1 Samuil 10 - DAWAN BÎLA AISKA

Samuil bui Saúl ba Israel kingka mangkisa

¹ Samuil batana laya batil kum brih, Saúl lal ra laikan bara win: —Dawan bui naiwa ai uplika Israel luhpia nani wihtka bâk mai sakisa, ai uplika Israel ra. Man bui witin nani lâka daukma bara ai waihla nani ai kaina kir ba mihta wina sin pri sâkma. Batana mai laikisna na sika Dawan bui wihta mai mangki ba tânka marikisa.

² Nanara man lika yang wina dakwi takuma na, Selsah ra Raquel raitika lamara waitna wâl bâra prawma Benjamín tasbaya ra. Witin nani mai wibia birikukam pliki kapram ba pat sakan sa, nanara aisikam ba biriku nani sarka briras, sakuna man nani sarkam brisa, bara makabi walisa man nani dukiamra dîa daukaia sa sapa.

³ Baha wina kau kainara, Tabor usupumka ba ra wama ba ra, kaikma waitna yumhpa aula Betel ra waia, Gâd ra mayunaia; man lika witin nani wal prawma, kum guts yumhpa kangbisa, wala ba brit yumhpa brisa, yumhpika ba daiwan taya batilka banhki wain twilkisa.

⁴ Witin nani lamkula daukbia bara brit wâl maikbia. Man baha bris.

⁵ Baha ningkara Guibeá Gâd dukia ba ra wama, bahara filisteo aiklaklabra nani bâra ba sin kaiki luma. Bara tawan ba dimaia lamara wama ba ra, prapit nani dakni kum sakripais daukaia watla wina aula spirit diman ba wal prawma. Witin nani aula ba kainara upla nani arp kangbi, drum pruki, plut puhbi bara gitar puli kabia.

⁶ Bara Dawan spiritka karnika man ra maikbia, man sin Gâd dahra aisama bara upla sât wala sin takma.

⁷ Baha diara nani baku man ra takbia ba ra, dîa daukaia lukma ba dauks, Gâd hilp mai munbia bamna.

⁸ Bara Guilgal kainira was; yang bâra wamna man wal prawaia, bahara wîna aiska angkaia, wal kli uplika takaia sakripaiska nani ba sin daukaia. Yu 7 bîli kaiki bas, yang wamna ba kat, bara yang bui mai wimna dîa daukaia sma ba.

⁹ Witin Samuil wina nan dakwi takan ba ra, Gâd bui witin ra lukra raya yan, bara sain nani takaia win, sut baha yua ra baman takan.

¹⁰ Baha ningkara, Saúl ai albika wal Guibeá ra wan, bara prapit nani dakni kum spirit diman ai mapa ra aula kan witin wal prawaia. Bara Gâd spiritka ba Saúl ra sin diman bara witin sin baha nani baku tilara mahka dahra aisin.

¹¹ Sakuna witin ai uplika kakaira almuk nani kan ba kaikan, Saúl sin prapit nani daknika tilara dahra aisi kan, bara witin nani pana pana tawi aisin: “¿Quis luhpia ra dîa takisa ki? ¿Saúl sin prapit nani kumika takan ki?”

¹² Witin nani wina kumi naku makabi walan: “¿Witin nani aisika ba ya sa ki?” Baha wina aisinka kum naku bal takan: “¿Saúl sin prapit nani kumika sa ki?”

¹³ Witin nani dahra aisi swin ba ra, Saúl ai watla ra wan.

¹⁴ Ai tahtika mita witin ra bara albika ra sin makabi walan: —¿Man nani anira waram ki? Pana aisin: —Biriku nani plikaia. Sakuna yang nani pliki sip sakras kapri, bara Samuil ra wari.

¹⁵ Saúl tahtika pana aisin: —¿Bara Samuil man nani ra dîa pali mai win? Pliskam pali, ai wis.

¹⁶ Saúl pana ai tahti ra win: —Yang nani ra param pali ai win, biriku tiwan nani ba pat sakan sa. Samuil sturi wala nani sut aisin ba witin ra win, sakuna king lâka ra mangkaia aisin ba dahra lika wiras kata.

¹⁷ Baha wina Samuil bui Israel luhpia nani sut Mispá ra paiwan Dawan ra mayunaia dukiara;

¹⁸ bahara witin nani ra win: —Dawan, Israel Gâdka ba, naku wisa: ‘Man nani Israel luhpia nani, yang bui Idsip uplika nani karnika wina mai dakbi pri mai sakri, king tasbaya wala nani sin mai taibi kan ba karnika ba wina sin mai dakbi mai sakri.’

¹⁹ Sakuna nanara man nani Gâdkam lulki swisma, sarkam lâka trabilkam nani sut wina witin pri mai sakan, sakuna nanara man nani wisma: ‘King kum mangki aik, yang nani purira aimakbia.’ Bamna nanara Dawan mawanra bal upla kiamka nani sut, taika kumi bani kiamka nani sin.

²⁰ Bara Samuil win Israel kiamka nani ai lamara balbia, bara Benjamín kiamka ra lat ba kauhan.

²¹ Bara Samuil kau ban win, Benjamín kiamka nani ai lamara balbia, bara lat ba Matrí masraka purara kauhan, bara baha wina lat ba Saúl ra kauhan, witinka Quis luhpia waitna ba. Sakuna pliki kaikan bara witin baha nani tilara bâra âpu kan,

²² bamna Samuil Dawan ra kli makabi walan ba ra, Dawan bila win, Saúl bâra sa, sakuna witin diara nani tilara yukuwisa.

²³ Witin nani plapi wan yukuwi ba wina saki bri balaia. Saúl ba upla sut mawanra mangkan, bara kaikan Israel wina waitna kau yari ba âpu kan.

²⁴ Samuil upla sut ra makabi walan: —¿Nanara man nani kaikisma ki, Dawan bui bâk sakan king ba? ¡Israel ra wala kumi sin âpu sa, witin wal praki kaikaia! Bara Israel luhpia nani sut wini aisin: —¡King ba raya ban kabia!

²⁵ Bara baha wina Samuil upla sut ra aisi marikan king lâka nani ba tânka, bara wauhkataya tara ra lâka nani ba ulbi, Dawan watla ra lâka tilara swin. Baha ningkara Samuil adar yaban upla sut ai watla ra mahka wabia.

²⁶ Saúl sin ai watla ra mahka wan Guibeá ra, bara Dawan bui tila waitna kupia karna nani lukanka ra munan Saúl wal waia.

²⁷ Sakuna tila upla nani, lukan saura bri kan ba aisin: “¿Bara naha bui swaki wan sakaisa ki?” Bara witin ra bahki kulkan bara yamni kulkan lâka sin yabi banhras; sakuna Saúl lika ai kupia lukras baku kata.