1 Korint 14 - DAWAN BÎLA AISKA

Bîla nani ra aisaia ba

¹ Bamna man nani trai kaiki bas latwan lâka ba bri kaia, bara Gâd mita spirit sinska lâka nani maikbia dukiara sin karna pali pliki banhwi bas, kau pali witin wina sturi nani brih aisaia ba.

² Baha uplika bîla sât aihka aisi ba, upla ra lika aisaras kuna Gâd ra mika, kan upla kumi sin witin dîa aisi ba tânka briras. Witin aisi ba Spirit tânka ra, sakuna upla kumi sin baha tânka briras.

³ Sakuna Gâd wina sturi nani brih aisi uplika ba, upla wala nani ra aisisa, witin nani ba spirit tânka mapa ra yaka pâwaia dukiara, tâ baikaia, bara maisa nihkaia sin.

⁴ Bîla sât aihka aisi uplika ba, witin spirit tânka ra pâwisa, sakuna Gâd wina sturi nani brih aisi ba lika serts uplika nani ra spirit tânka yan pâwisa.

⁵ Yang brin ai dauki kabia, man nani sut ba bîla sât aihka aisaia sinska nani bri kama; sakuna kau pali brin ai dauki kabia Gâd wina sturi nani brih aisaia sip katma kaka. Kan Gâd wina sturi nani brih aisaia ba kau pain sa, bîla sât aihka aisaia ba wal, ban kra bîla sât aihka nani ra aisi dukia nani ba, tânka param saki aisabia kaka lika, serts uplika nani ba spirit tânka mapa ra pâwbia dukiara.

⁶ Baha mita, muihki nani, yang na man nani ra bal bîla sât aihka nani ra mai aisamna kaka, ¿dîa hilpka man nani brima ki? Hilp nani brima apia, ban kra Gâd mita diara kum yawan kaikbia dukiara mai aisuna kaka lika, diara tânka kaikan dahra kum mai wisna kaka, Gâd wina sturi kum brih aisuna kaka, wan kanra bîla kaikan lâka kum kabia.

⁷ Miusik pulaia dukia nani, plut, apia kaka arp, binka sât nani daukisa kaka, binka aihka nani baku bamna, tânka briras sa, dîa tiunka kangbisa sapa.

⁸ Bara war aiklabuya ba ra, sim trumpit binka ba latan kangbras sa kaka, suldiar kumi sin aiklabaia ridi takbia apia.

⁹ Man nani ra sin baku takisa: twisam ni tânka briaia sip ba bîla nani aisaras sma kaka, ¿nahki upla walbia dîa aisisma sapa? ¡Man nani lika pâsa ra ni aisi kama!

¹⁰ Latan sa naha tasba ra bîla sât ailal nâra sa, bara kasak pali sut ba ai tânka brisa.

¹¹ Sakuna upla kum ai bîla aisi ba yang tânka briras sna kaka, uplika ba mapa ra tringsar kum baku kamna, bara pana sin uplika ba, yang maipara witin tringsar baku kabia.

¹² Baha mita, man nani spirit tânka mapa ra sins nani brin pali mai dauki ba, kau pali trai kaiki briaia sma, baha nani serts uplika nani ra yan pâwi ba.

¹³ Baku bamna, ani uplika bîla sât aihka aisi ba, Gâd ra makabaia sa baha bîla ra aisi ba tânka param sakaia karnika yabia.

¹⁴ Kan yang bîla sât aihka kum ra puri sunisna kaka, kasak pali spiritki ba lika ai pura sunisa, sakuna kupi lukra ni lika baha wina hilp kumi sin briras.

¹⁵ Ban kaka, ¿yang dîa daukaia sna ki? Spiritki ni puri sunaia sna, bara baha ni baman apia, sakuna kupi lukra ni sin. Spiritki ni lawana nani aiwanaia sna, bara baha ni baman apia, sakuna kupi lukra ni sin.

¹⁶ Kan man ba spiritkam ni baman Gâd ra mayunra yabisma kaka, upla kum baha wali ba sip tingkikam pura sunra bara man wal asla takras, kan dîa aisisma ba witin tânka briras sa.

¹⁷ Tingkikam pura sunra ba uya pain kaia sip sa, sakuna uplika wala ba spirit mapa ra sip pâwras.

¹⁸ Yang bui Gâd ra tingki wisna, man nani sut purkamra bîla sât aihka aisaia sip sna ba dukiara;

¹⁹ sakuna prias dauki ba ra kau want sna, upla tânka briaia sip kaka bîla matsip aisaia, upla wala nani ra sin smalkaia dukiara, bîla sât aihka ni bîla 10,000 aisaia watlika ra.

