زبور 111 - Muslim Sindhi Bible

خداوند جا عظيم ڪم

¹ خداوند جي واکاڻ ڪريو. آءٌ سچارن جي گڏجاڻيءَ ۾، پنهنجي پوري دل وَ جان سان خداوند جو شڪر ڪندس.

² خداوند جا ڪم ڪيڏا نہ عظيم آهن! جيڪي انهن کي دل سان پسند ڪن ٿا، سي انهن تي غور ويچار ڪندا رهن ٿا.

³ هن جا ڪم وڏي شان وَ شوڪت وارا آهن، ۽ پنهنجي بندن لاءِ سندس سچائي هميشہ قائم وَ دائم آهي.

⁴ خداوند جيڪو رحيم ۽ ڪريم آهي، سو پنهنجي عجيب ڪمن جي يادگيري قائم رکي ٿو.

⁵ هو پنهنجي بندن سان ٻڌل عهد کي هميشہ ياد رکي ٿو، سو جيڪي سندس خوف رکن ٿا تن کي هو رزق مهيا ڪري ٿو،

⁶ هن پنهنجي قدرت وارا ڪم پنهنجي قوم کي ظاهر ڪري ڏيکاريا، جڏهن هن ڌارين قومن جي زمين کين عطا ڪئي.

⁷ بيشڪ خدا جا سڀيئي ڪم سچائيءَ ۽ انصاف وارا آهن. خدا جي سڀني قاعدن قانونن تي پورو ڀروسو ڪري سگھجي ٿو،

⁸ ڇاڪاڻ تہ اهي سچائيءَ ۽ حق تي ٻڌل آهن. اهي هميشہ هميشہ تائين قائم وَ دائم رهندا.

⁹ هن پنهنجي قوم کي ڇڏايو، ۽ ساڻن پنهنجو هميشہ وارو عهد ٻڌو. بيشڪ سندس نالو پاڪ ۽ هيبتناڪ آهي.

¹⁰ خداوند جي خوف رکڻ سان ئي دانائيءَ جي شروعات ٿئي ٿي. بيشڪ اهي سمجھو آهن جيڪي سندس حڪمن تي عمل ڪن ٿا. سندس واکاڻ هميشہ هميشہ تائين قائم رهندي.