1 Samuil 14 - DAWAN BÎLA AISKA

Janatan pura luanka tara ba

¹ Yu kum kan, Saúl luhpia waitna Janatan ai langsika twatwilkra ra win: —Nâra bal, kaisa yawan awala na lui filisteo nani ra aiklabaia waia. Sakuna witin ai aisa ra lika wiras kan,

² bara Saúl lika il lupia kum ninara dus sâtka kum munhtara aiklaklabra nani 600 aikuki iwi aya taya saki kan.

³ Ahías sika ‘‘efod’’ ba brih waia win kan, Ahitub luhpia bara Icabod tubankika, baha Finees luhpia bara Elí mulika Siló ra Dawan prîska ba. Upla nani lika ai tânka briras kan Janatan pat impakan kan ba.

⁴ Baku bamna, witin trai kaikan filisteo daknika bâra ba kat dimi waia. Yabalka ba walpa tara purara pali wâl ba lilak luaia kan, walpaya tara nani kumi ba nina Bosés bara wala ba Sene,

⁵ yahbra tani walpaya ba ai mawan ba Micmás kat bûi kan, waupasa tani ra walpaya ba ai mawan ba Guibeá kat bûi kan.

⁶ Bara Janatan ai hilpika ra win: —Bus, kaisa tnaya wala ra iwi waia, bara baha idanka nani bâra ba wal prawbia kat. Ban kra Dawan diara kum daukbia yawan wan dukiara, yawan upla ailal kra, upla maura kra kabia, sakuna witin sip sa pura luaia lâka ba wankaia.

⁷ Ai hilpika pana win: —Dîa daukaia lukankam ra brisma ba sut dauks, yang sin ridi sna daukaia lukisma ba tâm baikaia.

⁸ Janatan witin ra win: —Wals, kaisa yawan baila wala ra luaia bara waitnika nani bâra ba kat waia, bara yaka witin nani wan kaikbia.

⁹ Witin nani wan wibia kaka ai bîla kaikbia witin nani yawan ra iwi balaia sa, yawan lika mâyara takaskbia.

¹⁰ Sakuna purara uli bal wan wibia kaka yawan baku daukaia, baha ba sain kum kabia Dawan yawan ra pura luaia lâka wankuya ba tânka.

¹¹ Baku aisin ba ra witin nani wâlsut filisteo nani lamara wih, witin nani ra param takan. Filisteo nani bui witin nani ra kaikan ba ra aisin: “Man nani kaiks, Hibru nani tasba unta ra dimi yukuwan kata ba, nanara taki aula.”

¹² Baku aisin ba ra witin nani wâlsut ra winan: —¡Man nani, yang nani nâra sna na ra uli bal, yang nani diara mai wiaia brisna! Bara Janatan ai hilpika ra win: —Nini blîks, uplika nani na Dawan mita Israel luhpia nani mihta ra mangkuya.

¹³ Janatan ai mina bara ai mihta ni alki wauhi uli wan, ai hilpika sin ai ninara. Janatan bui filisteo ra pruki batakan bara ai hilpika mita sin iki kan.

¹⁴ Baha aiklabanka ra Janatan ai hilpika nani wal, waitna 20 prais ikan baha piua kunhku ra.

¹⁵ Filisteo nani sut bâra kan ba kasak sirang iwan, aiklaklabra daknika tara nani bara sirpi nani sin ai takaskaika ra bâra kan ba, sut sirang iwan. Witin nani aiklabi kan bara tasba ba sin nikbi kan ba ra, prura sibrinka upla ra diman.

¹⁶ Guibeá Benjamín tasbaya ra Saúl aihwawakra ailal bâra kan ba kaikan, filisteo nani ba kupia lap tiwan, ai yabalka tiki tanis baman plapi kan.

¹⁷ Bara Saúl aiklaklabra daknika ra win: —Kulki kaiks ya wan tilara âpu ba. Kulki kaikan ba ra, Janatan ai hilpika wal ai tilara âpu kan.

¹⁸ Baha yua nani ra Gâd lâka watla ba Israel luhpia nani tilara bri kan bamna, Saúl bui Ahías ra win: —Gâd lâka watla ba nâra bri bal.

