خروج 25 - Muslim Sindhi Bible

عبادت‌گاهہ لاءِ نذرانا

¹ خداوند موسيٰ کي فرمايو تہ

² ”بني اسرائيل کي چئُہ تہ اهي منهنجي لاءِ نذرانو آڻين. هر هڪ ماڻهو پنهنجي دل جي خوشيءَ سان جيڪو بہ نذرانو آڻي، سو تون منهنجي لاءِ هن کان وٺ.

³ جيڪي شيون تون نذراني طور هنن کان وٺندين سي هي آهن: سون، چاندي ۽ پتل،

⁴ آسماني، واڱڻائي ۽ لال ڳاڙهي رنگ جا ڌاڳا، سنهي وٽيل سڻيءَ جو ڪپڙو ۽ ڏاس،

⁵ گھيٽن جون ڳاڙهيون رڱيل کلون، ڊالفن دريائي جانور جون کلون ۽ ٻٻر جو ڪاٺ،

⁶ ڏيئن لاءِ تيل، مسح ڪرڻ جي تيل لاءِ ۽ لوبان لاءِ مصالحا،

⁷ مذهبي فراڪ ۽ سينابند ۾ جڙڻ لاءِ سليماني پٿر ۽ هيرا جواهر.

⁸ هو منهنجي لاءِ هڪڙو مقدس خيمو ٺاهين، جو آءٌ سندن وچ ۾ رهندس.

⁹ انهيءَ خيمي ۽ ان جي ٻئي سامان جو جيڪو نمونو آءٌ تو کي ڏيکاريندس تنهن موجب اهي ٺاهجو.“

عهد واري صندوق

¹⁰ ”تون ٻٻر جي ڪاٺ جي هڪڙي صندوق ٺهرائج، جنهن جي ڊيگھہ اڍائي هٿ، ويڪر ڏيڍ هٿ ۽ اوچائي بہ ڏيڍ هٿ هجي.

¹¹ تون انهيءَ تي اندران ۽ ٻاهران نج سون جو پٽ چاڙهائج ۽ انهيءَ جي مٿان چوڌاري سون جو ڇٽ ٺهرائج.

¹² تون انهيءَ جي لاءِ سون جا چار ڪڙا پلٽي ٺهرائج ۽ اهي صندوق جي چئني پاون تي هڻائج. ٻہ ڪڙا هڪڙي پاسي هڻائج ۽ ٻہ ٻئي پاسي.

¹³ تون ٻٻر جي ڪاٺ جون ٻہ ٻانهيون ٺهرائي، انهن تي سون جو پٽ چاڙهائج.

¹⁴ اهي ٻئي ٻانهيون صندوق جي ٻنهي پاسن تي انهن ڪڙن ۾ وجھائج، تہ جيئن صندوق کي کڻي سگھجي.

¹⁵ اهي ٻانهيون صندوق جي ڪڙن ۾ ئي پيون هجن ۽ انهن مان اصل نہ ڪڍيون وڃن.

¹⁶ عهد واريون ٻئي تختيون جيڪي آءٌ تو کي ڏيندس سي تون انهيءَ صندوق ۾ رکج.

¹⁷ تون نج سون مان صندوق جي ڍڪڻ لاءِ رحمت جو پوش ٺهرائج، جنهن جي ڊيگھہ اڍائي هٿ ۽ ويڪر ڏيڍ هٿ هجي.

¹⁸ تون رحمت جي پوش جي ٻنهي ڇيڙن تي سون کي گھڙي پردار آسماني مخلوق جا ٻہ مجسما ٺهرائج.

¹⁹ هڪڙو مجسمو هڪڙي ڇيڙي تي ۽ ٻيو مجسمو ٻئي ڇيڙي تي ٺهرائج. تون رحمت جي پوش ۽ ان جي ٻنهي ڇيڙن وارن مجسمن کي هڪڙي ئي ٽڪري مان ٺهرائج.

²⁰ اهي مجسما اهڙيءَ طرح مٿي پر پکيڙي بيهن جو سندن پرن سان رحمت جو پوش ڍڪجي وڃي. ٻيئي مجسما هڪٻئي جي آمهون سامهون ٿي رحمت جي پوش ڏانهن ڏسندا هجن.

