1 Samuil 17 - DAWAN BÎLA AISKA

Debit ra tara kulkan ba

¹ Juda ra tawan kum nina Socó mâki kan, filisteo suldiarka nani ba bahara aidrubi asla takan war aiklabaia. Socó wihki Azecá wal bilka ra plis kum bâra kan nina ba Efes-damim, bahara ai kiampka bapan.

² Baha piua ra, Saúl bara Israel luhpia nani sin aidruban, bara ai kiampka Elá ilka bîla ra bapi, ridi takan filisteo nani wal aiklabaia.

³ Filisteo nani il kum purara ai watlika dauki brin, Israel luhpia nani sin, il wala ra wal ai mawan kat buan bara lilapas ba il bîla kata.

⁴ Tisku kan war aiklaklabra kum filisteo nani ba tila wina aihni bal takan, ai pâwanka ba 9 pît pura baku bri kan, nina ba Goliat, ai tawanka ba lika Gat wina kan.

⁵ Bras ni daukan sumurka bapi kan, prâka ba sin bras ni daukan prâka dimi kan, prâka ba 125 paun bri kan.

⁶ Ai kuhma prakaika ba sin bras ni daukan kan,

⁷ ai pahpaya ra aiklabaia dusa twilki kan ba sin. Witin ai langsika ba tara, kwala mamaika wilwaika dusa tara kum baku kan, dusa tâura ayanka ba sin 15 paun pura baku kan. Witin tâura ai hilpika ba wapi kan.

⁸ Goliat takaskan bara Israel suldiarka nani ra win: —¿Dîa dukiara man nani aiklabaia bal takram? Yang filisteo kum sna, man nani lika Saúl albika nani, tilam wina kum pliki sâks, bara balbia yang wal aiklabaia.

⁹ Witin ba yang wal aiklabi puri luaia sip sa kaka, yang nani lika man nani albikam takamna; sakuna yang bui pura luamna kaka, man nani ba yang nani albiki takma.

¹⁰ Naha yua ra, yang bui Israel suldiar nani ra bit munisna. ¡Man nani waitna kum saki aik, yang wal aiklabaia!

¹¹ Filisteo bîla aisinka nani ba Israel luhpia nani sut walan, baku sin Saúl walan bara witin nani ai kupia lap tiwan sibrin mita.

¹² Waitna kum bâra kan Betlehem wina, nina Jesé, Saúl piua ra witin pat almuk kan. Naha waitna ai luhpia 8 bri kan, witin nani kumika ba Debit.

^13-14 Ai luhpia almuk yumhpa ba, Eliab, Abinadab bara Samá, witin nani pat war ra wan kan Saúl wal. Ai luhpia sirpika Debit

¹⁵ Saúl kiampka ra wata, bara kli Betlehem ra tawi wan, ai aisa sîpka ba main kaikaia.

¹⁶ Baha piua ra, baha filisteo ba titan bara tutni taki balan yu bani Israel luhpia nani kupia tuskaia, bara yu 40 baku dauki kan.

¹⁷ Yu kumi, Jesé ai luhpia Debit ra win: —Plawar kâkan 22 litro na, brit nani matawalsip na bris bara pat pali kiamp ra was muihkam nani ra.

¹⁸ Naha kwahadu matawalsip na sin brih was, bara kamandanti ba ra yas. Muihkam nani ba sin pain laki kaiks, witin nani ba nahki sa sapa. Bara kli balma taim sturi kasak ba ai wis, witin nani ba kaikram ba ra, pain sa sapa.

¹⁹ Baha piua sut lika Saúl bara Debit muihnika nani ba bara Israel luhpia nani aikuki Elá ilka bîla ra filisteo nani wal unsabi kan.

²⁰ Yapra wala titan pali, Debit buan bara upla wala mihta ra sîp nani ba swin, plun nani ai aisa wina yan ba brih mahka taki wapan. Kiamp ra wan bara kaikan aiklaklabra nani ba pat ridi taki ai pura wini kan aiklabaia waia.

²¹ Israel luhpia nani bara filisteo nani sin wal ai mawan kat wapni lain ra buan.