¹⁹ Sakuna Saúl kau prîs wal aisi kan ba ra, filisteo nani takaski kan ba ra lika sibrin lâka ba kau tara taki kan. Bamna Saúl bila prîs ra win: —Bri balpara.

²⁰ Baha ningkara, Saúl war waitnika nani sut ba asla daukan, bara witin aikuki war aiklabaia taki wan. Sakuna filisteo nani baha prura sibrinka ba mita, pana pana aiklabi klauna iki kan.

²¹ Baha purkara, tila Hibru nani sin mani nani luan ra filisteo nani tilara diman kan ba, baha nani sin nanara kli taki bal, Saúl bara Janatan wal daknika ra bal diman.

²² Bara Israel luhpia nani Efraín ilka tilara yukuwi kan ba filisteo nani plapan sturka ba walan ba ra, witin nani sin taki nina bliki aiklaban.

²³ War ba aiklabi ban Bet-avén kat wan, bara naha piua ra Dawan bui Israel luhpia nani ba swaki sakan.

Saúl swer aisin ba

²⁴ Ban sakuna, Israel luhpia nani baha yua ba swapan pali kan, upla kumi sin plun piras kata, kan Saúl upla sut ra swer aisin ba mita, witin win: “Baha uplika ra naiwa lahtuban kabia witin pas plun pibia kaka, yang bui pas waihli nani ra pana muni pura luras sna kaka.”

²⁵ Aiklaklabra nani ba unta ra diman bara kaikan, nasma laya ba lî laiwi baku kan;

²⁶ sakuna upla kumi sin dabi kaikras kan nasma laya lî laiwi baku kan ba, luki sibri kan ba mita.

²⁷ Sakuna Janatan lika walras kan, ai aisa baku aiklaklabra nani sut nina ra swer taki aisin ba. Bara ai klahkla sakban dus ai mihta ra bri kan ba wal nasma laya ra buski din, bara ai karnika brin.

²⁸ Bara Israel wina aiklaklabra kum ba mita witin ra win: —Aisikam swer taki, upla nani ra win upla kumi sin plun piaia apia, ya plun pibia ba lahtuban kabia. Baha mita upla nani ba swapan pali sa.

²⁹ Janatan pana win: —Papiki upla nani mapara saura daukan, kaiks nahki pain sna nasma wiria dih kaikri ba mita.

³⁰ ¿Naiwa nahki kaia kan ni, plun nani yawan dakbi brin ba sut upla nani ba pin kan kata? ¡Nahki prais kau karna aiklabaia kan, filisteo nani sut âpu daukaia kan!

³¹ Baha yua Israel mita filisteo nani ra ai mina ra taiban, Micmás wina Aialón kat sauhki tikan. Sakuna Israel aiklaklabra nani ba swapan pali kan,

³² bara ai waihla nani wina dukia nani dakban ba ban prak alkan, ai kupia âpu, sîp nani, bîp nani bara bîp luhpia nani ba alki nana dakbi wîna ba raya, tâlia wal ban pin.

³³ Sakuna tila upla Saúl ra wih win: —Upla nani ba Dawan mapara saura daukisa, wîna raya tala wal ban pîsa. Bara Saúl pana win: —¡Man nani lika upla pâtkas ra pât dadingkra nani sma! Walpa tara kum karbi na kat bri bal.

³⁴ Baha purkara, upla nani wal aisas bara wis, witin nani kumi bani ai bîpka wainhka nani bara ai sîpka nani nâra brih balbia, bara man nani bui lal dakbi ikma bara pi banhma. Baha tihmia upla bani, ai wîna kat ai bîpka wainhka brih wan bara bahara ikan, sakuna Dawan mapara saura daukaia apia mata wîna tala bri ba lika piras kan.

³⁵ Saúl, witin lika, altar kum paskan Dawan dukia, baha ba pas witin Dawan mihta ra mangkan.

³⁶ Baha ningkara Saúl daukaia lukan ba: —Na tihmia yawan iwi wap filisteo nani nina blikaia, ai dukia nani sut mihta dakbaia, kumi sin raya swiaia apia, sut ikaia kau ingras ba ra. Upla sut pana win: —Dauks man nahki kau yamni kaikisma ba kat. Sakuna prîs ba bila win: —Diara sut tâura, kaisa Dawan ra pas makabi walaia.

