1 Kronikas 12 - DAWAN BÎLA AISKA

Debit wal aisi asla takan ba

¹ Debit ba kau Quis luhpia, Saúl mawan wina yukuwi tauki kan piua ra, war waitnika kupia karnakira nani dakni kum Siclag ra wan wal asla takaia dukiara.

² Naha war waitnika nani na pantamangka nani bri kan; witin nani praukpraukia wal walpa lulkaia sip kan, trisbaya nani lulkaia sin sip kan, ai mihta aihkika ni, apia kaka ai smihka ni. Saúl taika nani, Benjamín kiamka wina:

³ Ahiézer, lalka aimaki ba, bara Joás, Semaá luhpia ba, witin nani Guibeá wina kan; Jeziel bara Pélet, Azmávet luhpia nani; Beracá bara Jehú, witin nani ba, Anatot wina kan;

⁴ Ismaías, Gabaón uplika, kupia karnira 30 nani ba kumi kan bara baha nani lalka kan; Jirimaya, Jahaziel, Johanán, Jozabad Guederá wina ba,

⁵ Eluzai, Jerimot, Bealías, Semarías; Sefatías, harufita ba;

⁶ Elcaná, Isías, Azarel, Johézer bara Jasobeam, Coré uplika nani;

⁷ bamna Joelá bara Zebadías, Jeroham Guedor wina ba luhpia nani.

⁸ Baku sin Gad kiamka wina kum kum Debit tnaya ra tawi wan, upla iwras tasbaya ra kan kahbaika pliska ba ra. Baha nani ba war uplika kan, war dukia sâtka nani bri kan ai kaina kahbaika bara langsa sin. Mawan nani ba layan mawan baku kan, witin nani sîa sula baku il nani bâk plapi kan.

⁹ Naha nani kata: Pas ba Éser; wâlka ba Abdías; yumhpika ba Eliab;

¹⁰ walhwalka ba Mismaná; matsipka ba Jirimaya;

¹¹ matlalkahbika ba Atai; matlalkahbi pura kumika ba Eliel;

¹² matlalkahbi pura wâlka ba Johanán; matlalkahbi pura yumhpika ba Elzabad;

¹³ matawalsipka ba Jirimaya, bara matawalsip pura kumika ba Macbanai.

¹⁴ Naha Gad kiamka nani ba war aiklaklabra nani lalka kan. Kau sirpika ba war aiklaklabra 100 lalka kata, almukka ba lika 1,000 nani lalka kan.

¹⁵ Naha nani sika mani pas katka ra, Jordan ba puswi luan, awala ba un kat pupuhkan kan piua ra; bara twi ra banhwi kan ba sut munan plapi banhwan, lalma bara muna tani ra.

¹⁶ Baha purkara waitna nani kum kum Benjamín Juda wal kiamka wina Debit ra asla prawan, kan kahbaika pliska bâra kan ba kat.

¹⁷ Debit bûi taki wan wal prawaia, bara win: “Man nani ba yang ra balram sa kupia kumi dukiara; bara tâi baikaia, baku sa kaka, kupi aiska ni mai brisna bal yang wal asla taks; sakuna kunin ai muni waihli nani mihta ra ai mangkaisma kaka, yang pali bui diara saura kumi sin daukras sna, ¡wan almukka nani Dawanka bui baha ba kaiki bara klala yabia!”

¹⁸ Bara Amasai, 30 nani lalka ba, spirit witin nani ra iwan bara winan: “¡Debit, Jesé luhpia, kupia kumi lâka kabia man ra! ¡Kupia kumi lâka ba ban man wal kabia! ¡Kupia kumi lâka man ra bara baha nani hilp mai muni nani ba ra sin, kan Dawankam ba man ra tâm baikan sa!” Debit baha nani ba yamni brin bara war aiklaklabra daknika nani lalka tilara brin.

¹⁹ Baku sin Manasés kiamka wina kum kum ba Debit ra wih asla takan, Debit ba filisteo nani tilara wih takaski Saúl mapara aiklabaia ridi takan ba ra. Sakuna Debit bui filisteo nani ra tâ baikras kata, ai lalka nani ai kupia kraukanka kum brin, naku aisi: “¡Yawan klauna wan lal nani tâka mita, ai mâsika Saúl ra tawbia! Bamna mahka blikan wan.”

