiara, upla kumi sin ai wîna tara kulki aisabiara, kan Dawan ba sika Gâd diara sut tânka kaiki ba, bara dîa upla dauki ba, witin paun mangki lâ tânka kat daukisa.

⁴ Karnakira nani pantamangkika ba witin mita sauhkisa, swapnikira nani ra prâk dingki baku karna kaia lâka yabisa.

⁵ Witin nani diara pura luan bri kata ba, nanara plun yuya mana wark takisa; sanglang iwi nani kata ba, nanara aibanhwan sa. Mairin sip luhpa sakras kata ba, nanara luhpa 7 taim baikisa; mairin luhpira kata ba nanara ai luhpias takan.

⁶ Dawan bui upla rayaka saki bara yabisa; witin raiti bîla kat wan blikisa, bara baha wina kli wan buki sunisa.

⁷ Dawan bui umpira wan daukisa, yuyakira sin wan daukisa, wankan kauhisa bara wan bukisa.

⁸ Gâd ba umpira nani ra alki tasba wina bukisa, makakabra umpira nani ba dipasta wina sin, witin nani ra yabisa, wihta tara nani wal iwaia, upla tara kulkan nani ba tilara iwaika ra yan iwisa. Kan Dawan ba sika tasba playka nani bapan ba dawanka, bara baha nani purara sika tasba na mangkan sa.

⁹ Ai uplika kasakkira nani mina taibanka ba witin bui main kaikisa, sakuna saurakira nani ba tihmia tilara prubia, kan upla kumi sin ai karnika ba mita pura lubia apia bamna.

¹⁰ Dawan ba ai waihla nani ba kriki yuya baman daukbia, kasbrika purara ba wina witin nani mapara alwani nani blîkbia. Dawan ba tasba aiska na lâka aisi daukbia; witin sin bâk sakan kingka ra karnika yabia, bara ai karnika ba sin swika pâwi tara takbia.”

¹¹ Baha ningkara Elcaná ai watla Ramá ra kli tawi wan, sakuna tukta ba takaskan Dawan watla ra dukia dauki Elí prîs bui dîa daukaia win adarka ba kat.

Elí luhpia nani saurka ba

¹² Elí luhpia nani ba watawikira nani kan, witin nani Dawan dukiara lukras kan,

¹³ prîs lâka nani, upla kulki kan lâka nani ba sin kulkras; upla kum sakripais dauki ba piua ra, prîs albika waitna kum ba plun sakaia parkka kum ai mihta ra brih balan, wîna piaki kan ba ra,

¹⁴ bara park ba dingkan dikwa sirpi ra bara dikwa tara nani ra sin bara dîa baha parkka ra alkan ba sakan, baha prîs dukia kan. Israel luhpia nani sut Siló ra wan ba baku munan.

¹⁵ Baha purkara sin, wîna batanka ba kau altar ra angkras kan ba ra, prîs albika waitna ba wih bara aisi kan sakripais dauki ba waitnika ra: “Wîna aik prîs ra angki yaia; wîna pat piakan ba bribia apia, sakuna wîna raya ba lika.”

¹⁶ Bara waitnika ba wibia kaka batana ba pas angkaia sna, bara baha ningkara lika man dîa want sma ba saki bri si, bara prîs albika ba bila: “¡Apia, nanara aikaia sma! Aikaia apia kaka, yang karniki ni mihtam wina dakbi brimna.”

¹⁷ Baha wahma nani saurka ba Dawan mawanra saura pali kata, kan Dawan ra prisantka yabi kan ba prisantka ba bahki kulkan.

¹⁸ Sakuna wahma Samuil ba prîs prâka pîska linin ni daukan ba dimi, ai kaina kat Dawan dukia dauki kan.

¹⁹ Mani bani ai yaptika Gâd watla ra wi kan sakripais daukaia, bara prâk purak dimaia kum sipi bri sal yabi kan.

