زبور 34 - Muslim Sindhi Bible

خدا جي ڀلائيءَ جي واکاڻ

( دائود جو ان وقت جو زبور، جڏهن ابيملڪ بادشاهہ جي اڳيان پاڻ کي بچائڻ لاءِ هن چرين وارو ويس ڪيو هو. انهيءَ تي بادشاهہ کيس درٻار مان ڪڍي ڇڏيو ۽ ائين هو بچي نڪري ويو.)

¹ آءٌ خداوند کي هر دم سڳورو چوندو رهندس. منهنجي زبان هر وقت سندس واکاڻ پيئي ڪندي.

² هائو، آءٌ خداوند جي واکاڻ ڪندو رهندس. جيڪي بہ ڏکايل آهن سي اها ٻڌي خوش ٿيندا.

³ اوهين مون سان گڏجي خداوند جي عظمت جو بيان ڪريو. اچو تہ اسين هن جي نالي جي واکاڻ ڪريون.

⁴ مون خداوند کان دعا گھري ۽ هن منهنجي ٻڌي آهي. هن مون کي منهنجي سڀني خوفن کان ڇڏائي ورتو آهي.

⁵ جيڪي هن تي توڪل ٿا رکن سي سوجھرو حاصل ڪن ٿا، ۽ انهن جا منهن ڪڏهن بہ شرمندگي نہ ڏسندا.

⁶ مون مسڪين خداوند آڏو فرياد ڪيو، ۽ خداوند منهنجي ٻڌي ورتي. هن منهنجي سڀني مصيبتن کان مون کي بچائي ورتو.

⁷ جيڪي خداوند جو خوف رکن ٿا، تن کي سندس ملائڪ هر خطري کان دور ٿو رکي. هو انهن جي چوڌاري پهرو ڏيئي سندن حفاظت ٿو ڪري.

⁸ هر طرح سان آزمائي ڏسو تہ خداوند ڪيڏو نہ ڀلو آهي. بيشڪ اهو ماڻهو سڀاڳو آهي جيڪو انهيءَ جي پناهہ ٿو وٺي.

⁹ سو اي خداوند جا چونڊيل ٻانهؤ! خداوند جو خوف رکو، ڇاڪاڻ تہ جيڪي کانئس ڊپ رکن ٿا تن وٽ ڪا ئي ڪمي نہ آهي.

¹⁰ کاڌي جي ڪميءَ جي ڪري شينهن بہ بکيا رهن ٿا، پر خداوند جا طالبو ڪنهن نعمت جا محتاج نہ ٿيندا.

¹¹ اي منهنجا ٻارؤ! منهنجي ويجھو اچي منهنجي ڳالهہ ٻڌو، اچو تہ آءٌ اوهان کي خداوند جو خوف رکڻ سيکاريان.

¹² اهڙو ڪوبہ ماڻهو نہ آهي، جيڪو حياتيءَ جي خواهش نہ رکندو هجي. هائو، هر ڪو ماڻهو وڏي عمر ٿو چاهي، تان‌تہ هو پنهنجي حياتيءَ جو مزو ماڻي سگھي.

¹³ سو اوهين پنهنجيءَ زبان کي بڇڙائيءَ کان روڪيو. اوهين پنهنجي وات کي ٺڳيءَ جي ڳالهين کان باز رکو.

¹⁴ هائو، بڇڙائيءَ کان پري ڀڄو ۽ سدائين نيڪي ڪندا رهو. اوهين صلح جا طالبو ٿيو ۽ انهيءَ جي پٺيان لڳا رهو.

¹⁵ خداوند جون اکيون سچارن تي کتل رهن ٿيون، ۽ سندس ڪن انهن جي فرياد تي لڳل ٿا رهن.

¹⁶ خداوند هر بدڪار جو مخالف آهي، تان‌تہ انهن جي يادگيريءَ کي ڌرتيءَ تان ئي مِٽائي ڇڏي.

¹⁷ جڏهن خداوند جا تابعدار کيس مدد لاءِ پڪارين ٿا، تڏهن هو سندن ٻڌي ٿو، ۽ سڀني تڪليفن کان کين ڇڏائي ٿو وٺي.

¹⁸ خداوند انهن کي ويجھو آهي جيڪي دل‌شڪستہ آهن، ۽ جن جا روح چيڀاٽيل آهن تن کي هو بچائي ٿو.

¹⁹ سچار ماڻهن جي مٿان تڪليفون تہ گھڻيون ئي آهن، پر خداوند انهن سڀني کان کين ڇڏائي ٿو.

²⁰ خداوند سندن سڀني هڏين کي سنڀالي ٿو، تان‌تہ انهن جي ڪابہ هڏي ڀڄي نہ پوي.

²¹ پر جن کي سچارن کان نفرت آهي، تن کي ڏوهي قرار ڏنو ويندو. اهي پنهنجي بڇڙائيءَ وسيلي پاڻ ئي قتل ڪيا ويندا.

²² خداوند پنهنجي ماڻهن جي جان بچائي ٿو وٺي. هائو، اهي ٻانها جيڪي سندس پناهہ ٿا وٺن، تن مان ڪوبہ ڏوهي قرار نہ ڏنو ويندو.