²⁰ Manasés kiamka wina waitna nani Debit wal asla takan kan ba, bara wal aikuki Siclag ra wan ba naha nani kata: Adná, Jozabad, Jediael, Micael, Jozabad, Elihú bara Siletai witin nani ba Manasés war aiklaklabrika nani wihtka tara nani kan.

²¹ Naha nani bui sika Debit ra hilp munan, war aiklaklabra tâura aimaki; kan witin nani sut ba, war uplika kupia karnira nani kan, baha purkara war aiklaklabra nani wihtka nani kata.

²² Yu bani Debit ra kau war uplika nani wih, witin ai daknika ra asla taki kan; war aiklaklabra daknika tara takan, war aiklaklabra daknika karnakira pali takan kata.

Debit aiklaklabrika nani daknika ba

²³ Naha nani sika war waitnika nani, war aiklabaia Debit wal asla takan kan ba Hebrón ra, Saúl kingka lâka Debit ra laki yaia dukiara, Dawan aisanka ba kat.

²⁴ Juda kiamka wina 6,800 waitna nani, kaina kahbaika bara langsa nani ba kira ridi daukan, war aiklabaia ba dukiara.

²⁵ Simian kiamka wina 7,100 waitna nani kupia karnira nani ba ridi takan war aiklabaia.

²⁶ Libai kiamka wina 4,600,

²⁷ Eran kiamka wina sin 3,700, ai lalka Joiadá wal,

²⁸ bara Sadoc wal sin, waitna wahma, kupia karna, taika nani wina 22 lalka nani aikuki.

²⁹ Benjamín kiamka nani wina, baha nani Saúl kiamka ba, baha nani wina 3,000 waitna nani, kan witin nani aihkika ba Saúl ra kasak kulki kan.

³⁰ Efraín kiamka wina 20,800 war aiklaklabra nani, kupia karnakira nani, ai taya nani tila kat.

³¹ Manasés kiamka wina bakriki prais, 18,000 ridi daukan kata, wih Debit ba king mangkaia.

³² Isacar kiamka wina, upla daknika kum diara tânka kakaira nani, Israel uplika dîa daukbia ba nu kaia dukiara, 200 lalka nani, ai kiamka waitnika nani aiska witin wal kan ba.

³³ Zabulón kiamka wina 50,000 waitna nani, war aiklabaia dukia sât sât bri ba kasak pali wilin luki ba Debit ra tâ baikaia.

³⁴ Neftalí kiamka wina, lalka nani 1,000 bara witin nani wal aikuki 37,000 aiklaklabra nani ai kaina kahbaika bara langsa nani kira.

³⁵ Dan kiamka nani wina 28,600 war aiklaklabra nani.

³⁶ Aser kiamka wina 40,000 war waitnika nani.

³⁷ Baha purkara, Jordan baila wala ba wina, 120,000 waitna nani, Ruben, Gat, bara Manasés kiamka bakriki ba wina, war aiklabaia dukia sât sât brih ridi takan.

³⁸ Naha war waitnika nani sut ba, war aiklabaia natka kat ridi taki witin nani sut Hebrón ra aidrubi wan, ai kupia aiska luki kira, Debit ba Israel aiska purara king mangkaia; Israel uplika wala nani ba sut sin, baku lukanka bri banhwi kata.

³⁹ Witin nani bahara Debit wal kan yu yumhpa, plun pi diara sin di kan, kan ai muihni nani bui ridi daukan kan ba mita.

⁴⁰ Baha purkara tawan nani lamara banhwi kan nani ba, ban sin Isacar, Zabulón, Neftalí bui sin plun nani bri si yabi kan, biriku, kiamil, muyul, bîp bul nani ra plun nani sât sât suni bri si yabi kan, plawar, kwah damni turtika, wain lâwan, batana, bîp bul nani bara sîp nani kwahki kan, kan Israel ra uya lilia lâka kan ba mita.