زبور 84 - Muslim Sindhi Bible

مقدس هيڪل جي اُڪير

(استاد موسيقار لاءِ هدايت: هي ”گتيت“ جي سُر تي ڳايو وڃي. بني قورح جي زبورن ۾ شامل)

¹ اي قادرِمطلق خداوند! تنهنجو گھر ڪيڏو نہ دلڪش آهي!

² آءٌ تو خداوند جي بارگاهہ جي لاءِ سِڪان ٿو. هائو، آءٌ انهيءَ لاءِ آسائتو ٿو رهان. سو آءٌ خوشيءَ وچان تو جيئري خدا جي واکاڻ جا گيت ٿو ڳايان.

³ اي قادرِمطلق خداوند! اي منهنجا بادشاهہ ۽ منهنجا خدا! جھرڪيءَ بہ اچي تنهنجي قربان‌گاهہ وٽ پنهنجو گھر جوڙيو آهي. ابابيل بہ اچي اتي آکيرو جوڙي پنهنجي ٻچن کي رهايو آهي.

⁴ بيشڪ اهي سڀاڳا آهن جيڪي تنهنجي گھر ۾ رهن ٿا، اهي هميشہ تنهنجي واکاڻ پيا ڳائيندا رهن ٿا.

⁵ سڀاڳا آهن اهي ماڻهو، جيڪي پنهنجي طاقت لاءِ تو تي ٿا ڀاڙين، ۽ جن جي دل ۾ صيئون جبل جا شاهي رستا آهن.

⁶ اهي زيارتي جڏهن ماتم نالي خشڪ واديءَ ۾ پهچن ٿا تہ انهيءَ مان بہ چشما وهي نڪرن ٿا، بلڪ آڳاٽو مينهن انهيءَ کي برڪتن سان ڀري ٿو ڇڏي.

⁷ هلندي هلندي سندن طاقت جيئن پوءِ تيئن وڌندي وڃي ٿي. بيشڪ اهي صيئون ۾ پهچي تو معبودن جي معبود جو ديدار ڪندا.

⁸ اي خداوند قادرِمطلق خدا! منهنجي هيءَ دعا ٻڌ. اي خداوند، يعقوب جا خدا! تون مون ڏانهن پنهنجو ڪن ڏي.

⁹ اي خدا! تون اسان جي محافظ بادشاهہ تي پنهنجي نظر ڪر. جنهن کي تو مسح ڪري مخصوص ڪيو آهي تنهن تي مِهر جي نظر ڪر.

¹⁰ يقيناً تنهنجي بارگاهہ ۾ هڪڙو ڏينهن ٻئي هنڌ جي هزار ڏينهن کان بهتر آهي. بدڪارن جي شاندار خيمن ۾ رهڻ کان، تو خدا جي گھر جو دربان ٿيڻ مون کي وڌيڪ پسند آهي.

¹¹ انهيءَ سبب جو تون خداوند خدا ئي اسان جي رهنمائي ڪندڙ ۽ محافظ آهين. تون ئي اسان کي فضل ۽ عظمت بخشين ٿو. بيشڪ جيڪي سچائيءَ جي راهہ تي هلن ٿا، تن کان تون ڪابہ چڱي شيءِ نہ ٿو روڪين.

¹² اي قادرِمطلق خداوند! ڪيڏو نہ سڀاڳو آهي اهو ماڻهو جنهن جو تو تي ڀروسو آهي!