²² Debit diara nani brih wata ba, plun nani main kakaira ba ra yabi si, lain ra plapi diman, bara ai muihni nani ra makabi walan witin nani pain sa sapa.

²³ Witin kau ai muihni nani wal aisi kan ba ra, baha filisteo aiklaklabra ba nina Goliat, Gat tawanka wina ba, filisteo nani tila ba wina bal takan, bara witin dauki kan ba baku kli Israel luhpia nani ra wini bit munan, bara Debit baha walan Goliat aisi kan ba.

²⁴ Israel luhpia nani bui waitnika ba kang kaikan ba wal, sibrin daukan, mawan wina sut plapan,

²⁵ bara win: “¿Man nani pat kaikram waitnika taki balan ba? Israel ra bit munaia balan, ya witin pura lubia ba king wina ai yuyaka manis witin ra yabia, ai luhpia mairin ba ai maya baikbia bara ai taya nani sut ba ai lal mana sin aibapbia apia.”

²⁶ Debit makabi walan, upla nani ai lamara kan ba ra: —¿Ya naha filisteo na iki, swira lâka ba Israel wina diki sâkbia ba mana, dîa pali baha waitnika ra yabia? Kan, ¿witin na ya sa ki, filisteo idan saura na Gâd rayakira suldiarka nani ra bit munaia?

²⁷ Witin nani dîa tâura aisin ba baku kli win, ya Goliat ikbia ba mana, dîa yaia ba kat yaia sa.

²⁸ Sakuna Eliab, Debit muihnika almuk ba, walan ai muihni waitna nani wal aisi kan ba, witin ra ai kupia sauhki win: —¿Dîa daukaia man nâra balram? ¿Sîpkam nani twi ra ba ya wal swiram? Man kupiam karna, lukankam saura brisma ba kakaira sna, war aiklabi ba kaikaia dukiara baman man nâra balram.

²⁹ Debit pana aisin: —¿Yang na dîa daukri, kan bîli baman aisari ba?

³⁰ Ai muihni wina tnaya ra tawi, bara kli wala ra makabi walan tâura makabi walata ba baku, witin nani sin tâura dîa aisin ba baku kli win.

³¹ Debit makabi wali tauki kan ba tila upla walan bara wih Saúl ra win. Bara Saúl bui Debit ra winan.

³² Bara Debit Saúl ra win: —Upla kumi sin kupia kriwan takaia apia sa, naha filisteo na pâtka ba tâka, yang, man king dukiam dadaukra sna, yang wamna witin wal aiklabaia.

³³ —Man yakan waia sip apia baha filisteo wal aiklabaia —Saúl pana win—, kan man kau wahma pali sma; mampara witin lika waitna takan, wahma wina war aiklabisa.

³⁴ Debit pana win: —Yang, man king dukiam dadaukra, papiki sîpka nani main kaiki kapri ba ra, layan kum alki brih wan kaka,

³⁵ yang nina bliki wih ai bîla wina kli saki bri bal kapri, bara tawi yang ra ai alkaia munan kaka, pana kmakmaya wina alki pruki iki kapri.

³⁶ Baku layan kum bara wingku tara kum sin, yang warkkam dadaukra mita ikatna. Naha filisteo idan na ra sin baku takbia, witin ba Gâd rayakira suldiarka nani mapara bûi bamna.

³⁷ Layan bara wingku tara nani asmala wina Dawan ai dakbi pri ai sakan ba, baku sin baha filisteo mihta wina ai dakbi pri ai sâkbia. Bara Saúl bila win: —Ban kaka, was, Dawan ba man wal wabia.

³⁸ Saúl ai prâka ba Debit ra yan dimaia, bras sumurka ba sin ai lal ra bapan, bara ai lama prakaika ba sin.

³⁹ Bara sin sord ba Debit maisa ra wilkan ai prâka pura bâk, bara Debit mahka wapaia munan, sakuna witin baha sut wal wapi lan apia ba mita, Saúl ra win: —Naha sut purira na wal yang sip wapras, yang naku lan apia. Bara dukia nani ba sut kli sakan.