²¹ تون عهد واريون ٻئي تختيون، جيڪي آءٌ تو کي ڏيندس سي انهيءَ صندوق ۾ رکج ۽ رحمت جو اهو پوش صندوق جي مٿان رکج.

²² اُتي آءٌ تو سان ملندس. رحمت جي پوش مٿان ۽ عهد واري صندوق تي جيڪي ٻہ مجسما هوندا تن جي وچ مان آءٌ انهن سڀني حڪمن جي باري ۾ جيڪي بني اسرائيل کي ڏيڻا هوندم، تو سان ڳالهائيندس.“

نذراني جي روٽن لاءِ ميز

²³ ”تون ٻٻر جي ڪاٺ جي هڪڙي ميز ٺهرائج، جنهن جي ڊيگھہ ٻہ هٿ، ويڪر هڪ هٿ ۽ اوچائي ڏيڍ هٿ هجي.

²⁴ انهيءَ تي نج سون جو پٽ چاڙهائج ۽ ان جي چوڌاري سون جو ڇٽ ٺهرائج.

²⁵ ميز جي چوگرد چار آڱر اُڀي ڪناري ٺهرائج ۽ ڪناريءَ جي مٿان بہ چوڌاري سون جو ڇٽ ٺهرائج.

²⁶ انهيءَ جي لاءِ سون جا چار ڪڙا ٺهرائي، اهي ميز جي چئني پاون تي لڳرائج.

²⁷ اهي ڪڙا ڪناريءَ جي ويجھو هجن، تہ جيئن ميز کي کڻڻ جي لاءِ ٻانهين وجھڻ جي جاءِ رهي.

²⁸ تون ٻٻر جي ڪاٺ مان ٻہ ٻانهيون ٺهرائي، انهن تي سون جو پٽ چاڙهائج، جيئن انهن سان اها ميز کڻجي.

²⁹ تون ميز تي رکڻ لاءِ ٿالهيون، پيالا، وٽا ۽ اوتڻ واري نذراني لاءِ جڳ ٺهرائج. اهي سڀ نج سون جا ٺهرائج.

³⁰ انهيءَ ميز تي تون منهنجي حضور ۾ نذراني وارا روٽ هميشہ رکندو رهج.“

شمعدان

³¹ ”تون نج سون کي گھڙائي هڪڙو شمعدان ٺهرائج، جيڪو تري، شاخن، ڏياٽين، بونبن ۽ گلن سميت هڪڙي ئي ٽڪر مان ٺهيل هجي.

³² شمعدان جي وچين ڏانڊيءَ جي ٻنهي پاسن کان ڇهہ شاخون ٻاهر نڪتل هجن، ٽي شاخون هڪڙي پاسي کان ۽ ٽي ٻئي پاسي کان.

³³ انهن ڇهن ئي شاخن مان هر هڪ ۾ باداميءَ جي گلن جي شڪل وارا ٽي ٽي گل پنهنجي بونبن ۽ پتين سميت هجن.

³⁴ شمعدان جي وچين ڏانڊيءَ ۾ چار باداميءَ جي گلن جي شڪل وارا گل پنهنجن بونبن ۽ پتين سميت هجن.

³⁵ انهن چئن گلن مان هڪ پهرين ٻن شاخن جي هيٺان هجي، ٻين ٻن شاخن جي هيٺان بہ هڪ گل هجي ۽ ٽين ٻن شاخن جي هيٺان بہ هڪ گل هجي.

³⁶ اهڙيءَ طرح گلن ۽ شاخن سميت پورو شمعدان نج سون جي هڪڙي ئي ٽڪري مان گھڙي ٺاهيل هجي.

³⁷ تون شمعدان جي مٿين گلن وارين ستن ڏياٽين لاءِ ست ڏيئا ٺهرائج. اهي ڏيئا شمعدان تي اهڙيءَ طرح رکائج جو انهن جي روشني سامهون هجي.

³⁸ تون ڏيئن جا ڦلا لاهي رکڻ لاءِ چمٽا ۽ منگالا نج سون مان ٺهرائج.

³⁹ شمعدان سموري سامان سميت چوٽيهہ ڪلوگرام نج سون جو هجي.

⁴⁰ ڌيان رکج، اهي سڀ شيون اهڙي ئي نموني ٺهرائج، جيڪو مون تو کي جبل تي ڏيکاريو آهي.“