²⁰ Muihki nani, tuktan sirpi nani baku luki kapara. Saura daukaia mapa ra lika tuktan nani baku bas, sakuna lukankam mapa ra lika upla almuk nani baku bas.

²¹ Lâ wauhkataya ra naku ulban sa: “Naha nisanka ra bîla aihka nani upla tringsar nani bîla bâk sin aisamna, sakuna baku kabia sin bîli walbia apia, Dawan baku wisa.”

²² Baku bamna, bîla sât aihka nani aisaia sinska ba lalukra apia nani mapa ra sain kum sa, lalukra nani mapa ra lika apia. Sakuna Gâd wina sturi nani brih aisaia sinska ba lalukra nani mapa ra sain kum sa, lukras nani ra lika apia.

²³ Bamna, serts uplika aiska ba asla takan ba ra, kumi bani bîla sât aihka aisisa kaka, bara lan âpu uplika tila nani lalukra apia nani bal dimuya kaka, ¿aisi banhbia apia ki man nani ba lamla saura takan sa?

²⁴ Sakuna sut Gâd wina sturi nani brih aisisma kaka, bara lalukra apia kum, apia kaka lan âpu uplika kum bal dimbia kaka, baha wina ai saurka ra witin kasak lukbia bara witin sin bapi bûi luki kaikbia, uplika sut dîa aisi ba walbia ba ra.

²⁵ Baku ai kupia dahra prakanka nani ba latan takbia, bara ai lula kriki Gâd ra ai pura suni mayunbia, bara aisabia kasak pali Gâd ba man nani tilamra sa.

Serts ra diara bani ba wapni lâka kat daukaia ba

²⁶ Bamna, muihki nani, tânka na naku sa: Asla takisma ba ra upla kum ba Lawana Nani Pura Sunra nani ba brisa, wala ba smalkanka nani, wala ba Gâd wina diara kum param saki marikan ba, wala ba bîla tringsar nani ra sturi yamni kum, bara wala lika aisi smalkan nani na tânka param aisaia. Âu, diara bani ra serts uplika nani ba, spirit mapa ra yaka pâwaia dukiara kaia sa.

²⁷ Upla kum bîla sât aihka nani ra aisisa kaka, upla wâl, apia kaka yumhpa baman aisaia sip sa, bara ba kat sin kumi kumi ra; bara aisi nani ba upla wala kum mita tânka param aisaia sa.

²⁸ Sakuna bahara upla kumi sin tânka ba param aisaia âpu sa kaka, kau pain kabia asla takanka ba ra upla kumi sin diara aisabia apia, kuna kumi bani ai kupia wal aisabia bara Gâd ra sin.

²⁹ Baku sin, Gâd wina sturi nani brih aisaia dukia kaka, upla wâl, apia kaka yumhpa aisabia, bara walka nani lika dîa aisi ba tânka luki pliki kabia.

³⁰ Sakuna Gâd mita upla wala kum iwi ba ra diara kum saki marikuya kaka, pas kata ba mahka ai bîla prakbia.

³¹ Bamna baku man nani sut Gâd wina sturi nani brisma ba, sip sma kumi kumi ra aisaia, bara baku mika sut lan takbia bara ai tâ baiki banhbia.

³² Gâd wina sturi nani brih aisi nani ba, ai spiritka nani ba yaka bawaia sa,

³³ kan Gâd ba kupia kumi lâka Gâdka sa, tanis turban lâka Gâdka lika apia. Gâd uplika nani asla takanka sut ra dauki natka ba baku,

³⁴ mairin nani ba serts ra sâp kaia sa, naku daukaia lâ apia sa bamna. Kiama lihni nani kaia sa, Moses lâka wi ba kat.

³⁵ Witin nani diara kum kaikan daukisa kaka, utla ra ni ai maya waitna nani ra makabi walaia sa; kan mairin kum serts ra aisaia apia sa.

³⁶ Pain damra wali kaia sma Gâd bîla ba man nani wina tâ krikras, bara man nani baman sin baha ba briras sma.

³⁷ Upla kum Gâd wina sturi nani brih aisaia sinska aitani brisa lukisa, apia kaka Spirit mita ingnika yaban ai dara walisa kaka, aitani luki kulkaia sa, dîa man nani ra ulbisna na Dawan lâka bîla sa.

³⁸ Sakuna aitani luki kulkras kaka, pana sin witin ra aitani luki kulkaia apia sa.

³⁹ Baku bamna, muihki nani, trai kaiki bas Gâd wina sturi nani brih aisaia sip kaia, bara bîla sât aihka nani ra aisaia ba sin man nani takaski banhpara;

⁴⁰ sakuna diara sut ba painkira bara wapni kat sin dauki kama.