1 Kronikas 11 - DAWAN BÎLA AISKA

Debit, Israel bara Juda kingka ba

¹ Israel luhpia nani sut asla taki Hebrón ra wan, Debit wal aisaia. Bahara witin nani bui win: “Yang nani sut na man wal tala kumi atia sna,

² bamna kasak pali, Saúl ba king kan, sakuna man bui sika Israel ba war ra brih wi kapram bara kli sin brih bal kapram ba. Baha purkara, Dawan Gâdkam ba, witin bui sin pramis mai munan man ba Israel luhpia nani tâ brima bara wihtka tara aimakma.”

³ Naku natka ra, Israel almukka nani sut ba, king Debit wal aisaia wan Hebrón ra, bara witin baha nani wal lâ kum daukan, Dawan ba ai witniska mangki. Bamna witin nani bui Debit ra batana laikan, Israel kingka kaia, Dawan bui dîa Samuil ra pramis munan kan ba baku.

Saion kan kahbaika pliska bri kan ba Debit alki brin

⁴ Debit bara Israel luhpia nani sut aikuki impakan Jerusalem ra, baha ba Jebús mâki kan. Jebús uplika nani ba baha tasbaya ra iwi kan.

⁵ Bara Debit ra naku aisi banhwan: “Man nahara sip dimma apia.” Ban sakuna, Debit mita Saion kan kahbaika pliska bri kan ba pura lui dakbi brin, naiwa baha ba Debit Tawanka mâkisa

⁶ Bara Debit bui win kata: “Ani uplika pas Jebús uplika nani mapara wih aiklabia ba sut, lalka tara pali mangkamna.” Bara pas upla wih aiklaban ba Joab kata, Seruiá luhpia waitna ba, bara witin ba lalka tara mangkan kata.

⁷ Ba ningkara, Debit baha kan kahbaika pliska ba kat ai pliska dauki mahka iwan; baha mita sika Debit Tawanka mâki ba.

⁸ Bara Debit bui tawanka tnaya kir ba paskan, tasba yakabi daukan pliska ba wina kutbanka pîska aiska ba kat. Bara kau tâka kan ba Joab bui paskan.

⁹ Bamna Debit karnika ba kau tara taki kan, bara Dawan karnakira ba sin witin wal kan.

Debit suldiarka kau pain nani ba

¹⁰ Naha nani sika Debit war aiklaklabrika kau yamni nani kan ba, kingka lâka tâ baiki kan ba Israel luhpia nani sut aikuki, asla king mangkaia dukiara, Dawan dîa aisin ba kat.

¹¹ War aiklaklabra kau pain nani Debit bri kan ba kulkan nina ba: Jasobeam, Hacmoní luhpia, kau kupia karnira nani yumhpa kan ba lalka, piu kum ai langsika ni waitna 300 ikan.

¹² Baha ningkara, wala ba lika Eleazar, Dodó luhpia, witinka ahohíta ba, naha sika yumhpa ba wina kau kupia karnakira kan ba.

¹³ Witin sika Pas-damim ra Debit wal kan ba, bahara kan piua ra sika filisteo nani asla takan aiklabaia. Bahara sin barli mâ nasla kum daukan kata, bara Israel war aiklaklabra daknika nani ba filisteo nani sîa plapan ba ra,

¹⁴ witin insla lila ba kat takaski, mapara bapi bri aiklabata bara filisteo nani pura luan. Baku Dawan bui pura luaia karnika ba yan.

¹⁵ Yu kum, 30 kupia karnira nani ba tila wina yumhpa asla taki wan Debit wal prawaia Adulam untika ra. Baha twiya kir ba filisteo war aiklaklabrika nani ba ai kiampka paski bri kan Refaim ilka bîla ba ra.

¹⁶ Bamna Debit lika baha kan kahbaika pliska ba ra kan, baha piua ra sin filisteo war aiklaklabra daknika kum Betlehem ra kata.

¹⁷ Bara Debit ai brinka ba aisin: “¡Ban kra upla kum mita Betlehem dimaika ra liwanhta bâra ba wina, lî sal aikka dimna sa kaka!”

