1 Samuil 12 - DAWAN BÎLA AISKA

Samuil bui Saúl ra king lâka ba yabisa

¹ Ningkara Samuil Israel uplika sut ra naku aisin: —Nanara man nani kaikisma diara sut yang ra makabram ba maikri, kingkam sin mangki maikri.

² Bahamna nanara witin tâm bribia, yang kau tukta kapri ba yua wina tâm briri na yua kat. Nanara almuk sna, laila sut pihwan, luhpi nani sin man nani tilamra sa,

³ bara nanara man nani nâra ai brisma. Upla kum bîpka wainhka, biriku kra sin dakbi briri kaka, upla kum ra kra taibi munri, rausauhkri, kunin muni yukuki briri kaka, nanara man nani daihra sâks Dawan mawanra bara king mawanra sin, bara yang aibapamna.

⁴ —Man yu kum sin yang nani ra taibi rau ai sauhkras kapram, kunin ai muni duki nani dakbi sin briras kapram —witin nani baku win.

⁵ —Dawan bara witin mita bâk saki mangkan kingka ba sin wâlsut witnis sa, man nani bui yang warkki daukri ba tilara man nani pâtki sakras sma —Samuil aisin. Sut aisin: —Baku sa.

⁶ Baha purkara, Samuil sin upla sut ra win: —Dawan sika ai warkka daukan Moses bâk, Eran bâk sin, damikam nani sut Idsip wina sakan ba.

⁷ Bahamna nanara man nani ridi taks, Dawan mawanra man nani wal aisaia sma, witin ai warkka nani sut man nani wal daukan ba, damikam nani wal sin yamni daukan ba hilp munaia.

⁸ Jekob bara ai kiamka nani sut Idsip ra wih iwan, bara Idsip uplika nani bui rausauhki kan, bara damikam nani Dawan ra winan, bamna witin Moses bara Eran wal saki blikan wan, witin nani ba Idsip wina saki naha tasbaya ra brih balan.

⁹ Sakuna witin nani Dawan ai Gâdka ba ai âuya tikan, bara Dawan mita Sísara, suldiar nani wihtka tara mihta ra mangkan, Jabín ra bâra ba baku king Hasor mihta ra, filisteo nani karnika mihta ra, Moab kingka mihta ra sin mangkan, bara baha nani tawi damikam nani mapara aiklaban.

¹⁰ Sakuna tisku witin nani Dawan mawanra ai tânka brin, Baal bara Astarté lilka nani ra ai pura suni kan ba saura dauki kan. Witin nani pramis taki Dawan ra ai pura sunan, Dawan ra baman mayuni ai pura suni kaia.

¹¹ “Bara baku Dawan ba Jerubaal, Barac, Jefté bara Samuil sin blikan, waihlam nani karnika wina dakbi mai sakaia; bara baku naiwa man nani nâra âmyapah iwaia sip sma.

¹² Sakuna man nani kaikram Nahas, Amón kingka mampara aiklabaia buan ba ra, Dawan Gâdkam man nani kingkam brisma, ban sakuna yang ra makabram king kum mangki maikamna.

¹³ Bamna man nani makabi bâk saki briram kingka ba, nâra brisma, Dawan nanara maikisa.

¹⁴ Nanara diara sut man nani ra yamni wabia, yamni kulkan lâka Dawan Gâdkam ra yama kaka, dukia daukma, witin ra walma, ai lâka bîla nani wali daukma, king ba sin man nani aikuki Dawan nina blîkma kaka.

¹⁵ Sakuna man nani lika Dawan ra walras bara ai lâka bîla nani sin wali daukras kama kaka, witin ba man nani mampara kabia, kingkam mapara sin.

¹⁶ “Baku bamna, nanara buisma ba kat ban bûi bas, aiawpara. Nanara sain tara Dawan bui man nani namkra ra daukuya ba kaikma.

¹⁷ Nanara plawar mâ krikaia piua sa, lî auhras bara mani piua sa, ¿ban apia? Sakuna nanara yang Dawan ra wimna bara witin bui alwani bara lî sin blîkbia, bamna man nani kaikma bara tânka sin brima, man nani saura pali daukram king kum makabram ba.”

¹⁸ Samuil Dawan ra winan ba ra, alwani nani bara lî sin blikan; bamna upla nani baha kaikan sut sibrin takan Dawan ra, Samuil ra sin.

¹⁹ Baku takan ba ra, upla nani sut Samuil ra win: —Dawan Gâdkam ra yang nani albikam nani tâiwan puram suns, bara yang nani pruamna apia; kan saurki nani daukri ba purara kau saurka tara wala pura praki ba sika, yang nani king kum briaia makabri ba.

²⁰ Samuil pana win: —Man nani si bripara. Kasak sa man nani saura daukram ba, sakuna kupiam aiska kira Dawan ra mayunra ba dauki yas.

²¹ Kunin gâdka nani nina blîkpara, baha nani hilp mai munras, swaki sin mai sakras, kan witin nani ba kuninkira nani sa bamna.

²² Dawan bui ai uplika nani ba lulki swibia apia, witin ai nina tara kulki ba tâwan. Dawan brin daukisa man nani ba ai uplika nani kama.

²³ Bara yang maipa ra sin saurka kabia man nani tâmwan puri sunras kamna kaka, baha ba kanra yamni sa, yang mai smalkamna diara kau yamni bara wapni ba daukaia.

²⁴ Dawan bîla ba wali bas kasak luki kira, kupiam aiska witin ai dukia dauki bas, âmya ra luki bas diara tara nani witin bui man nani mamta daukan ba.

²⁵ Sakuna man nani saura ba ban takaskras daukisma kaka, man nani bara kingkam sin sauhki tikan kabia.