يشوع 13 - Muslim Sindhi Bibleباقي بچيل ملڪ هٿ ڪرڻ 1 هاڻ يشوع تمام پيرسن ٿي چڪو هو. خداوند کيس فرمايو تہ ”تون تمام ٻڍو ٿي ويو آهين، پر اڃا گھڻي زمين باقي بچي پيئي آهي جا هٿ ڪرڻي آهي. 2 جيڪا زمين اڃا رهيل آهي سا هيءَ آهي: فلستين ۽ جسُورين جا سڀ علائقا، 3 سيحور ندي جيڪا مصر جي اوڀر ۾ آهي تنهن کان وٺي اتر ڏانهن عقرون جي سرحد تائين، اهو سمورو علائقو ڪنعانين جو ليکيو ويندو آهي يعني فلستين جي پنجن سردارن غزي، اشدودي، اسقلوني، جاتي ۽ عقروني وارو علائقو ۽ ڏکڻ ۾ عويم جو علائقو پڻ. 4 هي زمين بہ رهيل آهي: ڪنعانين جو سڄو علائقو، صيدانين جي شهر مغارہ کان وٺي اتر ۾ افيق يعني امورين جي علائقي تائين، 5 جِبلين جو سڄو علائقو، اوڀر طرف سڄو لبنان، حرمون جبل جي هيٺان بعلجد کان وٺي حمات لڪ تائين. 6 لبنان کان مسرفاتالمائم تائين جابلو علائقن جي سڀني رهاڪن کي صيدانين سميت، آءٌ بني اسرائيل جي اڳيان سندن علائقي مان ڀڄائي ڪڍندس. تون رڳو اهو ملڪ ورهائي بني اسرائيل کي ورثي طور ڏي، جيئن مون تو کي حڪم ڏنو آهي. 7 سو هاڻ اهو ملڪ تون انهن باقي نون قبيلن ۽ منسيءَ جي اڌ قبيلي کي ورثي طور ورهائي ڏي.“ اردن جي اوڀر طرف واري علائقي جي ورهاست 8 منسيءَ جي ٻئي اڌ قبيلي، بني روبن ۽ بني جد کي اڳ ۾ ئي ورثو ملي چڪو هو جيڪو خداوند جي ٻانهي موسيٰ کين اردن درياءَ جي اوڀر طرف ڏنو هو. 9 انهيءَ جي پکيڙ هي آهي: عروعير شهر، جيڪو برساتي نهر ارنون جي ڪناري تي آهي ۽ جيڪو شهر انهيءَ نهر جي وچ ۾ آهي تن کان وٺي ويندي ميدبا شهر جي ڀر واري سڄي ميدان سميت جيڪو ديبون تائين آهي 10 ۽ امورين جي بادشاهہ سيحون جيڪو حشبون تي راڄ ڪندو هو تنهن جا سڀ شهر، ويندي بني عمون جي سرحد تائين. 11 انهيءَ ۾ جِلعاد، جسُورين ۽ معڪاتين جا علائقا، سڄو حرمون جبل ۽ سلڪہ تائين سڄو بسن شامل آهن. 12 بسن ۾ عوج بادشاهہ جيڪو رفائين جي باقي بچيل نسل مان هو ۽ عستارات ۽ ادرعي تي راڄ ڪندو هو، تنهن جي سڄي بادشاهت انهيءَ ۾ شامل هئي. موسيٰ انهن کي شڪست ڏيئي کين بيدخل ڪري ڇڏيو هو. 13 پر بني اسرائيل جسُورين ۽ معڪاتين کي ڪونہ ڀڄائي ڪڍيو هو، تنهنڪري اهي اڄ ڏينهن تائين بني اسرائيل منجھہ رهندا اچن. 14 پر لاوي قبيلي وارن کي موسيٰ ڪوبہ ورثو ڪونہ ڏنو هو، ڇاڪاڻ تہ خداوند، بني اسرائيل جي خدا لاءِ ساڙيون ويندڙ قربانيون ئي انهن جو ورثو هيون، جيئن هن ساڻن واعدو ڪيو هو. روبن قبيلي کي ڏنل علائقو 15 جيڪو علائقو موسيٰ روبن قبيلي کي سندن گھراڻن موجب ڏنو هو سو هي هو: 16 عروعير جيڪو برساتي نهر ارنون جي ڪناري تي آهي ۽ جيڪو شهر انهيءَ نهر جي وچ ۾ آهي