1 Samuil 16 - DAWAN BÎLA AISKA

Debit ba king mangkan sa

¹ Dawan ba Samuil ra win: —¿Ahkia kat man sari ban kaisma Saúl dukiara? Yang brin ai daukras s witin ba Israel kingka ban kabia. Was, aringka brisma ba batana laya ni banhkram, bara brin ai daukisa man Jesé watla ra wama, Betlehem ra, Jesé luhpia nani tila wina kum pat sakri sa king mangkaia.

² —¿Bara yang nahki daukamna waia? —Samuil bila pana win—. ¡Saúl naha sturka na walbia kaka, ai ikbia! Dawan pana witin ra win: —Bîp mairin tiara lupia kum bris, bara wis man Dawan ra sakripais kum dauki yaia auma.

³ Baha pura sunra ra Jesé sin paiws balaia, bahara yang mai wimna man dîa daukaia sma ba, yang bui mamrikamna waitnika ba bara yamni muni king mangks.

⁴ Dîa daukaia Dawan bui win ba Samuil baha daukan. Bara witin Betlehem ra wan ba ra, tawan almukka nani ba ai lakula wiaia bal takan, sakuna witin nani sibri kan, bara witin ra makabi walan: —¿Man kupia kumi lâka brih aulma ki?

⁵ Samuil pana win: —Baku sa. Yang aulna Dawan ra sakripais kum dauki yabaia. Man nani klin taks bara kaisa yang wal waia sakripais ba daukaia. Bara Samuil mita Jesé bara luhpia nani ba klin daukan, ningkara paiwan aikuki waia sakripais daukaia ba pliska ra.

⁶ Witin nani wan ba ra, Samuil kaikan Eliab bâra buisa, bara witin lukan: “Kasak naha waitnika sika Dawan bui bâk sakan king mangkaia ba.”

⁷ Sakuna Dawan bui witin ra win: “Mawan painka ra kaikpara, ai pâwanka ra sin apia, baha sut ba yang bahki kulkri sa. Yang lika waitna diara kaiki ba baku kaikras; upla lika mawan painka ra bamna kaikisa, sakuna yang lika kupia kat kaikisna.”

⁸ Bara Jesé ai luhpia Abinadab wini, Samuil mawanra mangkan, sakuna Samuil aisin: —Naha Dawan bui bâk sakras.

⁹ Jesé ai luhpia Samá bri balan; sakuna Samuil bila: —Naha sin wahbi sakras sa.

¹⁰ Baku baman Jesé ai luhpia waitna 7 ba sut Samuil mawanra mangkan, sakuna witin win naha nani wina kumi sin Dawan bui bâk sakras sa.

¹¹ Baha nani sut kaikan ba ra witin makabi walan: —¿Man luhpiam waitna kau wala brisma ki? Jesé pana wina: —Kau sirpi kumi baman brisna, witin sîp nani main kaikisa. Samuil bila pana win: —Mata blîks, witin ba brih balbia; witin balbia ba kat, yawan naha pura sunra na daukbia.

¹² Jesé ai luhpia ba mata blikan, bara tukta ba brih balan. Tukta pranakira kan taya ba tangni mapla baku, siknis sin âpu, mawan sin pain. Bara Dawan bila Samuil ra win: —Naha sika. Nanara bus, bara yamni muni king mangks.

¹³ Bara Samuil batana laya batilka ba brin, bara muihni nani kaiki kan, wahma ba batana laiki king mangkan, ai nina Debit mâki kan ba. Baha awarka yua wina, Dawan spiritka karnika ba Debit wal kan. Baha warkka sut luan ba ra, Samuil witin nani lakula dauki si Ramá ra wan.

Debit ba Saúl watla ra dukia dauki kan

¹⁴ Dawan spiritka ba Saúl ra lulki swin, bara pirit saura kum Dawan bui blikan, Saúl ra rausauhki kan.

¹⁵ Ai albika nani ai dukia dauki nani ba mita king ra win: —Wan dawanka, man kaikisma pirit saura kum Gâd wina blikan, man ra rau mai sauhkisa.

¹⁶ Baha mita, man bui albikam nani ra adar yas arp kakangbra kum plikaia, bara ani piua ra pirit saura ba man ra rau mai sauhkaia aula ba ra, arp kakangbra ba kangbi kupiam lilia dauki kabia.

¹⁷ Saúl pana win: —Aitani, man nani arp kakangbra pain kum pliki yang ra bri bal.

¹⁸ Bara albika nani tila ba wina kum bui naku win: —Betlehem ra, Jesé luhpia waitna nani ba tilara kum bâra sa, yang kaikisna baha lika arp kakangbra pali sa. Baha purkara, war aiklaklabra kum kupia karna sa, sturi sin sinskira aisisa, mawan pain, witin sin Dawan hilpka brisa.

¹⁹ Bara Saúl upla nani saki, Jesé ra ai bîla blikan, witin ra wiaia: “Luhpiam Debit ba yang ra blîks, witinka sîp main kakaira ba.”

²⁰ Jesé âu win, bara witin biriku kum ra brit prahkan, wain sin daiwan taya batilka kum sunan, guts lupia sin kum sakan. Bara Debit ba Saúl ra blikan, dukia nani ba yabaia.

²¹ Bara Debit baha dukia nani ba brih Saúl mawanra buan warkka dauki watla ra takaskan, Saúl sin witin ra pain kulki witin ai langsika twilkaika win.

²² Saúl ai bîla blikan Jesé ra, witin ra makaban Debit ba witin wal ban swiaia, witin Debit ra yamni pali kaiki ba mita.

²³ Baku kan, ani piua Dawan wina pirit saura ba Saúl ra rausauhkaia aula ba ra, Debit ai arpka alki ba ra mahka kangbi kan; baha wal Saúl kupia ba kli pain taki kan, bara pirit saura ba witin wina swi si auya.