چوڻيون 6 - Muslim Sindhi Bible

ٻيون وڌيڪ نصيحتون

¹ اي منهنجا ٻارؤ! فرض ڪريو تہ اوهين ڪنهن اهڙي قرضدار جا ضامن پيا آهيو، جيڪو قرض واپس نہ ٿو ڪري سگھي.

² تڏهن اوهين پنهنجي ڳالهين ۾ ئي ڦاٿل آهيو. هائو، اوهين پنهنجي ڪيل واعدي جا پابند آهيو.

³ سو اي منهنجا ٻارؤ! جيئن تہ اوهين انهيءَ ماڻهوءَ جي چنبي ۾ اچي ويا آهيو، تنهنڪري هاڻي هيئن ڪري پنهنجو پاڻ کي بچايو جو هڪدم وڃي نياز نِوڙت ڪندي انهيءَ ماڻهوءَ کان پنهنجي جان آجي ڪرايو.

⁴ اوهين سمهڻ ۽ ننڊ ڪرڻ کان اڳ ۾ ئي اهو سڀ ڪجھہ هڪدم ڪريو.

⁵ هائو، پاڻ کي انهيءَ قرض جي واعدي کان ائين بچائي وٺو، جيئن ڪا هرڻي يا ڪو پکي پاڻ کي شڪاريءَ جي هٿان بچائڻ جي ڪوشش ڪندو آهي.

⁶ اوهان مان جيڪي سُست ۽ ڪاهل آهن سي ڪِولين کي جاچي ڏسن ۽ انهن جي زندگي گھارڻ جي طريقن مان وڃي سبق سکن.

⁷ انهن ڪِولين کي جيتوڻيڪ نہ ڪو سردار آهي ۽ نہ وري ڪو اڳواڻ يا ڪو حڪمران.

⁸ تنهن هوندي بہ اهي اونهاري ۾ لاباري جي مند ۾ سياري لاءِ پنهنجو کاڌو گڏ ڪري ٿيون رکن.

⁹ اڙي اي سُست وَ ڪاهلؤ! اوهين ڪيستائين ستا پيا هوندا؟ اوهين ڪڏهن پنهنجي ننڊ مان اٿندا؟

¹⁰ اڃا بہ چئو ٿا تہ ”ٿوري ننڊ، ٿوري پنڪي هڻي وٺون. ٻانهون سوڙهيون ڪري ٿورو آرام ڪري وٺون.“

¹¹ پر ياد رکو، اوهين ننڊ ۾ ئي هوندا تہ غريبي اوهان تي ڪنهن رهزن وانگر اچي ڪڙڪندي. هائو، مفلسي اوهان تي ڪنهن هٿياربند ڌاڙيل جيان اچي حملو ڪندي.

¹² خبيث ۽ بدڪار ماڻهو هر هنڌ ڪوڙ ڳالهائيندا ٿا وتن.

¹³ اهي ٻين کي ٺڳڻ لاءِ اکيون ٿا ڀڃن ۽ هٿن ۽ پيرن سان اشارا ٿا ڪن.

¹⁴ اهي سدائين ظلم ۽ بڇڙائيءَ جون ڳالهيون سوچيندا ٿا رهن ۽ هر هنڌ فتنو فساد برپا ٿا ڪن.

¹⁵ انهيءَ ڪري اوچتو ئي اوچتو مٿن آفت اچي ڪڙڪندي ۽ اهي ڀڄي ڀُري ويندا. سندن زخم لاعلاج هوندا.

¹⁶ ماڻهن جا ڇهہ بلڪ ست اهڙا ڪراهت جهڙا ڪم آهن جن کان خداوند کي نفرت آهي:

¹⁷ مغرور اکيون، ڪوڙ ڳالهائيندڙ زبان، بي‌گناهن جو رت وهائيندڙ هٿ،

¹⁸ بڇڙائيءَ واريون رٿون رٿيندڙ دل، بدڪاري ڪرڻ واسطي تکا ڊوڙندڙ پير،

¹⁹ ڪوڙ مٿان ڪوڙ ڳالهائيندڙ شاهد، ۽ ڀائرن ۾ جھيڙو وجھندڙ ماڻهو.

