زبور 54 - Muslim Sindhi Bible

دشمنن کان بچاءَ جي دعا

(استاد موسيقار لاءِ هدايت: هي تار وارن سازن تي ڳايو وڃي. جڏهن زيف شهر وارن وڃي سائول بادشاهہ کي ٻڌايو هو تہ ” دائود اسان وٽ لڪل آهي،“ تڏهن دائود پنهنجي بچاءَ لاءِ زبور ٺاهي هيءَ دعا گھري.)

¹ اي خدا! تون پنهنجي جلال کي ظاهر ڪري مون کي بچاءِ. هائو، پنهنجيءَ قدرت سان تون منهنجو انصاف ڪر.

² اي خدا! تون منهنجي دعا ٻڌ، منهنجي زبان جي ڳالهين ڏانهن ڪن ڏي،

³ ڇاڪاڻ تہ ڪي ڌاريا ماڻهو منهنجي خلاف اُٿي کڙا ٿيا آهن. هائو، بي‌ترس ماڻهو منهنجي جان جي پٺيان پيا آهن. اهي تو خدا جو بہ ڪو لحاظ ڪونہ ٿا رکن.

⁴ برحق، خدا ئي منهنجو مددگار آهي. منهنجو ڌڻي ئي منهنجيءَ جان جو محافظ آهي.

⁵ شال هو منهنجي دشمنن تي سندن بڇڙائي موٽائي آڻي! شال هو مون سان وفا ڪندي کين برباد ڪري ڇڏي!

⁶ اي خداوند! آءٌ تنهنجي حضور خوشيءَ جي قرباني پيش ڪندس. آءٌ تنهنجي نالي جو شڪرانو بجا آڻيندس، ڇوجو تون ڀلو آهين.

⁷ بيشڪ تو مون کي هر تڪليف کان ڇڏايو آهي، ۽ منهنجي اکين مون کي پنهنجي دشمنن تي سوڀارو ڏٺو آهي.