پيدائش 45 - Muslim Sindhi Bible

يوسف جو پاڻ کي ظاهر ڪرڻ

¹ يوسف پنهنجي نوڪرن جي اڳيان پاڻ کي جھلي نہ سگھيو ۽ رڙ ڪري کين چيائين تہ ”سڀيئي ٻاهر هليا وڃو.“ سو جڏهن يوسف پاڻ کي پنهنجي ڀائرن ۾ ظاهر ڪيو، تڏهن اتي ٻيو ڪوبہ ماڻهو موجود ڪونہ هو.

² يوسف ايترو تہ زور سان رنو جو مصرين ٻڌي ورتو ۽ اها خبر وڃي مصر جي بادشاهہ جي محلات ۾ پهتي.

³ يوسف پنهنجي ڀائرن کي چيو تہ ”آءٌ يوسف آهيان. ڇا منهنجو پيءُ اڃا جيئرو آهي؟“ پر سندس ڀائر ڪابہ ورندي ڏيئي نہ سگھيا، ڇوجو هو سندس اڳيان گھٻرائجي ويا.

⁴ پوءِ يوسف پنهنجي ڀائرن کي چيو تہ ”ڀلائي ڪري منهنجي ويجھا اچو.“ جڏهن هو ويجھا آيس تڏهن چيائين تہ ”آءٌ اوهان جو ڀاءُ يوسف آهيان جنهن کي اوهان وڪڻي مصر ۾ پهچائي ڇڏيو.

⁵ هاڻي فڪر نہ ڪريو، نڪي پنهنجيءَ دل ۾ پريشان ٿيو تہ اوهان مون کي هيڏانهن وڪيو. اصل ۾ خدا ئي مون کي اوهان کان اڳ ۾ اوهان جي جان بچائڻ لاءِ هتي موڪليو.

⁶ هي ڏڪار جو اڃا ٻيو سال آهي، پر اڃا پنج سال ٻيا بہ اهڙا آهن جن ۾ نڪو هر هلندو، نڪو لابارو پوندو.

⁷ تنهنڪري خدا مون کي اوهان کان اڳ ۾ موڪليو تہ جيئن هو اوهان کي هن عجيب وَ غريب نموني سان حياتي بخشي ۽ زمين تي اوهان لاءِ باقي بچيل نسل قائم رکي.

⁸ سو اوهان نہ پر خدا مون کي هيڏانهن موڪليو. هن مون کي بادشاهہ جو هڪ اعليٰ عملدار بڻايو. هن مون کي بادشاهہ جي سڄي گھر جو مالڪ ۽ مصر جي سڄي ملڪ تي حاڪم ڪيو آهي.

⁹ هاڻي اوهين جلد منهنجي پيءُ ڏانهن وڃو ۽ کيس هي پيغام ڏيو تہ سندس پٽ يوسف چوي ٿو تہ ’خدا مون کي سڄي مصر جو مالڪ ڪيو آهي. سو بنا دير جي مون وٽ هليا اچو

¹⁰ ۽ جشن جي علائقي ۾ اچي رهو. پوءِ توهين، توهان جا پٽ پوٽا، توهان جون رڍون ٻڪريون، ڍور ڍڳا ۽ ٻيو جيڪي ڪجھہ بہ توهان وٽ آهي سو مون کي ويجھو ٿيندو.

¹¹ اتي آءٌ اوهان جي سنڀال پيو لهندس. جيئن تہ اڃا ڏڪار جا پنج سال ٻيا بہ آهن، سو متان توهين، توهان جو خاندان ۽ ٻيا جيڪي توهان وٽ آهن سي ڪنگال ٿي پئو.‘“

¹² يوسف پنهنجي ڀائرن کي وڌيڪ چيو تہ ”هاڻ اوهين ۽ منهنجو ڀاءُ بنيامين پنهنجين اکين سان ڏسو ٿا تہ آءٌ يوسف ئي اوهان سان ڳالهايان ٿو.

