چوڻيون 31 - Muslim Sindhi Bible

بادشاهہ لاءِ مشورا

¹ هي اهي اهم چوڻيون آهن، جيڪي بادشاهہ لموئيل کي سندس ماءُ چڱيءَ طرح سمجھايون.

² اي منهنجا پٽ لموئيل! تون منهنجو سڪيلڌو پٽ آهين، ۽ باسون باسڻ کان پوءِ ڄائو آهين. هاڻي جيڪي ڪجھہ آءٌ تو کي چوان ٿي سو ڌيان ڏيئي ٻڌ.

³ تون عورتن جي پٺيان لڳي پنهنجي زندگي برباد نہ ڪجانءِ، ڇاڪاڻ تہ انهيءَ رستي تي هلي ڪيترائي بادشاهہ ناس ٿي ويا آهن.

⁴ اي لموئيل! اهو بادشاهن جي شان وٽان ناهي تہ اهي شراب پيئن. هائو، نشي‌بازي حڪمرانن کي نہ ٿي جڳائي.

⁵ جڏهن اهي شراب پيئن ٿا تہ قاعدن قانونن کي وساري ٿا ڇڏين، ۽ پوءِ ڪنهن مظلوم سان ناانصافي ڪريو وجھن.

⁶ شراب ۽ نشي واريون شيون رڳو انهن لاءِ مناسب آهن، جيڪي مرڻ وارا آهن يا جيڪي پريشان حال آهن.

⁷ ڀلي تہ اهي پيئن تہ جيئن کين پنهنجي تڪليفن ۽ مصيبتن جو احساس نہ ٿئي.

⁸ تون لاچارن ۽ مسڪينن جو طرف کڻجانءِ، ۽ سندن حقن جي حفاظت ڪجانءِ، ڇاڪاڻ تہ انهن جو بچائڻ وارو ڪوبہ ڪونهي.

⁹ خاموش نہ رهجانءِ ۽ سچائيءَ سان انصاف ڪجانءِ، هائو، غريبن ۽ محتاجن جي حقن جو خاص خيال رکجانءِ.

قابل زال جي تعريف

¹⁰ ڪنهن قابل زال جو ملڻ ڪيڏو نہ مشڪل آهي! هائو، اها هيرن جواهرن کان بہ وڌيڪ املهہ آهي.

¹¹ سندس مڙس جو مٿس پورو پورو اعتبار ٿئي ٿو، ۽ سندس مڙس جي ڪابہ گھرج باقي نہ ٿي رهي.

¹² هوءَ هر وقت ساڻس چڱائي ٿي ڪري، مندائي هرگز نہ ٿي ڪري.

¹³ هوءَ اُن ۽ عمدي سڻيءَ جا ڪپڙا، خوشيءَ سان پنهنجي هٿن سان پاڻ ٺاهي ٿي.

¹⁴ جيئن واپاري جهاز پري پري کان سٺو سامان آڻيندا آهن، تيئن ئي هوءَ پنهنجي گھر لاءِ کاڌو خوراڪ آڻي ٿي.

¹⁵ هوءَ پرهہ ڦٽڻ کان اڳ ئي اُٿي کڙي ٿئي ٿي، تہ جيئن گھر جي ڀاتين لاءِ کاڌو تيار ڪري، ۽ ٻانهين کي پنهنجو پنهنجو ڪم ٻڌائي.

¹⁶ هوءَ سوچ ويچار ڪري ٻني خريد ڪري ٿي، ۽ پنهنجي هٿن جي ڪمائيءَ مان انگورن جو باغ لڳرائي ٿي.

¹⁷ هوءَ سخت محنت ڪندڙ، صحتمند ۽ جفاڪش ٿئي ٿي.

¹⁸ هوءَ ڄاڻي ٿي تہ جيڪا تجارت هوءَ ڪري ٿي سا ڪيتري قدر فائديمند آهي. رات جو دير تائين هوءَ پنهنجي ڪم ۾ مصروف رهي ٿي.

¹⁹ هوءَ پنهنجي هٿن سان ڌاڳو ڪَتي ٿي، ۽ پنهنجي گھر لاءِ ڪپڙو اُڻي تيار ڪري ٿي.

²⁰ هوءَ پنهنجو هٿ وڌائي غريبن ۽ محتاجن جي پوري پوري مدد ڪري ٿي.

²¹ هوءَ سخت سرديءَ کان بہ نہ ٿي گھٻرائي، ڇاڪاڻ تہ سندس گھر وارن کي گرم ڪپڙا پهريل رهن ٿا.

²² هوءَ پنهنجي گھر لاءِ رلهيون جوڙي ٿي، ۽ عمدي سڻيءَ ۽ واڱڻائي رنگ جا ڪپڙا پهريل رهي ٿي.

²³ هن جو مڙس مقبول ۽ معزز اڳواڻ بڻجي ٿو وڃي.

²⁴ هوءَ عمدي سڻيءَ جون چادرون ۽ ڪمربند ٺاهي ٿي، ۽ اهي واپارين کي وڪڻي ٿي.

²⁵ هوءَ ڪردار جي مضبوط ۽ قابل احترام آهي، ۽ ايندڙ وقت لاءِ کيس ڪا ڳڻتي ڪانهي.

²⁶ هوءَ ڏاهپ سان ڳالهائي ٿي ۽ سٺيون نصيحتون ڪري ٿي.

²⁷ هوءَ پنهنجي ڪٽنب جي سٺي سار سنڀال ٿي ڪري، ۽ ڪڏهن بہ سُستي نہ ٿي ڪري.

²⁸ هن جا ٻار سندس واکاڻ ٿا ڪن، ۽ سندس مڙس مٿس فخر ڪندي چويس ٿو تہ

²⁹ ”گھڻيون ئي عورتون سٺيون زالون بہ آهن، پر تون سڀني کان گوءِ کڻي ويئي آهين.“

³⁰ سونهن ۽ مِٺو ڳالهائڻ بي‌بقا ۽ ٺڳيندڙ آهن، پر جيڪا عورت خداوند کان ڊڄي ٿي، تنهن جي تعريف ڪئي وڃي،

³¹ ۽ کيس سندس محنت جو اجر ڏنو وڃي. هوءَ هر ڪنهن جي نظر ۾ قابل احترام آهي.