⁴⁰ Sepad dusa ba bara walpa lalalni matsip tingni ba wina brih, ai sakbatka ra mangkan, ai praukpraukia ai mihta ra, bara Goliat mawanra taki wal ai mawan kat buan.

⁴¹ Filisteo ba kau lamara, kau lamara Debit ra balan. Ai hilpika sin ai kanra wapi kan.

⁴² Filisteo ba Debit ra pain kaikan, witin kau wahma pali, taya ba swapni, pranakira tangni prana baku, mawan painkira, witin ai sîa âpu pali,

⁴³ witin ra win: —¿Dîa yang na yul, bara man dus ni ai prukaia aulma? Bara ai gâdka nina ra Debit ra lahtuban.

⁴⁴ Ba purkara witin ra win: —¡Nâra bal, man wînam ba tnawira nani ra bara daiwan nani ra sin yarka pibia!

⁴⁵ Debit pana witin ra win: —Man bui yang maipara, sord, langsa bara aiklabaia dusa brih aulma, sakuna yang lika man mampara aulna, Dawan karnika sut bri ba Israel kwâra tara Gâdka ba nina ra, baha nani ra man mita bit munram ba.

⁴⁶ Nanara Dawan bui mihti ra mai mangkbia, naiwa yang mai ikamna, lamla sin klaki dakbamna, filisteo aiklaklabra nani wîna ba sin tnawira nani ra bara daiwan nani ra sin yarka pibia. Baku tasba aiska kaikbia Israel ra Gâd kum bâra ba;

⁴⁷ upla sut nâra aidruban na kaikbia Dawan ba sord ni bara langsa ni sin swaki wan sakras. Naha na Dawan warka, witin bui wan mihta ra mai mangkbia.

⁴⁸ Filisteo ba buan bara Debit mapara dimi wan, Debit sin pana plapi filisteo mapara wan.

⁴⁹ Ai sakbatka ra ai mihta dingki, walpa kum sakan, praukpraukia ra mangki filisteo ra lulkan, ai lalkamhka ra diman bara filisteo ai mawanra tasba kat kauhan.

⁵⁰ Baku Debit filisteo ba pura luan, praukpraukia ni walpa kumi bri sabi ikan. Bara sord brih waras kan bamna,

⁵¹ plapi wih filisteo purara buan bara sordka ba alki taya wina saki sordka ni iki, bara ningkara lal ba sin klaki dakban. Bamna filisteo nani kaikan ai tâ uplika aiklaklabra kau pain ba pruan, bara witin nani sut taki plapan.

⁵² Bamna Israel waitnika nani bara Juda waitnika nani sin war winanka wini, nina bliki taki wan Gat dimaika kat, Ecrón dimaika kat sin. Filisteo suldiar nani pruan wîna tara ba Saaraim, Gat bara Ecrón yabalka ra prawi kan kaikan.

⁵³ Filisteo nani ba nina blikan ba ningkara, Israel luhpia nani ba kli tawi bal kiampka ra wih, dukia nani sut brin.

⁵⁴ Bamna Debit lika filisteo lal ba brih Jerusalem ra brih wan, sakuna ai aiklabaia dukia nani kan ba lika ai kiampka ra brih wan.

⁵⁵ Kainara Saúl ba makabi walan kan war wihtka tara Abner ra, witin kaikan Debit ba taki auya kan filisteo ba wal prawaia: —Abner, ¿baha wahma lupia ba aisika ba ya?

⁵⁶ Abner pana win: —King, yang swer takisna baha tânka yang briras. King bila win: —Ban kaka, man baha tânka pliki kaiks.

⁵⁷ Baha win ba mita Debit bui filisteo ba iki si, kli tawi aula kan ba ra, lal ba sin ai mihta ra bri kan. Abner bal witin ba prak brih king Saúl ra brih wan,

⁵⁸ bara witin Debit ra makabi walan: —Ai wis, wahma lupia, ¿man ba ya luhpia sma? Debit pana win: —Yang lika Jesé luhpia, witinka Betlehem wina ba, king dukia dadaukra.