¹³ مصر ۾ جيڪو منهنجو شان وَ شوڪت آهي ۽ ٻيو بہ جيڪي ڪجھہ ڏٺو اٿوَ، سو سڀ منهنجي پيءُ کي بيان ڪري ٻڌائجو. هاڻ اوهين جلدي وڃو ۽ منهنجي پيءُ کي هتي وٺي اچو.“

¹⁴ پوءِ يوسف پنهنجي ڀاءُ بنيامين کي ڀاڪر پائي رنو ۽ بنيامين بہ کيس ڀاڪر پائي رنو.

¹⁵ هو پنهنجي سڀني ڀائرن سا روئي مليو ۽ کين چميائين. تنهن کان پوءِ سندس ڀائر ساڻس ڳالهيون ڪرڻ لڳا.

¹⁶ جڏهن اها خبر بادشاهہ جي محلات پهتي تہ يوسف جا ڀائر آيا آهن، تڏهن بادشاهہ ۽ سندس عملدار ڏاڍا خوش ٿيا.

¹⁷ بادشاهہ يوسف کي چيو تہ ”تون پنهنجي ڀائرن کي چئُہ تہ هو پنهنجا وهٽ لڏي جلدي ڪنعان جي ملڪ ڏانهن موٽي وڃن.

¹⁸ پنهنجي پيءُ ۽ پنهنجن گھر وارن کي هتي وٺي اچن. آءٌ انهن کي مصر جي ملڪ جون ڀلي ۾ ڀليون شيون ڏيندس ۽ اهي هن ملڪ ۾ مزي سان زندگي گذاريندا.

¹⁹ تون هنن کي هي بہ چئُہ تہ هو پنهنجين زالن ۽ ٻارن لاءِ مصر جي ملڪ مان گاڏيون ڪاهي وڃن ۽ پنهنجي پيءُ کي بہ ساڻ وٺي موٽي اچن.

²⁰ اهي پنهنجي مال ملڪيت جو فڪر نہ ڪن، ڇو تہ مصر ملڪ جون سموريون ڀلي ۾ ڀليون شيون انهن جي لاءِ آهن.“

²¹ سو يعقوب جي پٽن ائين ئي ڪيو. يوسف فرعون جي حڪم موجب کين گاڏيون ۽ رستي جي لاءِ سمر ڏنو.

²² هن انهن مان هر هڪ کي هڪ هڪ ڪپڙن جو وڳو ڏنو، پر بنيامين کي ٽي سؤ چانديءَ جا سڪا ۽ پنج وڳا ڏنائين.

²³ هن پنهنجي پيءُ ڏانهن مصر جي عمدين شين سان لڏيل ڏهہ گڏهہ ۽ سندس مسافريءَ لاءِ اناج، روٽ ۽ سيڌي سامان سان لڏيل ڏهہ گڏهيون موڪليون.

²⁴ پوءِ هن پنهنجي ڀائرن کي روانو ڪيو. رواني ٿيڻ وقت کين چيائين تہ ”ڏسو، متان رستي تي پاڻ ۾ وڙهو.“

²⁵ سو هو مصر مان روانا ٿيا ۽ ڪنعان جي ملڪ ۾ پنهنجي پيءُ يعقوب وٽ پهتا.

²⁶ هنن کيس ٻڌايو تہ ”يوسف اڃا جيئرو آهي ۽ مصر جي سڄي ملڪ جو حاڪم آهي.“ اهو ٻڌي يعقوب وائڙو ٿي ويو ۽ کيس هنن جي ڳالهين تي يقين نہ آيو.

²⁷ پر جڏهن هنن اهي سڀ ڳالهيون جيڪي يوسف کين چيون هيون سي کيس ٻڌايون ۽ جڏهن هن اهي گاڏيون ڏٺيون جيڪي يوسف کيس وٺي اچڻ لاءِ موڪليون هيون، تڏهن سندن پيءُ يعقوب ۾ وري ساهہ پيو.

²⁸ يعقوب چيو تہ ”هاڻي مون کي خاطري ٿي تہ منهنجو پٽ يوسف اڃا جيئرو آهي. هاڻي آءٌ مرڻ کان اڳي ئي وڃي کيس ڏسندس.“