پيدائش 1 - Muslim Sindhi Bible

دنيا جي پيدائش

¹ شروعات ۾ خدا زمين ۽ آسمان کي پيدا ڪيو.

² ان وقت زمين بي‌ترتيب ۽ ويران هئي. اونهي سمنڊ جو مٿاڇرو اوندهہ سان ڍڪيل هو ۽ پاڻيءَ جي مٿان خدا جي روح ڦيرا پئي ڪيا.

³ تڏهن خدا حڪم ڏنو تہ ”روشني ٿئي.“ سو روشني ٿي پيئي.

⁴ خدا ڏٺو تہ روشني چڱي آهي. هن روشنيءَ کي اوندهہ کان ڌار ڪيو.

⁵ پوءِ روشنيءَ جو نالو ”ڏينهن“ رکيائين ۽ اوندهہ جو ”رات.“ سو سانجھي ٿي ۽ صبح ٿيو. اهو پهريون ڏينهن هو.

⁶ پوءِ خدا حڪم ڏنو تہ ”پاڻيءَ جي وچ ۾ حد مقرر ٿئي جيڪا پاڻيءَ کي ٻن حصن ۾ ورهائي.“ سو ائين ئي ٿيو.

⁷ اهڙيءَ طرح خدا هڪ حد بڻائي، جنهن جي وسيلي هيٺ واري پاڻيءَ کي مٿي واري پاڻيءَ کان ڌار ڪيائين.

⁸ خدا انهيءَ حد جو نالو ”آسمان“ رکيو. سو سانجھي ٿي ۽ صبح ٿيو. اهو ٻيو ڏينهن هو.

⁹ پوءِ خدا حڪم ڏنو تہ ”آسمان جي هيٺان جيڪو پاڻي آهي سو سڀ هڪڙي هنڌ گڏ ٿئي تہ جيئن خشڪي ظاهر ٿئي.“ سو ائين ئي ٿيو.

¹⁰ خدا خشڪيءَ جو نالو ”زمين“ رکيو ۽ پاڻي جيڪو گڏ ٿيو هو تنهن جو نالو ”سمنڊ“ رکيائين. خدا ڏٺو تہ اهو چڱو آهي.

¹¹ پوءِ حڪم ڏنائين تہ ”زمين تي اناج ڏيندڙ توڙي ميوا ڏيندڙ ٻوٽن سميت سڀني قسمن جا ٻوٽا پنهنجي پنهنجي جنس موجب پيدا ٿين.“ سو ائين ئي ٿيو.

¹² تڏهن زمين تي هر قسم جا ٻوٽا پيدا ٿيا، خدا ڏٺو تہ اهو چڱو آهي.

¹³ سو سانجھي ٿي ۽ صبح ٿيو. اهو ٽيون ڏينهن هو.

¹⁴ پوءِ خدا حڪم ڏنو تہ ”آسمان جي حد ۾ روشنايون ٿين تہ ڏينهن کي رات کان ڌار ڪن ۽ اُهي مندن، ڏينهن ۽ سالن جي شروع ٿيڻ جو وقت ظاهر ڪن.

¹⁵ اُهي زمين کي روشن ڪرڻ لاءِ آسمان ۾ چمڪن.“ سو ائين ئي ٿيو.

¹⁶ اهڙيءَ طرح خدا ٻہ وڏيون روشنيون ٺاهيون، هڪڙي وڏي جيڪا ڏينهن تي حڪومت هلائي ٿي ۽ ٻي ان کان ننڍي جيڪا رات تي حڪومت ڪري ٿي. خدا تارا بہ ٺاهيا.

¹⁷ خدا انهن روشنين کي آسمان جي حد ۾ رکيو، تہ جيئن زمين کي روشن ڪن.

¹⁸ اُهي ڏينهن ۽ رات تي حڪومت هلائين ۽ روشنيءَ کي اوندهہ کان ڌار ڪن. خدا ڏٺو تہ اهو چڱو آهي.

¹⁹ سو سانجھي ٿي ۽ صبح ٿيو. اهو چوٿون ڏينهن هو.

²⁰ پوءِ خدا حڪم ڏنو تہ ”پاڻي بي‌شمار ساهوارن سان ڀرجي وڃي ۽ پکي آسمان ۾ اُڏامن.“

²¹ سو وڏا وڏا سامونڊي جانور ۽ هر قسم جا پاڻيءَ ۾ رهندڙ ساهوارا ۽ هر قسم جا پکي پيدا ٿيا. خدا ڏٺو تہ اهو چڱو آهي.

²² خدا انهن سڀني کي برڪت ڏني. پاڻيءَ ۾ رهندڙ ساهوارن کي چيائين تہ ”وڌو ۽ ويجھو ۽ سمنڊ کي ڀرپور ڪريو.“ پکين کي چيائين تہ ”زمين تي وڌو ۽ ويجھو.“

²³ سو سانجھي ٿي ۽ صبح ٿيو. اهو پنجون ڏينهن هو.

²⁴ پوءِ خدا حڪم ڏنو تہ ”زمين هر قسم جا ننڍا وڏا، گھريلو ۽ جھنگلي جانور ۽ سرندڙ جيت‌جڻا پيدا ڪري.“ سو ائين ئي ٿيو.

²⁵ خدا انهن سڀني کي ٺاهيو ۽ خدا ڏٺو تہ اهو چڱو آهي.

²⁶ پوءِ خدا چيو تہ ”هاڻي اسين انسان کي ٺاهيون جيڪو اسان جي صورت تي اسان وانگر هجي. اُهي مڇين تي، پکين تي، گھريلو ۽ جھنگلي جانورن تي ۽ ننڍن وڏن ساهوارن تي حڪمراني ڪن.“

²⁷ تڏهن خدا انسان کي پاڻ وانگر ٺاهي پنهنجيءَ صورت تي پيدا ڪيو. خدا نر ۽ ناري پيدا ڪري

²⁸ کين برڪت ڏيئي چيو تہ ”گھڻا ٻار ڄڻيو ۽ ڌرتيءَ کي ڀرپور ۽ تابع ڪريو، مڇين تي، پکين تي ۽ سڀني جانورن تي حڪمراني ڪريو.

²⁹ مون اوهان جي کائڻ لاءِ هر قسم جو اناج ۽ هر قسم جو ميوو مهيا ڪري ڇڏيو آهي.

³⁰ جڏهن تہ ڌرتيءَ جي سڀني جانورن، پکين، جيت‌جڻن لاءِ مون گاهہ ۽ ساوا ٻوٽا مهيا ڪري ڇڏيا آهن.“ سو ائين ئي ڪيو ويو.

³¹ جيڪي ڪجھہ خدا ٺاهيو هو تنهن تي نظر ڪيائين ۽ ڏٺائين تہ اهو تمام چڱو آهي. سو سانجھي ٿي ۽ صبح ٿيو. اهو ڇهون ڏينهن هو.