تن کان وٺي ميدبا شهر جي ڀر واري سڄي ميدان سميت. 17 انهيءَ ۾ حشبون ۽ ان جا ميدان وارا سڀ شهر شامل آهن يعني ديبون، باماتبعل ۽ بيتبعلمعون، 18 يهصاہ، قديمات ۽ مفعت، 19 قريتائم، سبماہ ۽ ضرتالسحر جيڪو ماٿريءَ ۾ ٽڪر تي آهي، 20 بيتفغور، پسگہ جون لاهيون ۽ بيتيسيموت، 21 ميدان جا سڀ شهر، امورين جي بادشاهہ سيحون جي سڄي بادشاهت، جيڪو حشبون تي بادشاهي ڪندو هو. موسيٰ انهيءَ کي ۽ انهيءَ ملڪ ۾ رهندڙ مديان جي قبائلي سردارن اَوي، رقم، صور، حور ۽ ربع کي شڪست ڏيئي ماري ڇڏيو هو جيڪي سيحون جا امير هئا. 22 بني اسرائيل جن کي قتل ڪيو هو تن ۾ بعور جو پٽ بلعام جيڪو فالون وجھندو هو، سو بہ هو. 23 بني روبن جي سرحد اولهہ ۾ اردن درياءَ جو ڪنارو هئي. اهي شهر ۽ ڳوٺ بني روبن جي گھراڻن جي ميراث ۾ هئا. جد قبيلي کي ڏنل علائقو 24 اهو علائقو جيڪو موسيٰ جد قبيلي کي سندن گھراڻن موجب ميراث ڪري ڏنو هو سو هي هو: 25 يعزير جو علائقو، جِلعاد جا سڀ شهر ۽ بني عمون جي اڌ زمين عروعير تائين، جيڪو ربہ جي سامهون آهي، 26 حشبون کان رامت المصفاہ ۽ بطونيم تائين ۽ محنايم کان دبير جي علائقي تائين، 27 اردن جي ماٿريءَ ۾ بيت هارم، بيت نمرہ، سڪات ۽ صفون ۽ حشبون جي بادشاهہ سيحون جي باقي بچيل بادشاهت سميت، اردن درياءَ جي اوڀر طرف گليل ڍنڍ تائين. 28 اهي شهر ۽ ڳوٺ بني جد جي گھراڻن جي ميراث ۾ هئا. منسيءَ جي اوڀر واري اڌ قبيلي کي مليل علائقو 29 اهو علائقو جيڪو موسيٰ منسيءَ جي اوڀر واري اڌ قبيلي کي سندن گھراڻن موجب ڏنو هو سو هي هو. 30 اهو علائقو محنايم کان وٺي شروع ٿيو. انهيءَ ۾ سڄو بسن، بسن جي بادشاهہ عوج جي سڄي بادشاهت ۽ يائير جا سڀيئي سٺ شهر جيڪي بسن ۾ آهن، سي شامل هئا. 31 منجھس اڌ جِلعاد، عستارات ۽ ادرعي، جيڪي بسن ۾ عوج جي بادشاهت جا گاديءَ وارا شهر هئا، سي پڻ شامل هئا. اهي سڀ منسيءَ جي پٽ مڪير جي اولاد جي اڌ گھراڻن کي ڏنا ويا. 32 اهڙيءَ طرح موسيٰ يريحو شهر جي سامهون اردن درياءَ جي اوڀر طرف موآب جي ميدان ۾ اِهي علائقا ورثي طور ورهائي ڏنا. 33 پر لاوي قبيلي کي موسيٰ ڪابہ زمين ورثي طور نہ ڏني، ڇاڪاڻ تہ خداوند، بني اسرائيل جو خدا ئي انهن جو ورثو آهي، جيئن ساڻن واعدو ڪيو هئائين. |
Muslim Sindhi Bible © The Pakistan Bible Society, 2022
مقدس ڪلام توريت، زبور ۽ نبين جون ٻيو لکتون ۽ انجيل شريف
Bible text may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from the Holy Bible in Muslim Sindhi,
Copyright © 2022 The Pakistan Bible Society.
Used by permission. All rights reserved.
Pakistan Bible Society