زناڪاريءَ کان خبرداري

²⁰ اي منهنجا ٻارؤ! پنهنجي پيءُ جا حڪم بجا آڻيو ۽ پنهنجي ماءُ جي ڏنل تربيت کي ڪڏهن نہ وساريو.

²¹ سندن ڳالهين کي هميشہ پنهنجيءَ دل ۾ سانڍي رکو ۽ انهن کي پنهنجي ڳلي جو هار بڻائي ڇڏيو.

²² جيڏانهن اوهين ويندا تہ انهن جون نصيحتون اوهان جي رهنمائي ڪنديون، جڏهن اوهين سمهندا تہ اهي اوهان جي نگهباني ڪنديون ۽ ڏينهن جو جڏهن اوهين جاڳيل هوندا تہ اهي اوهان کي سهڻيون صلاحون ڏينديون.

²³ انهن جي هدايت ۽ تربيت هڪڙي ڏيئي مثل آهي جيڪا اونداهيءَ ۾ چمڪندڙ روشني ڏئي ٿي. سندن نصيحت اوهان کي زندگي گذارڻ جو طريقو ٿي سيکاري.

²⁴ سندن هدايتون اوهان کي بدڪار عورتن کان پري ٿيون رکن. هائو، غير عورتن جي هرکائيندڙ ڳالهين کان اهي اوهان کي محفوظ ٿيون رکن

²⁵ تہ جيئن اوهين اهڙين عورتن جي حسن تي موهت نہ ٿي پئو. هائو، اوهين انهن جي نيڻن جا اسير نہ بڻجي وڃو.

²⁶ ياد رکو، ڪسبياڻين جي چڪر ۾ اچي ماڻهو مانيءَ جي ٽڪر جو محتاج بڻجيو پوي، جڏهن تہ ٻين ماڻهن جي زالن سان زناڪاري قيمتي حياتيون ڳڙڪايو ڇڏي.

²⁷ جيڪڏهن ڪو پنهنجيءَ جھول ۾ ٻرندڙ ٽانڊا کڻندو، تہ ڇا انهيءَ جا ڪپڙا نہ سڙندا؟

²⁸ جيڪڏهن ڪو ٻرندڙ ٽانڊن تي هلندو، تہ ڇا انهيءَ جا پير نہ سڙندا؟

²⁹ ساڳيءَ طرح جيڪو ڪنهن ٻئي جي زال سان صحبت ٿو ڪري، ڇا اهو سزا کان بچندو؟

³⁰ ماڻهو انهيءَ چور کي نہ ٿا ڌڪارين، جيڪو بکئي پيٽ کي ڀرڻ لاءِ ڪا شيءِ چورائي ٿو.

³¹ تنهن هوندي بہ جيڪڏهن اهو هٿ اچي ويندو تہ هو ستوڻو مال ڀري ڏيندو. هائو، جيڪو ڪجھہ وٽس هوندو سو کيس ڏيڻو پوندو.

³² پر جيڪو ڪنهن غير عورت سان زناڪاري ٿو ڪري، سو بنا ڪنهن سبب جي رڳو پنهنجي بي‌عقليءَ سان پنهنجو پاڻ کي تباهہ ٿو ڪري.

³³ انهيءَ کي زخم رسندا ۽ ذلت جو منهن ڏسڻو پوندس. هائو، اهو هميشہ لاءِ خوار خراب ٿيندو.

³⁴ انهيءَ سبب جو مڙس کي جڏهن غيرت ايندي آهي، تڏهن هو غضبناڪ ٿي پوندو آهي ۽ پوءِ سندس انتقام جي ڪا حد نہ هوندي آهي.

³⁵ ان وقت هو ڪنهن بہ عيوضي تي ڌيان نہ ڏيندو، جيتوڻيڪ هن کي ڪجھہ بہ آڇيو وڃي، تڏهن بہ هو راضي نہ ٿيندو.