1 Kronikas 15 - DAWAN BÎLA AISKA

Debit bui Gâd lâka auhbaia watla ba Jerusalem ra brih wan

¹ Debit Tawanka ra Debit bui utla nani yan paskan, baku sin Gâd lâka auhbaia watla ba dukiara plis kum ridi daukan, bahara tint watla kum sin bapan.

² Bamna lâ mangkan: “Upla kumi sin watla ba twilkaia apia, Libait nani baman lika. Kan Dawan bui baha uplika nani ba wahbi sakan sa, Dawan lâ auhbaia watla ba twilki brih waia bara sin piua bani ai warkka tilara ban kabia.”

³ Ningkara Israel luhpia nani sut Jerusalem ra asla daukan, Gâd lâka auhbaia watla ba pliska ridi daukan ba ra brih waia dukiara.

⁴ Baku sin Eran kiamka nani bara Libait nani ba sin asla daukan.

⁵ Quehat kiamka nani ba asla daukan kata 120, Uriel ba lalka pali, bara ai taika nani ba sin.

⁶ Merarí kiamka wina 220, Asaías ba lalka, bara ai taika nani ba sin.

⁷ Guersón kiamka wina 130, Joel ba lalka, bara ai taika nani ba sin.

⁸ Elisafán kiamka wina 200, Semaías ba lalka, bara ai taika nani ba sin.

⁹ Hebrón kiamka nani wina 80, Eliel ba lalka, bara ai taika nani ba sin.

¹⁰ Uziel kiamka wina 112, Aminadab ba lalka, bara ai taika nani ba sin.

¹¹ Ningkara Debit bui paiwan prîs Sadoc bara Abiatar wal ra bara Libait nani ra sin: Uriel, Asaías, Joel, Eliel bara Aminadab,

¹² bara witin nani ra win: “Man nani ba Libait taika nani lalka nani sma, lâ ba kat sunu taki banhs tamya nani sut aikuki; baku mika sip kabia Gâd lâka auhbaia watla ba brih balaia, Israel Gâdka ba, baha pliska ridi daukri ba ra.

¹³ Tâura man nani baku dauki banhras kapram, Dawan wan Gâdka yawan wan tila wina rayaka sakan, kan dîa daukaia ba dukiara yawan witinka ra tânka plikras kan ba mita.”

¹⁴ Bamna Dawan, Israel Gâd lâka auhbaia watla ba brih waia dukiara, prîs bara Libait nani sut sunu taki banhwan.

¹⁵ Libait luhpia nani bui Gâd lâka auhbaia watla ba dus nani dingki, ai pahpaya ra twilki brih balan, Dawan bui dîa Moses ra win ba kat.

¹⁶ Baku sin, Libait tâ bri uplika nani ra Debit bui win, ai kiamka nani ba tila wina aiwawanra nani sâkbia, lilia binka daukaia dukia nani kira, tramhtram tara nani, lunglung tara nani, plit sirpi nani bara ai âuyapah kira kangbia bara lilia tukinka kabia.

¹⁷ Libait nani wina sakan ba: Hemán, Joel luhpia ba, baku sin Asaf, Berequías luhpia ba, Hemán taika ba; Merarí taika nani wina, kainara kata taika nani wina, Etam, Cusaías luhpia ba;

¹⁸ baha purkara kainara kan taika nani wina sin sakan, wark dadaukra nani ningka dingki ra kulkanka bri ba: Sakaraya, Jaaziel, Semiramot, Jehiel, Uní, Eliab Benaías, Maaseías, Matatías, Elifelehu, Mecneías bara dur main kakaira nani Obed-edom, Edom bara Jeiel.

¹⁹ Aiwawanra nani Hemán, Asaf bara Etam lika, bras plitka nani ba ni bin daukaia witin nani ai warkka kan.

²⁰ Sakaraya, Aziel, Semiramot, Jehiel, Uní, Eliab, Maaseías bara Benaías, witin nani sut lika gitar tara nani bri kata, Elam uplika nani kangbi ba baku kangbaia,

²¹ bara Matatías, Elifelehu, Mecneías, Obed-edom, Jehiel bara Azazías lika tramhtram awa matawalsip ba bri kan, siminita nani kangbras ba kangbaia dukiara lawana aiwanaia tâ bukaia piua ra.

²² Quenanías, Libait nani lalka ba, impaki taukaia dukia nani lalka kata, witin sika tâ bri kata, kan witin bui tânka pain bri kata.

²³ Baks durka âialkra ba lika Berequías bara Elcaná wal kata.

²⁴ Bara prîs nani ba Sebanías, Josafat, Natanael, Amasai, Sakaraya, Benaías, bara Eleazar, witin nani lika Gâd lâka auhbaia watla ba tâura trumpit nani puhbi kata. Obed-edom bara Jehías sin Gâd lâka auhbaia watla durka âialkra nani kata.

²⁵ Bamna Debit, Israel almukka nani bara war aiklaklabra daknika nani lalka sut liliakira aidrubi wan, Gâd wal lâ aisi daukan watla ba, Obed-edom watla wina saki brih waia.

²⁶ Dawan bui Libait nani ra tâ baiki kan, Gâd lâka auhbaia watla ba twilki brih waia, kîa yamni angki yan, bîp wainhka nani sakan ba, 7 pura kumi bara sîp wainhka 7.

²⁷ Debit ai kwalka dimi kan ba, linin kwalka pain aihwa kata; baku sin Libait nani Gâd lâka auhbaia watla twilki kan nani ba sin, aiwawanra nani ba sin, Quenanías uplika lawana aiwanaia tâ bri nani kan ba sut sin. Bara Debit linin kwalka ni ai pura prakan kata.

²⁸ Baku natka ra Israel luhpia nani sut bui Gâd lâka auhbaia watla ba brih auya kata. Lilia wini, sîp aringka puhbi, trumpit nani bara plit sirpi nani binka kira, bara tramhtram tara, arp binka sut ba wal.

²⁹ Gâd lâka auhbaia watla ba Debit Tawanka ra wan bara; Saúl luhpia mairin Mical ba windarku taki kaikan, king Debit ba liliakira srutwi puli kan ba, bara witin baha dukiara saura luki kaikan.