³⁷ Bara Saúl Gâd ra makabi walan: —¿Yang filisteo nani ba nina blikamna ki, witin nani ba Israel luhpia nani mihta ra mangkma ki? Sakuna baha yua Dawan bui witin ra pana aisaras kan.

³⁸ Bamna Saúl bila win: —Aiklaklabra wihtka nani sut laimara bal, bara tânka pliki kaiks naha saurka na ya daukan.

³⁹ Dawan, Israel sasakra nina mâki swer takisna, saurka ba luhpi Janatan daukan sa kaka sin, witin pruaia sa. Aiklaklabra nani kumi sin pana ai un kahbras kan,

⁴⁰ bara Saúl Israel luhpia nani ra win: —Man nani sut baha tani ra baman taws, bara luhpi Janatan ba yang wal baman naha tani ra buamna. Bara dakni ba pana win: —Man nahki kau yamni kaikisma ba kat dauks.

⁴¹ Bara Saúl karna inan: —Dawan Israel Gâdka, ¿dîa kan warkkam dadaukra ra naiwa pana aisaras sma? Pâtka ba yang brisna kaka, apia kaka luhpi Janatan brisa kaka, lat nani lulkamna bara Urim bal takbia; sakuna Israel luhpia nani ba pâtkira sa kaka, lat ba lulkbia bara Tumim bal takbia. Bamna latka ba Janatan bara Saúl wal purara kauhan, bara upla nani ba swak takan baha pâtka ba wina.

⁴² Bara Saúl kli win: —Lat nani kli lulks luhpi Janatan bara yang wal dukira. Bara lat ba Janatan purara kauhan.

⁴³ Bara Saúl Janatan ra makabi walan: —Man daukram ba yang ra damra sâks. Janatan ai dahra sakan: —Âu, kasak aisisni yang nasma laya wiria dabri mihti ra dus bri kapri ba ra buski. Sakuna nâra sna, ridi sna pruaia.

⁴⁴ Saúl inan: —¡Janatan, man pruras sma kaka, Gâd bui yang ra klala karna aikbia!

⁴⁵ Sakuna upla nani Saúl ra win: —¡Nahki baku wiaia aitani kabia, Janatan ba pruaia! ¡Janatan mita sika pura luan lâka tara kum ba, Israel ra yan ba! ¡Baku lika sip apia! ¡Dawan raya ba nina ra, witin ai lal wina tâwa mina kum sin tasba ra kauhbia apia! Naiwa witin diara daukan ba, Gâd hilpka ba mita witin daukan. Baku upla nani ba mita Janatan rayaka ba prura wina swaki sakan.

⁴⁶ Saúl sim baku, filisteo nani nina blikras mahka swin, bara witin nani kli ai tasbaya ra wan.

⁴⁷ Baku, Saúl Israel kingka aimakaia karnika alkan bara anira ai waihla nani bâra kan ba sut mapara aiklabi kan: Moab ra, Amón ra, Edom ra, Sobá kingka bara filisteo nani mapara sin. Ani anira witin wih aiklabi kan ba, sut pura lui kan.

⁴⁸ Aiklaklabra daknika kum ridi daukan bara aiklabi Amalec uplika nani ra pura luan, bamna baku âimplikra nani mihta wina pri sakan.

⁴⁹ Saúl luhpia waitna nani ba naha nani kata: Janatan, Isví bara Malquisúa. Ai luhpia mairin nani nina: Merab, almukka ba, bara Mical, ningka ba.

⁵⁰ Ai maya mairin nina ba Ahinóam, Ahimaas luhpia mairin. Aiklaklabra nani sut wihtka nina ba Abner, Ner luhpia, Saúl tahtika.

⁵¹ Quis, Saúl aisika, bara Ner, Abner aisika, witin nani sut Abiel luhpia nani kan.

⁵² Saúl yua nani sut tilara war ba karna pali kan filisteo nani mapara; baha mita Saúl ba waitna kau karna bara kupia sin karna nani ba ai aiklaklabra nani tilara brin.