1 Pita 3 - DAWAN BÎLA AISKA

Marit uplika nani nahki iwi kaia ba

¹ Baku sin, man nani maya mairin nani, mayam waitna nani ra bawi bas, bara baku mika witin nani tila wina kum kum kra, Gâd bîla ba ra kasak lukras kaka, ai maya mairin nani tânka pain ba mita, witin nani kupia alkan kabia. Man nani ba bîla kum pan aisaia sin apia sma,

² kan witin nani kaikbia man nani wataukankam ba sunu kulkanka lâka bri ba.

³ Man nani aiskahkisma ba, lata tani dukia nani kaia lika apia sa, tâmwa aihkakira pitbanka nani kra, gul ni aiskahkaia ba, apia kaka kwala painkira nani dimaia kra sin.

⁴ Sakuna baku daukaia watlika ra, pramna ba kupiam bilara kaia sa; baha painka ba sip tiwras sa, bara baha lika wan spiritka praut âpu bara sâpkira ba sika, baha ba Gâd mawanra kau tara pali sa.

⁵ Naha sim natka ra, patitara piua ra sin mairin holikira nani ba baku aiskahki kan; witin nani Gâd ra luki kan bara ai maya waitna nani ra bawi kata.

⁶ Sara ba baku kan; witin Ebraham bîla kat wali dauki kan, bara witin ra sin “yang dawanki” win. Bara man nani ba witin luhpia mairin sma, diara yamni ba daukma kaka bara diara kumi ra sin sîa âpu kama.

⁷ Man nani, maya waitna nani sin, mayam mairin nani wal diara tânka briaia kat iwi bas. Witin nani ra kulkanka yabi bas, mairin ba kau swapni ba mita baman lika apia, sakuna Gâd ai kupia painka ra, witin nani ra sin pramis daukan rayaka yabaia man nani ra baku. Baku dauki bas bara diara kumi sin puram sunra ba takaskbia apia.

Diara yamni daukan tâwan pât wahwi nani ba

⁸ Tnata ra, man nani sut kupia kumi lâka ra iwi bas; pana pana walkam ra umpira kaiki bas, bara pana pana sin aikuki muihkam baku latwan kaiki bas. Man nani kupiam swapnikira bara bawikira nani bas.

⁹ Saura mai muni nani ba, pana saura munpara, bara saura pali mai wibia kaka sin, pana saura pali munpara. Baku daukaia watlika ra, kau yamni muni bas, kan Gâd bui man nani ba yamnika briaia mai paiwan sa.

¹⁰ Bamna Ulbanka ra naku wisa: “Ani uplika ai rayaka yua nani sut ra lilia bara âuyapah kaia want sa kaka, witin ai twisa ba wilkaia sa saura aisaia apia, bara kunin nani aisi ba sin mahka swibia.

¹¹ Saurka ba wina tnaya ra taki diara yamni daukaia sa; witin kupia kumi lâka pliki, baha nina kat waia sa.

¹² Kan Dawan lika kasakkira nani ba main kaikisa, bara baha nani pura sunra sin walisa; sakuna witin lika saura dadaukra nani mapara sa.”

¹³ ¿Ya mita man nani ra saura mai munbia ki, diara yamni baman piua sut wilin daukisma kaka?

¹⁴ Sakuna man nani rayakam wapni ba tâwan pât wahwi kama kra, kuna lilia kama. Upla kumi ra sin sîa yapara, si bripara,

¹⁵ kuna kupiam nani ra Kraist ra Dawan kulki bas. Piu sut ridi bas, man nani diara bîla kaikanka brisma ba, ya ya mita tânka ba mamkabi walbia kaka, klir pali saki wiaia; sakuna baha ba bawikira bara kulkan lâka dauki bas.

¹⁶ Kupiam dara walra nani ba klir bri bas, bara baku mika ya ya mita man nani Kraist nina blablikra, yamni wataukisma ba mampara saura aisabia ba, ai bîla nani aisuya ba dukiara ai swira lukbia.

¹⁷ Kau pain sa yamni daukan tâwan pât wahwaia, Gâd baku want sa kaka, saura daukan tâwan pât wahwaia ba wal.

¹⁸ Kan Kraist pali, aima kumi baman wan saurka nani dukiara prura pâtka wahwan. Witin lika yamni kan, sakuna yawan saurakira nani na tâwan pruan, Gâd ra wan brih waia dukiara. Witin ba ai wîna tara mapa ra baman pruan, sakuna ai spiritka mapa ra lika kli raya takan.

¹⁹ Ai spiritka ra sin wih baha spiritka nani silak ra nani kan ba ra aisi smalkan.

²⁰ Naha spiritka nani sika patitara piua ra bîla wali daukras kata ba, Noa ba arp watla paski kan ba ra, Gâd lika wihka takaski bîla kaiki kan. Baha bilara tila upla nani aimakan, sut ba ra upla 8 baman, lî mita swaki sakan ba.

²¹ Baha laya ba lika tahbi wan dauki laya ba lilka kan, naha mita sika nanara swaki wan saki ba. Tahbi daukaia lâka ba lika wan wîna ra tâski bri ba sikbi sakaia tânka apia sa, sakuna Gâd ra wan kupia dahra walra klin wankbia makabaia ba tânka sika. Bara swaki wan sakisa Jisas Kraist pruan wina kli buanka bâk.

²² Bara witinka sika kasbrika purara uli Gâd lama pali ra iwi ba, bara insal nani, kasbrika purara karnika bri nani ba, bara karnika wala bri nani ba sut purara sin, witin wihta aimakisa.