²⁰ Bamna Elí bui Elcaná ra bara ai maya mairin ra sin yamni muni wi kan: “Dawan yamni mai munbia naha mairin wina luhpiam nani kau maikbia, witin baku Dawan wina makaban bamna.” Ba ningkara witin nani ai watla ra kli tawi wan,

²¹ bara Dawan bui Ana ra yamni munan, witin kwihra tiwan, ai luhpia waitna yumhpa bara ai luhpia mairin wâl brin, bara Samuil lika ban Dawan lâka ra pâwi kan.

²² Elí ba pat almuk pali kan, sakuna ai luhpia nani Israel luhpia nani ra dîa dauki kan ba sut wali kan, mairin nani Dawan wal aisaia tintka watla ra wark taki kan aikuki yapi kan ba.

²³ Elí ai luhpia nani ra win: “Upla sut yang ra ai wisa man nani daukankam saura ba dukiara. ¿Dîa muni man nani baku daukisma?

²⁴ Apia pali, luhpi nani, tânka brisma Dawan uplika nani man nani dukiamra aisi tauki ba diara yamni apia sa.

²⁵ Upla kumi upla wala mapara saura daukbia kaka, Dawan ba sip sa witin tâwan aimakaia; sakuna upla kum Dawan mapara saura dauki ba, ¿ya witin tâwan aisabia?” Sakuna witin nani ai aisa bîla walras kan, Dawan sin pat lukan kata witin nani rayaka ba sakaia.

²⁶ Wahma Samuil ba lika ban pâwi kan, bamna upla nani bara Dawan bui sin yamni kaikan.

²⁷ Baha piua prapit kumi Elí kaikaia wan, bara Elí ra win: “Dawan param aisisa: ‘Man damikam nani Idsip ra king fero dukia dauki kan bara yang lika witin nani ra param takri.

²⁸ Man nani bâk mai sakri Israel kiamka sut ba tila wina yang prîski nani kaia, altarki purara sakripais brih balaia, kîa yamni angkaia, prîs prâka pîska ba sin dimaia yang maiwanra. Baha purkara damikam nani ra yâri prisantka nani sut Israel luhpia nani angki ba Dawan ra pain kulkan lâka ba yaia.

²⁹ ¿Dîa muni baha sakripaiska nani prisantka daukaia yang lâ mangkri ba bahki kulkisma? ¿Dîa muni man luhpiam nani ba kau tara kulkisma bara yang ra lika baku apia, Israel luhpia nani yang upliki nani ba prisantka wina kau pain ba pih batanwisma?’

³⁰ Baku bamna, Dawan, Israel Gâdka ba, man bara tamya nani sin ban kaia ra ai dukia dauki kabia win ba, nanara wisa: ‘Yang aisari ba baku ban kabia apia, sakuna ya pain ai kulki ba baha uplika ra yang mita sin pain kulkamni, bara bahki ai kulki nani ba swira daukan kaia lâka ra mangkamni. Yang, Dawan, baha kasak aisisni.

³¹ Piua ba pat baila pali aula sa man karnikam bara damikam nani karnika sin sut slingbamni, man tamya wina kumi sin almuk pali taki prubia apia.

³² Sari lâka bara tuman lâka wal sin kaiki kama, yamnika nani sut yang bui Israel ra daukamna bara man tamya nani wina kumi sin almuk pali taki prubia apia ban kaia ra.

³³ Sakuna tamya nani kum ban altarki lamara swimni, bahara iwi tumi kaia, ai sulka sin sari bri kira, bara kiamkam wala nani sut ba lika ikan kabia.

³⁴ Luhpiam nani Hofní bara Finees wal ba yu kumi ra wâlsut prubia, baha ba kiamkam nani sut baku ikan kabia tukinka man ra.

³⁵ Baha ningkara yang prîs kum kasak wapni ba mangkamni, kupi lâka kat lâ wapni dauki ban wan lukanka witin ra mangkaia sip ba, witin ra kiamka kum yamni bara king kum bâk sakamna ba dukia dauki kabia.

³⁶ Baku bamna, tamya nani tilara raya takaskan ba dukia daukaia mata ai lal bawikira balbia silbar mâ kum bara plun wiria pan dukiara, bik taki kira prîs nani ra wark makabia, baku plun wiria pan piaia mata.’ ”