¹⁸ Bamna baha waitna kupia karnira yumhpa ba filisteo nani kiampka ra dimi wan, bara Betlehem dimaika ra liwanhta bâra ba wina lî saki sal, Debit ra yan. Sakuna Debit baha laya ba din daukras kan, kau ni laiki Dawan ra mana luha yabi baku yan,

¹⁹ bara aisin: “¡Dawan bui yarka naha wina dimna apia! ¡Laya na lika naha waitnika nani tâlia disna baku sa, kan witin nani ai rayaka ba pât ra mangki wih, naha laya na bri balan!” Bamna din daukras kata. Naha warkka tara na lika waitna yumhpa kupia karnakira nani ba daukata.

²⁰ Abisai, Joab muihnika ba, war aiklaklabra 30 kupia karnira nani kan ba lalka kata. Piua kum waihla nani 300 mapara wih aiklabi, ai langsika ni sut ikan. Baku sika witin kulkanka lâka ba brin baha 30 ba tilara,

²¹ bara mayunra lâka kau tara sin brin baha nani sut tilara, ban baha nani lalka sin aimakan. Sakuna tâura yumhpa kata ba wal lika baku daukras kan.

²² Benaías, Joiadá lupia, Cabseel tawanka wina, witin ba waitna kupia karnira pali kata, diara ailal dauki pura luata. Witin mita Ariel Moab wina luhpia waitna wâl ba ikan. Yu kum lî klaswan kauhi kan piua ra, liwanhta kum ra dimi wih, baha bilara layan kum ikan.

²³ Baku sin Idsip waitnika yari tara kum ra ikan, waitnika ba kulkan yar matsip bri kan, bara witinka ba langsa kum brih aula kan ba tatwa pali bara Benaías ba mapara wih aiklaban dus pîs raun kum wal; bara baha dusa ni waitnika tara ba mihta wina langsika ba dakbi, baha sim langsika ni sabi ikan.

²⁴ Joiadá luhpia Benaías, naha daukan ba mita, kupia karnira nani 30 bara tilara kulkan.

²⁵ Witin ba mayunra kau tara brin, sakuna baha waitna tâura yumhpa nani ba aikuki baku kulkanka yaras kan. Bara Debit bui war aiklaklabra witin wal tauki nani ba lalka mangkan.

²⁶ Waitna kupia karnira nani kan: Asael, Joab muihnika; Elhanán, Dodó luhpia, Betlehem wina ba;

²⁷ Samot Harod wina ba; Heles, Paltí uplika ba;

²⁸ Irá Iqués luhpia ba, Tecoa wina, Abiézer, Anatot wina;

²⁹ Sibecai, Husá wina; Ilai, ahohíta ba;

³⁰ Maharai, Netofá wina; Baaná luhpia Héled, witin sin Netofá wina kata;

³¹ Itai, Ribai Guibeá wina luhpia ba, witin ba Benjamín tasbaya ra sa; Benaías Piratón wina ba;

³² Hidai, Gaas tingnika ba wina; Abiel, Arbata uplika nani wina ba;

³³ Azmávet, Bahurim wina ba; Eliahbá, saalbonita ba;

³⁴ Jasén luhpia nani ba, witinka guizonita ba; Janatan, Sagué luhpia, ararita ba;

³⁵ Ahiam, Sacar luhpia, witin sin ararita ba; Elifal, Ur luhpia ba;

³⁶ Héfer, mequeratita ba; Ahías, pelonita ba;

³⁷ Hesrai, Carmel wina ba; Naarai, Esbai luhpia ba;

³⁸ Joel, Natán muihnika ba; Mibhar, Hagrai luhpia ba;

³⁹ Sélec, Amón uplika ba; Naharai, Berot wina ba, witin ba sika Seruiá luhpia war aiklabaia dukia nani bri Joab ra tâ babaikra ba;

⁴⁰ Irá, Jatir wina; Gareb, witin sin Jatir wina kan;

⁴¹ Urías, hitita ba; Zabad, Ahlai luhpia ba;

⁴² Adiná, Zizá luhpia ba, Ruben uplika nani lalka ba, bara witin ba wal 30 waitna nani;

⁴³ Hanán, Maacá luhpia ba; Josafat, Mithan uplika ba;

⁴⁴ Ozías, Astarot wina ba; Samá bara Jehiel, Hotam Aroer wina ba luhpia nani;

⁴⁵ Jediael, Simrí luhpia, bara ai muihni Johá wal, witinka tizita uplika ba;

⁴⁶ Eliel, Mahanaim wina; Jerebai bara Josavía, Elnáam luhpia nani; Itmá, Moab uplika ba;

⁴⁷ Eliel, Obed bara Jaasiel, Sobá wina ba.