زبور 135 - Muslim Sindhi Bible

واکاڻ جو گيت

¹ خداوند جي واکاڻ ڪريو. اي خداوند جا بندؤ! اوهين خداوند جي واکاڻ ڪريو،

² هائو، اوهين جيڪي خداوند جي گھر جي اندر، اسان جي خدا جي بارگاهہ منجھہ حاضر رهو ٿا.

³ خداوند جي واکاڻ ڪريو، ڇاڪاڻ تہ خداوند ڀلو آهي. سندس نالي جي ساراهہ ڳايو، ڇاڪاڻ تہ هو ٻاجھارو آهي.

⁴ بيشڪ خداوند بني يعقوب کي پنهنجي واسطي، هائو، بني اسرائيل کي پنهنجي خاص ملڪيت ٿيڻ لاءِ چونڊي ورتو آهي.

⁵ منهنجو اهو ايمان آهي تہ خداوند عظيم آهي، هائو، اسان جو رب سڀني معبودن کان بلند وَ بالا آهي.

⁶ آسمان ۾ توڙي زمين تي، بلڪ سمنڊ جي اونهاين ۾ تري تائين، خداوند کي جيڪي وڻي ٿو سو ئي هو ڪري ٿو.

⁷ ڌرتيءَ جي ڇيڙن کان هو بادل اٿاري آڻي ٿو، مينهن سان گڏ هو وڄ موڪلي ٿو، ۽ پنهنجي گدام مان آنڌي اماڻي ٿو.

⁸ مصر ۾ انسانن توڙي جانورن جا جيڪي بہ پهريتا هئا، تن سڀني کي هن ئي ماري ڇڏيو.

⁹ اي مصر! تو منجھہ فرعون ۽ ان جي سڀني عملدارن تي هن ڪيڏا نہ وڏا معجزا ۽ عجيب ڪم ظاهر ڪيا.

¹⁰ هن گھڻين ئي قومن کي تباهہ وَ برباد ڪري ڇڏيو، ۽ زورآور بادشاهن کي بہ قتل ڪري ڇڏيائين.

¹¹ هائو، امورين جي بادشاهہ سيحون کي، بسن جي بادشاهہ عوج کي، ۽ ڪنعان جي سڀني بادشاهن کي هن قتل ڪري ڇڏيو.

¹² هن انهن جا ملڪ بني اسرائيل کي عطا ڪيا. هائو، هن پنهنجي انهيءَ قوم کي اهي ميراث ڪري ڏنا.

¹³ خداوند جو نالو هميشہ ياد ڪيو ويندو. سندس ذڪر سڀني پيڙهين تائين ٿيندو رهندو.

¹⁴ انهيءَ سبب جو خداوند پنهنجي قوم جي پاسخاطري ڪري ٿو، هائو، هو پنهنجي انهن ٻانهن تي مهربان آهي.

¹⁵ جڏهن تہ ڌارين قومن جا معبود سون ۽ چانديءَ جا ٺهيل بت آهن، جيڪي ماڻهن پنهنجي هٿن سان جوڙيا آهن.

¹⁶ انهن کي وات تہ آهي پر اهي ڳالهائي نہ ٿا سگھن، انهن کي اکيون بہ آهن پر اهي ڏسي نہ ٿا سگھن،

¹⁷ انهن کي ڪن بہ آهن پر اهي ٻڌي نہ ٿا سگھن. توڙي جو کين وات آهي، تڏهن بہ اهي ساهہ کڻي نہ ٿا سگھن.

¹⁸ هاڻ جيڪي انهن کي جوڙين ٿا يا مٿن ڀروسو ٿا رکن، سي سڀيئي بہ انهن جهڙا ئي ٿي پوندا.

¹⁹ اي بني اسرائيل! اوهين خداوند کي سڳورو چئو، اي خداوند جا ڪاهنؤ! اوهين خداوند کي سڳورو چئو.

²⁰ اي لاوي، هيڪل جا خدمتگارؤ! اوهين خداوند کي سڳورو چئو، اي خداوند جي عبادت ڪرڻ وارؤ! اوهين خداوند کي سڳورو چئو.

²¹ شال صيئون جبل تي خداوند سڳورو هجي! هائو، اهو جيڪو يروشلم ۾ رهي ٿو سو شل سڳورو هجي! خداوند جي واکاڻ ڪريو.