1 Korint 16 - DAWAN BÎLA AISKA

Wan muihni nani dukiara lalah sakan ba

¹ Bara nanara lika aisisna, Gâd uplika nani Judia ra ba dukiara prisant nani saki blikaia ba; Galesha tasbaya sertska nani ra daukbia wîri ba baku dauks.

² Wik bani yua pas pali ra, man nani kumi bani lalah wiria tnaya ra laki swiaia sma, dîa pura sakan ba praiska kat; bamna baha ba suni bri bas, bara baku mika yang balamna ba ra, man nani lalah plikaia apia kama.

³ Bara yang balamna ra, ani uplika man nani mita bâk sâkma ba, baha nani mihta ra wauhkataya nani mangki yang bui Jerusalem ra blikamna, bara baku mika man nani prisantkam ba, wan muihni bahara nani ba ra, witin nani mita bri si yabia.

⁴ Bara yang pali na sin wamna aitani kabia kaka, witin nani ba yang wal wabia.

Pal impakaia ai kainara luki kan ba

⁵ Yang impakanki brimna ba ra, Macedonia tasbaya bâk luaia sna; baku bamna, baha ningkara Korint ra balamna.

⁶ Ban kra man nani aikuki piu wiria takaskamna baku sa, ban kra lî piua aiska ba nahara luamni, bamna baha ningkara anira impakaia kamna ba ra man nani sip kama hilp ai munaia.

⁷ Kan yang na lui bal wamna bâk baman lika, mai kaikan ai daukras sa, sakuna man nani aikuki wiria, piua wihka takaskamna lukisni, Dawan baku wibia kaka.

⁸ Sakuna Epesus ra takaskamna, Pentikus yua ba kat.

⁹ Bahara yang maipa ra sans tara pain kum bâra sa, Dawan warkka pain pali daukaia dukiara, bara upla ailal baha mapara banhwi ba bâra sa.

¹⁰ Timoti balbia kaka, man nani trai kaiki witin ba tilamra aikuki liliam bris, kan witin ba Dawan warkka daukisa, yang wal baku.

¹¹ Baha mita, man nani wina kumi sin witin ba bahki kulkbiara. Sakuna, witin ba hilp muns, ai impakanka ra ai kupia kumi lâka wal ban yang ra balbia; kan witin wan muihni wala nani wal balbia ba, yang bîla kaikisna.

¹² Bara wan muihni Apolos ra kasak makabi kapri, wan muihni nani aikuki man nani ra bal mai kaikbia, sakuna nanara lika balaia apia win; sakuna witin sans bribia ba ra, balbia.

Kupia kraukanka nani

¹³ Man nani aihwaki bas, bara kasak lukan lâka ra bapi bûi banhwi bas. Waitna bas. Karnakira nani bas.

¹⁴ Dîa dîa dauki kama ba, latwan lâka wal dauki bas.

¹⁵ Estéfanas ai watla uplika wal tânka ba kaikisma; witin nani sika Acaya tasbaya ra pas upla nani kristian takan ba, bara witin nani ai wîna aiska ni Gâd uplika nani dukia daukisa.

¹⁶ Bamna, yang want sna, man nani sin bahmuna uplika nani ra bawi kulki kama, bara ani uplika nani witin nani wal wark taki upla ra hilp muni nani ba ra sin.

¹⁷ Estéfanas, Fortunato bara Acaico sin yang ra balan ba mita, lilia sni; man nani âpu kapram ba mita, witin nani wamtlika ra aimakan.

¹⁸ Witin nani ba yang ra spirit mapa ra maisi nihkan sa, man nani ra maisam nihkan ba baku. Baha sât uplika nani ba pain pali kulki bas.

¹⁹ Asia tasbaya sertska nani man nani ra ai lakula mai blikisa. Áquila bara Priscila wal, bara witin nani watla ra daknika asla taki ba mita sin, kristian lakula uya mai blikuya.

²⁰ Wan muihni sut mita lamkula blikisa. Pana pana lamkula wi bas, kiawalanka holikira ni.

²¹ Yang Pal, mihti pali ni naha lakula ulbi mai blikuna.

²² Ani uplika Dawan Jisas Kraist ra latwan kaikras kaka, witin ba lahtuban kabia. ¡Wan Dawanka, bal!

²³ Dawan Jisas Kraist mita man nani ra yamni mai munbia.

²⁴ Man nani sut ra Kraist Jisas ra latwanka ba mai blikuna.