قاضين 12 - Muslim Sindhi Bible

افتاح ۽ بني افرائيم

¹ تڏهن افرائيم جا ماڻهو جنگ ڪرڻ لاءِ اچي گڏ ٿيا. هو اردن درياءُ پار ڪري صفون علائقي ڏانهن ويا ۽ اتي افتاح کي چيائون تہ ”تون اسان کي پاڻ سان گڏ هلڻ لاءِ سڏڻ کان سواءِ ڇو بني عمون سان وڙهڻ لاءِ وئين؟ هاڻي اسين تو کي تنهنجي گھر سميت ساڙيون ٿا.“

² افتاح کين ورندي ڏني تہ ”آءٌ ۽ منهنجي قوم بني عمون سان سخت جھيڙي ۾ رڌل هئاسين، حالانڪ مون اوهان کي سڏيو بہ هو، تڏهن بہ اوهان مون کي انهن جي هٿان ڪونہ اچي ڇڏايو.

³ پوءِ جڏهن مون ڏٺو تہ اوهان مدد لاءِ نہ ايندءُ، تڏهن آءٌ پنهنجو سر تريءَ تي رکي بني عمون سان وڙهڻ لاءِ پار ويس، تڏهن خداوند مون کي انهن تي سوڀ ڏني. هاڻ ڇو اوهين اڄ مون سان وڙهڻ لاءِ آيا آهيو؟“

⁴ تڏهن افرائيمين کيس چيو تہ ”اوهين جِلعادي جيڪي بني افرائيم ۽ بني منسيءَ منجھہ رهو ٿا سي افرائيم جا ئي ڀڳوڙا آهيو.“ تنهن تي افتاح جِلعاد ملڪ جا سڀ ماڻهو گڏ ڪري بني افرائيم سان جنگ ڪئي ۽ کين شڪست ڏنائون.

⁵ جِلعادين افرائيمين کي روڪڻ لاءِ اردن درياءَ جا گھٽ وڃي جھليا ۽ جڏهن ڪنهن افرائيمي ڀڳوڙي اچي ٿي چيو تہ ”مون کي پار ٽپڻ ڏيو،“ تڏهن جِلعاد جي ماڻهن کانئس پڇيو ٿي تہ ”تون افرائيمي آهين ڇا؟“ جيڪڏهن هن ٿي چيو تہ ”نہ،“

⁶ تڏهن جِلعادين چيس ٿي تہ ”چڱو، ڀلا چئُہ ’شبلت.‘“ تنهن تي هن ٿي چيو تہ ”سبلت،“ ڇاڪاڻ تہ افرائيمي ماڻهو انهيءَ لفظ جو اچار صحيح طرح چئي نہ ٿي سگھيا. اهڙيءَ طرح جِلعادي افرائيمين کي پڪڙي اردن درياءَ جي گھٽن تي قتل ڪندا ٿي ويا. سو انهيءَ وقت افرائيم جا ٻائيتاليهہ هزار ماڻهو قتل ٿي ويا.

⁷ افتاح جِلعادي ڇهہ سال بني اسرائيل جو رهبر رهيو. پوءِ هن وفات ڪئي ۽ جِلعاد جي شهرن مان هڪ ۾ کيس دفن ڪيو ويو.

رهبرَ ابصان، ايلون ۽ عبدون

⁸ افتاح کان پوءِ بيت‌لحم وارو ابصان بني اسرائيل جو رهبر بڻيو.

⁹ هن کي ٽيهہ پٽ ۽ ٽيهہ ڌيئر هيون. هن پنهنجيون سڀ ڌيئر ڌارين ۾ پرڻايون ۽ پنهنجي پٽن لاءِ ٽيهہ ڇوڪريون ڌارين مان ورتائين. ابصان ست سال بني اسرائيل جو رهبر رهيو.

¹⁰ پوءِ هن وفات ڪئي ۽ کيس بيت‌لحم ۾ دفن ڪيو ويو.

¹¹ انهيءَ کان پوءِ زبولون وارو ايلون ڏهہ سال بني اسرائيل جو رهبر رهيو.

¹² پوءِ ايلون وفات ڪئي ۽ زبولون علائقي جي ايالون شهر ۾ کيس دفن ڪيو ويو.

¹³ انهيءَ کان پوءِ فرعاتون شهر واري هليل جو پٽ عبدون اٺ سال بني اسرائيل جو رهبر رهيو.

¹⁴ هن کي چاليهہ پٽ ۽ ٽيهہ پوٽا هئا ۽ انهن سڀني کي سواريءَ لاءِ پنهنجو پنهنجو گڏهہ هو.

¹⁵ پوءِ هن وفات ڪئي ۽ کيس عماليقين جي جابلو علائقي ۾ افرائيم جي فرعاتون شهر ۾ دفن ڪيو ويو.