1 Samuil 11 - DAWAN BÎLA AISKA

Saúl bui Amón uplika nani ra pura luisa

¹ King Nahas, Amón wina ba, Jabés wina Galaad ra wan bara witin aiklaklabra nani bri kan ba ridi daukan, tawan ba mapara aiklabaia dukiara. Sakuna Jabés uplika nani mita Nahas ra win: —Yang nani wal lâ kum dauks, bara yang nani lika man ra bawamna.

² Nahas Amón wina ba, pana witin nani ra win: —Man nani wal lâ daukamni, sakuna naha natka ra lika, yawan aikuki lâ daukamni bara man nani sut âu wima kaka. Man nani kumi bani namkra aihkika ba daikamna, bara swira lâka Israel purara brih balbia.

³ Bamna Jabés almukka nani sut bila: —Wik kum yang nani ra sans aik, Israel luhpia nani ra bîla na blikaia bara upla nani ra wiaia upla kumi sin yang nani ra hilp ai munras kaka, yang nani mihtam ra aimakamna.

⁴ Bîla twatwilkra nani ba Guibeá ra wan king Saúl tawanka ra, bara sturka ba upla sut kiama ra aisin, upla nani baha walan ba ra, sarikira pali ai bîla baikra tara inan.

⁵ Saúl ba twi wina bîp wainhka nani wal tawi aula kan, bara makabi walan: —¿Upla nani ba dîa trabil brisa? ¿Witin nani dîa mata inisa? Witin nani pana win: —Waitna nani Jabés wina bal aisin sturka ba wal inisa.

⁶ Saúl baha sturka walan ba ra, Gâd spiritka purara bal iwan, bara witin ai kupia sauhkan.

⁷ Witin bîp wainhka wâl brin bara wîna ba sirpi ra taman, bara bîla twatwilkra nani wal Israel aiska ra wîna ba blikan. Bara bîla blikan tânka ba naha kata: “Ya ya kabia, Saúl bara Samuil aikuki war aiklabaia waras kabia kaka, ai bîpka wainhka nani ba naku irban kabia.” Dawan sibrinka ba upla nani ra diman, witin nani waitna kumi baku taki wan, king aikuki asla takaia.

⁸ Bara Saúl ai uplika nani ba Bézec ra kulki kaikan, Israel wina waitna nani 300,000 balan kan bara 30,000 waitna nani Juda wina.

⁹ Bara bîla brih balan waitnika nani ra win: —Jabés uplika nani ra wih wis, yauhka yua wan lal kat ra pat swaki sakan kabia. Waitna nani bîla ba brih wan Jabés uplika nani ra, bara witin nani lilia pali takan.

¹⁰ Bara Nahas ra win: —Yauhka yang nani sut man mihtam ra aimakamna, bara man dîa yang nani wal daukaia lukisma ba kat daukma.

¹¹ Yapra wala ra, Saúl ai uplika nani sut ba dakni yumhpa ra baiki sakan, bara kau lalma kahbras kan pat ai waihla nani lila kat diman kan, bara witin nani ra iki kan, yu wal lal kat. Ya nani kau raya kan ba yakabrira takan, bara witin nani tila wina upla wâl pan asla apia kata.

¹² Bara Israel luhpia nani tila wina Samuil ra makabi walan: —¿Ani uplika nani ba sip kasak lukras aisi kata ba, Saúl wan kingka kaia? Baha waitnika nani sin yang nani mihti ra mangks bara ikaisna.

¹³ Sakuna Saúl witin nani tilak dimi aisin: —Naiwa nâra upla kumi sin ikbia apia, Dawan bui naiwa Israel luhpia nani swaki sakan bamna.

¹⁴ Bara Samuil upla sut ra win: —Bal, kaisa nanara yawan Guilgal ra waia, king lâka ba kli bukaia.

¹⁵ Baku ba ra upla sut Guilgal ra wan, bahara Dawan mawanra, Saúl ba king mangkan. Baha ningkara kli wan uplika takaia bara kupia kumi takaia sakripaiska nani daukan, bara Israel uplika sut sin lilia tara brin.