1 Kronikas 16 - DAWAN BÎLA AISKA

¹ Gâd lâka auhbaia watla ba bri si tint watla ra dingkan, baha sika Debit bui daukan kata baha dukiara. Ningkara daiwan wîna angki, kîa yamni dauki kan, Dawan wal kli uplika takan lâka ba dukiara.

² Debit bui Dawan ra prisant yabi tnata alkan ba ra, Dawan nina ra upla nani ra yamni munan.

³ Israel uplika sut ra yan, waitna bara mairin nani ra sin, brit kum, kwah mâ lâkan, dus mâ sirpi lâkan turtika daukan ba sin.

⁴ Debit bui Libait nani wahbi sakan Gâd lâka auhbaia watla mawanra wark dauki kaia, witin nani bui tâ briaia, kulkanka yabaia ba dukiara tingki wiaia, Dawan Israel Gâdka ra mayunaia ba sin.

⁵ Lalka pali ba sika Asaf, witin ba wina wala ba Sakaraya, ningkara Jehiel, Semiramot, Jehiel, Matatías, Eliab, Benaías, Obed-edom bara Jehiel, witin nani arp, tramhtram, lunglung nani bri kata, Asaf lika plit sirpi nani ba pruki puli kata.

⁶ Bara prîs nani Benaías bara Jahaziel wal lika, piu bani trumpit ba kangbi kan, Gâd lâka auhbaika watla mawanra.

Tingki wiaia Lawana Debit bui ulban ba

⁷ Baha sim yua ba Asaf bara ai pânika wala nani kira Debit bui adar yabi win, naha tingki wiaia lâka ba Dawan ra mayuni yabia:

⁸ “¡Dawan ra tingki wi banhs! ¡Ai nina mâki wins! Ai uplika nani ra yas kaikbia ai warkka nani ba.

⁹ Lawana nani aiwans, witin ra mayuni. ¡Diara tara nani daukan ba dukiara aisas!

¹⁰ “Ai nina sunu bara pranakira ba dukiara liliam bas. ¡Dawan pliki uplika nani sma ba, kupiam liliam bas!

¹¹ Dawan ba pliks, ai karnika ba sin; piua bani Dawan ba pliks.

¹² Ai warkka tara bara aihkakira nani ba dukiara, kupiam krauki bas, witin bui lâ nani mangkan ba sin:

¹³ man nani lika Israel kiamka albika nani sma, man nani Jekob luhpia bâk sakan nani.

¹⁴ “Witin sika Dawan wan Gâdka ba. ¡Witin sika tasba aiska na wihtka aimaki ba!

¹⁵ Kiamka tausin nani lui wabia kra, dîa witin aisin ba ai âuya tikbia apia,

¹⁶ Ebraham wal lâ daukan ba, Aisak wal aisi daukan ba,

¹⁷ Jekob ra lâ baku mangki yan ba, baha ba Israel ra ban kaia lâ mangki yan sa,

¹⁸ witin aisi win ba ra: ‘Kenan tasbaya ba maikamna man pali dukiam baku.’

¹⁹ “Witin nani ba wiria baman sa sakuna, impapakra nani kulki baman tasba ra,

²⁰ witin nani ba ban impakisa kuntri kum wina kuntri wala ra, king tasbaya kum wina king tasbaya wala kat.

²¹ Dawan bui yan upla kumi bui sin saura munras kan, baha purkara king nani ra sin kupia kraukan:

²² ‘Yang bui bâk sakri uplika nani ra kangpara, prapitki nani ra sin saura munpara.’

²³ “Tasba aiska ra iwi nani sma ba, Dawan ra aiwans, witin swaki sakanka lâka ba yu bani maisa paks.

²⁴ Aisas ai prana ba dukiara, witin aihka ba tânka nani ba dukiara sin, upla nani sut mawanra, bara kiamka wala nani mawanra sin.

²⁵ Kan Dawan ba tara pali sa, aitani sa witin ra mayunan kaia ba, gâd nani wal kau sibrinkira sa.

²⁶ Upla wala nani gâdka nani ba lika bahki yus âpu nani sa, sakuna Dawan bui lika kasbrika pura ba paskan sa.

²⁷ ¡Ai mawanra prana tara bâra sa! ¡Witin ai iwaika sunukira ra karnika bâra sa, lilia lâka sin bâra sa!

²⁸ “Upla nani sut bui Dawan ra yas, karnika bara liliaka lâka ba sin.

²⁹ Dawan ra mayunra lâka yaia ba yas, man nani diara prisantka yaia dukia nani ba wal, witin mawanra bus. Dawan ra mayuni banhs witin ai pliska holikira ba ra.

³⁰ ¡Tasba aiska, witin ai mawanra tatatwi kabia! Witin bui tasba bapan, nikwan kaia apia dukiara.

³¹ ¡Kasbrika pura bara tasba ba sin lilia takbia! Kiamka wala nani ra wibia: ‘¡Dawan ba king sa!’

³² ¡Kabu tara ba dîa bilara bâra nani ba sut sin bin tara daukbia! ¡Tasba ba bara dîa bilara bâra ba sin lilia takbia!

³³ ¡Unta ra dus nani pâwi ba, lilia binka daukbia, Dawan witinka naha tasba wihtka aimakaia aula ba mawanra!

³⁴ “Dawan ra tingki wis witin ba yamni sa bamna ai latwanka lâka ba ban kaia ra sa.

³⁵ Witin ra wi banhs: ¡Dawan swaki wan sasakra sma ba, swaki wan sâks! ¡Kiamka wala tila ba wina wahbi wan sâks, baku mika ninam sunukira ra mayuni banhwamna, liliakira sin mamyuni banhwamna!

³⁶ ¡Dawan ba yamni pali kabia, witinka Israel Gâdka ba ban kaia ra!’’ Bara upla nani sut bila win: “¡Baku kabia!” Bara Dawan ra mayuni banhwan.

³⁷ Baku bamna, Gâd wal lâ daukan watla ba mawan tani ra, Debit bui swin Asaf bara witin wal tauki uplika nani witin nani bahara ban wark dauki kabia, yu bani dîa brin dauki ba kat.

³⁸ Baku sin Obed-edom ba sin bahara swin, witin wal tauki uplika nani wina 28 nani, Obed-edom wal, Jedutún luhpia, bara Hosá, baha nani ba dur aihwawakra nani baku.

³⁹ Baku sin prîs Sadoc bara prîs wala nani ba Gâd lâka auhbaia watla mawanra swin sunukira pliska ra, Gabaón ra,

⁴⁰ piua bani daiwan wîna angki Dawan ra yabi kaia, baha daiwan wîna angkaia pliska dauki, witin nani ra yan ba pliska purara, titan ra bara tutni ra, Dawan lâka ra dîa ulban ba kat, lâ mangki Israel ra yan ba kat.

⁴¹ Baku sin witin nani wal swin, Hemán, Jedutún bara wala nani wahbi sakan kata ba naku aiwanaia dukiara: “Dawan ra tingki wi banhs, kan ai latwanka lâka ba ban kaia ra sa.”

⁴² Naha nani ba lilia binka daukaia dukia nani ba kangbi kata: trumpit nani, plit sirpi nani bara kangbi pulaia dukia wala nani sin, Dawan ra aiwanaia dukiara tâ baiki dukia nani ba sin. Jedutún luhpia nani ba lika dur ra aihwaki banhwi kata.

⁴³ Baha ningkara, sut mahka kli ai watla nani ra tawi wan; bara Debit sin ai watla ra wan, ai watla uplika nani ra yamni munaia dukiara.