زبور 98 - Muslim Sindhi Bible

خدا، جهان جو حاڪم

(هڪ گيت)

¹ اوهين خداوند جي لاءِ ڪو نئون گيت ڳايو، ڇوجو هن عجيب وَ غريب ڪم ڏيکاريا آهن. هن پنهنجي زورآور هٿ، هائو، پنهنجي الاهي قدرت سان فتح حاصل ڪئي آهي.

² خداوند دنيا جي سڀني قومن تي ظاهر ڪري ڇڏيو آهي تہ هو انصاف ڪرڻ ۽ ڇڏائڻ جي قدرت رکي ٿو.

³ هن بني اسرائيل جي خاطر پنهنجي دائمي شفقت ۽ وفا کي ياد فرمايو آهي. هائو، دنيا جي سڀني ماڻهن ڏٺو آهي تہ اسان جي خدا ڪيئن اسان کي بچايو آهي.

⁴ اي ڌرتيءَ جا سڀيئي رهاڪؤ! خداوند لاءِ خوشيءَ مان نعرا هڻو. جوش وَ جذبي سان خوشيءَ جا گيت ڳائي واکاڻ ڪريو.

⁵ اوهين دنبورا وڄائي خداوند جي واکاڻ ڳايو، هائو، دنبورا وڄائي سريلي آواز سان سندس تعريف ڳايو.

⁶ اوهين شرنايون ۽ نفيلون وڄائي، خداوند بادشاهہ جي آڏو خوشيءَ جا نعرا هڻو.

⁷ اي سمنڊؤ! اوهين ۽ اوهان ۾ جيڪا بہ مخلوق آهي، سي سڀ خوشيءَ وچان گجگوڙ ڪريو. اي ڌرتي! تون ۽ تو ۾ جيڪا بہ مخلوق آهي، سي سڀ سندس نعرا هڻو.

⁸ سڀ درياءَ تاڙيون وڄائين، ۽ پهاڙ گڏجي خوشيءَ سان ڳائين،

⁹ ڇاڪاڻ تہ هو اچي ٿو، تان‌تہ دنيا وارن جو انصاف ڪري. هائو، هو انصاف ۽ سچائيءَ سان دنيا جي قومن جي عدالت ڪندو.